Kawngpui sira lirthei park hi a hnawk

Aizawl khawpui hi a zimin lirthei leh mihring pawh kan kal ṭawk ṭawk a ni ber a, chutah lirthei a pung nasa ve zel si nen, mihring kan pung ve zel bawk si a; kawngsira lirthei an park ṭhenkhat hi chu lirthei dangte leh mihring kea kalte tan a hnawksak hle mai.

Kawngpui dunga dawr neitu tam takte chuan bungrua an unload dawn chuan zanrei tak tak, lirthei tlan tam tawh loh hunah emaw, Pathianni ah emaw an unload tlangpui a, hei hi a fuh khawp mai. Chutihlaiin lirthei tlan tam lai, zan dar 9 hma lamah kawngpui sira thil unload an la awm fo. A bikin Zarkawt phei Chawlhna Hotel hian lirthei tam lai; tlai thim thet thetahte 407 truck aṭangin tui an pipe/unload fo a, hei hian sawi a hlawhin mi dang tan harsatna a siam nasa hle.

Durtlang kawngpui pawh Leitan aṭanga a khaw pum khian kawngpui sirah lirthei an hung tluan a ni ber a, motor han intlanpelhna pawh awm lo khawpin duhdah deuha hung pawh an kat nuk mai. An Local Council leh traffic police lam hian ngaihven deuh se a lawmawm ngawt ang. Ni tina he kawng zawhtute tan chuan ninawm ve tak a ni.

Khawpui chhungah pawh dawra bungraw dahho hian mi dang an zah lo mah mahin a lang. A rem emaw rem lo emaw an bungraw dahna tur dawr zawnah an ding tawp mai a, lirthei dangte tana tlan pelh mai theih loin an park fo. Heng hian dikna an nei uchuak bik lo a, engti kawng mahin kawngpui tichep leh lirthei dangte tana harsatna an siam thiang bik lo. Traffic police lam pawh hi strict deuh se a ṭha hle mai.

Traffic police hi an kahuh leh strict deuhin kan sawisel a, mahse an strict loh chuan engtin mah kan khawpui zim lutukah hian lirthei a tlan mumal thei lo. An hàm strict deuh a nih pawhin sawisel hlawh huam se, khauh takin lirthei leh a khalhtute pawh thunun se a ṭha berin a rinawm.

Lirthei khalhtu ṭhenkhat; a bik takin taxi ke hnih nei emaw, ke li nei hi khawpui chhungah chuan an ninawm zual. Passenger thlèk reng rengin an tlan a, an hnunga mite tana tlan pelh rem si lo, speed muang deuh maia an tlan hi a khamawm chang a tam mai. Passenger an han hmuh chuan an hnunga tlan vete lam an ngaihtuah tawh lem lo. Driver mawl deuh phei chu an ding tawp a, a ṭhen lah kawngsir ni ve si, tlan pelh rem lo deuhin an han ding ṭhin pawh hi enfiah deuh a ]ha hle.

Lirthei changkang leh man to tak tak khalhtu zingah mahni lirtheiah phone number dah nachang hre si lo, mi garrage dal taka lo park ta mai mai lah bo lo. Mi dang tan a la hnawk thei tih hre loa lirthei park mai mai ching, intifing fu fu zingah pawh an kat ve nuk mai.

- Lal Rinmawia