Thlanmualah thing phun ila

Thing hi kan nunna hnar pawimawh ber te zinga mi, boruak ṭha min petu a ni. Sawitu pakhat chuan, 'Thing phun nachang hre lo chuan, khawlum hi sawisel ve suh se' a ti. Thing vawikhat pawh la phun lo chuan khaw lumzia hi sawi sawi ve tur pawh kan ni chiah lo tihna a ni ber.

Bazar Veng Lunglei hian thlanmual no. 1 leh 2 kan nei a. Kan thlanmualah hian rual u zawkte hmalaknain thing an lo phun ṭhin a, vawiinah chuan a hlutna kan hre chho mek a ni. A tirah chuan sawia seltu pawh an awm ve bawk a. Thing phunin thlan a tichhia ang tia sawi pawh an bang bik lo, mahse, huai takin an kalpui a, tunah chuan ṭha tia sawitu hi an tam tawh zawk.

Thlanmual no. 1-ah hian Lungleia mipui punkhawmna ber Ṭhuamluaia mual hming phuah chhan C. Ṭhuamluaia (fam), hla phuah thiam Lalzova (fam) leh Mizote min ti hmingṭhatu, India mai ni lo khawvel huapa boxing lama Mizote tana sulsutu boxer Zoramthanga (fam) te zalh an ni. Thlan-mual no. 2 lam-ah pawh thing te phunin kan humhalh
ṭha viau a ni.

Khawpuiah chuan hmun te hi a uiawm a, chuvangin, kan thlanmualah te hian a theih ang anga thing kan phun a, kan enkawl hi a ṭha hle dawn niin ka hria. Thingtlang lamah pawh hetianga thlanmual leh hmun humhalh bik kan neih loh chuan, kan tui tlan te thlengin nghawng a nei thei a. Tuna awlsamna kan zawn nasat lutuk chuan, kan tu leh faten harsatna lian tak an la tawk thei a ni.

Veng tin mai hian thlanmual tih loh hi chu vantlang anga thing phun theihna hmun hi kan nei meuh tawh lo. Khawpuiah mi kan pem lut zel a, in lah nise kan ram neih ang angah kan sa pum zel a, thing han phun maina tur pawh kan nei tawh lo. Chuvangin, mahni thlanmuala thing la phun ve ngai lo leh humhalh ngai lo te chuan, tun aṭang hian hma lain, thing te i phun sauh sauh ang u. Tin, kan thing phun hian hmun a ti nghet a, ruahsur nasaah pawh thlanmual min mai tur a veng bawk.

Sorkar aṭangin kum tin thing phun tur leh a phunna tur senso a lokal ṭhin, hengte hi thil ṭha tak a ni. Chutihrual chuan hetianga sorkar aṭanga hmalakpui pawh ni lo, veng leh khua
ṭhahnemngai taka thing phun a, humhalh te hi a enkawlna tur sum leh pai te hi pek theih nise kan phur tlang hlein ka ring. Kan thlanmual te hi park ang reng te hian chei thei ila, chutiangah hlei hlei chuan thing pawimawhna kan hria ang.

A kum telin khua a lum chho a, lirthei a pung zel a, boruak ṭha lo kan siam pawh hi a nasa zel dawn. Khaw kar kawnga thing phun te hi a hlu khawp mai, lirtheia chetsual palh pawhin, kawng thlang thui taka lum tur pawh chu kan thing phun chuan min venghim ve thei tlat a ni.

Engpawhnise, kan hmuh phak thingte enkawlin humhalh zel ila, a phun belh lamah pawh ṭan zel ang u.

- Biaksiamtluanga