Kan basangam mah mah lo maw?

Mizoramah MLA leh MP inthlan kan hmachhawn ta nual a, party lian leh tling thei tura inngai candidate-te karah behchhan pawh nei lo party te, behchhan nei party ni tho si, tling lo tur tih hriat ngawih ngawih candidate-ah an han intawktarh ve ngawt zel a. Hengho hian eng hlawkna nge an um ang le? An basangam mah mah ṭhin lo maw le?

MLA inthlan lo awm tawhah Mizorama political party lian karah central lam zawm party-te'n kan candidate atan mimal an rawn sawm fo a, BJP leh party dangte pawhin an rawn nei ta fo mai. Heng candidate tam zawk hian hekna aiin hlawkna an thlahlel ngeiin a rinawm a, campaign sum huiluh tumna mai mai niin a lang tlat.

Tunah MP kan inthlang dawn a, party lian pathum, MNF, Congress leh ZPM ten candidate an nei dawn a, party lian lem lo PC party pawhin an candidate tur an puang tawh bawk a. Party lian pathum tan chuan chance pawh a awm thei ang. Chutih laiin party té zawk candidate han nih ngam hi a mak ṭhin ngawt mai. Chumi piahah behchhan nei hauh loin independent candidate an han ni ngam tlatte hi a mak a ni. Eng angin nge an inhmuh ṭhin ni le?

Mahni mimal anga in-candidate emaw, party tenau aiawha candidate nih hi mipui hian kan nuihzat tih hi an hre hauh lo ni pawhin a lang. Mahni party bansana independent candidate han nih ngam ngatte hi a ho ngawt mai. Tling lem lo tur tih hriat reng renga candidate nih hrim hrim a, tlin pawh ring loa mahni sum hek pawha han sapatal chakna a awm tlat a niang chu maw?

MLA inthlan kan zawh takah pawh khan tling reng reng lo tur tih hriat ngawih ngawih candidate-ah an awm fur mai a, kha'ng candidate-te khan an tlin lohna kha na an ti ang nge, candidate nih hrim hrim kha an chapopui zawk ang le? Mipui hian ngaih khata kan ngaih candidate-te kha mipui min zah lo viau nge, mipuite hian kan bawl zawk? Nge anmahni'n mipui min bawl zawk ni ang?

Pathian thlarauin a hriattir nia inngaia candidate han neih ṭeuhte kha, ropuina lian takah an inngai em ni ang tih theihin urhsun takin an han campaign vete kha, party lianho tan chuan a ho ngawt ang. Mahse an zak bik reng reng lo kha an fakawm letling viau. Tunah pawh MP kan inthlang turah hian mahni party chhuahsana independent candidate tur pawh an awm leh dèr ta mai. Eng angin nge mipui hian an ngaih ve dawn ni.

- Lalhmunzauva