Mau sáwngbawl (Tripura Press Tour Report Part–II)
Ka Article hmasaah khan Mizoram sorkar, Information and Public Realations Department leh MJA tirha March ni 11-14 chhung, Tripura Sorkar hmalakna hrang hrang belchianga kan zin tlawh ṭuma Tripura-a Rubber an chin dan leh an sum leh pai hnar a nih chhoh dan ka ziak tawh a, tun ṭumah hi chuan Mau sawbawlna an kalpui dan leh Mizorama kan tih theih ve nia langte kan ziak ve thung dawn a ni.
Ralkhat aṭanga kan lo thlir ṭhin danin Tripura chu keini aia hnuaihnung deuh zawk leh, hmasawnna pawh hnufum deuh zawk angin kan lo ngai ṭhin a, a taka zuk hmuh erawh chuan an hmasawnna umpha turin tihtakzeta ṭan kan lak a ngai tih chiang taka hmuah ka inngai. Rubber aṭanga an sum lakluh leh an dinhmun chu kan sawi tawh angin turu tak a ni a, kan hriat loh lamah pawh Mau sawngbawlna lamah pawh hma an lo sawn nasa hle a ni. Tun hma aṭangin kan ram hruaituten Mau ṭangkaina leh hausakpui theih a nih dan te, Mizoramah Mau a tam thu leh chumi chu hman ṭangkai theih a nih dan hahipin an lo sawi tawh ṭhin a, chumi tura hmalakna beitham ang reng takte pawh lo kalpui ve tawh ṭhin mah ila, a tak taka hmalakna a la awm miau loh avangin Mau kan ngah ang huin a hlawkna erawh kan la tel tam lo hle thung.
Tripura-a kan zinnaa an Industry pakhat kan tlawh Mau sawngbawlna hmun, G Cube Stick Pvt. Ltd. khan ka ngaituahna a tikal thui hle a. Kha Industry-ah khan Mau aṭangin thil chi hrang hrang–Agarbati Stick, Chopstick, Bamboo Charcoal leh thil dang eng eng emaw an siam chhuak a, chungte chu ram chhung hmun hrang hrangah man to zawkin an hralh chhuak leh ṭhin a ni. Company enkawltute chuan, an thil siamchhuah zingah Bamboo Charcoal chu a man a to ber thu leh thil dang an siam chhuah chu hlawk tho mah se, Bamboo Charcoal chu an siam duh ber a nih thu an sawi a, Mau sawngbawlna hmunah hian a bangnawi paih pakhat mah awm lovin, an hmang ṭangkai vek tih an sawi. Mizoramah pawh Mau kan ngah avangin a sawngbawlna hmun hi din ni ve thei se, Mau aṭanga kan sum lakluh chu tun aiin a tam hle ang tih a rin theih a ni.
Tripura-a an Mau neih chu Mizorama kan Mautak ang ni lo, tlema lian leh chhah deuh (Phulrua ang deuh) a ni tlangpui a, State dang aṭanga lalut lovin an mahni an intodelh vek a, Company lamin a chingtute hnen aṭangin Kg. khat Rs. 3.50 aṭanga Rs. 5 inkar velin an leisak tlangpui a (A man hi a lakna hlat dan azirin a inang lo). An Mau a len tham avangin a chingtute tan pawh a hlawk tham hle niin an sawi.
Tun hma deuh khan Mizoramah Mau sawngbawlna hi din a lo ni ve tawh ṭhin a, tunah erawh hman ṭangkai lohin a awm mek niin a lang a, MNF kaihhruai Sorkar liamta khan Mau ṭangkaina leh hlawkna hriain he lamah hian hmalak pawh a tum viau a, sum senral (Mau chi leina) ringawt pawh vaibelchhe tel a tling a nih kha. An Mau chin chu an Sorkar chhunga a ṭhan puitlin hman loh avangin hma lak zui vak ngaihna a awm lo a, Mau hlawkna leh ṭangkaina hi hriaiin, ZPM kaihhruai Sorkar thar a pian hnuah Horticulture Minister-in Taiwan tlawhin, Mau an sawngbawl dan leh an hman ṭangkai dan a han zirchiang nghal kha thil lawmawm tak a ni a. A thil han zir leh hma lak zuina zarah Mizoram Maute pawh ṭangkai zawka hman zel a nih a beisei awm a, hma an lak zui dan kan lo thlir reng dawn a ni.
- Samuel Lalruatsanga, Editor, Zonet News