MP ṭha tehna teh ṭhat a ngai
Lok Sabha MP chu kan inthlang leh dawn ta a, MNF chuan Rajya Sabha MP ni sa tawh Pu K Vanlalvena an rawn vawrh chhuak a, ZPM chuan Pu Richard Vanlalhmangaiha an vawrh chhuak a, Congress lamin politics lama mi thar, officer lian tak aṭanga pension; Pu Lalbiakzama an vawrh chhuak.
Pu Biakzama hi officer ṭha tak a nih hmel a; a record en reng reng pawh hian, a hnathawh tur a thawk zo tawh a, officer ṭha nih hi a career atan a thlang fel tawh bawk a. Officer ṭha niin lo chawl tawh mai se, MP tla han nih leh ting tang hi pension tawh hnuah a duh a nih chuan ama thu a ni a, Congress hian an ṭhalai zinga future nei ṭha zawkte tan political career bul ṭanna siamsak zawk se a ṭhat nen, pensioner nih hnua MP-a tla bawk chu 2028 MLA-ah pawh a lo upa tawh dawn si a, an game hi anni leh ni lo angin an play fuh lo.
MNF hian mi dang an hmu lo a ni si lo va, Rajya Sabha lama mi bawk an vawrh chhuak hian MNF-ah mi ṭha, mipui hip tur an tlakchhamzia an inpholang (expose) mai a ni. Chief Minister hlui Pu Zoramthanga chu a upat tawh avangin vawrh chhuah chi a ni lo va, nakina an CM candidate ni thei tur Dr R Lalthangliana te pawh han vawrh se ṭha tur. A nih loh pawhin an spokesman ber pakhat Pu Lalruatkima pawh insiam ṭhat lehna atan rawn candidate se, ṭang thiam deuh zawk an duh a nih loh pawhin lehkhathiam tak tak an neih zingah Ex MLA tlawngawl tawh, college leh university zirtirtu ṭhah, la valai bawk si, Prof Lalnunmawia, Dr L Thangmawia, Dr Vanlalṭanpuia te pawh an neih laia Pu K Vena bawk an dintir hi, MNF-in mihring an ngah ruala mipui duh an neih lohzia hailanna a ni thei a, mahni mawng hlimna a ni zawk ta daih. Tin, MNF hian mi dang career siam turin an GS rual MLA Candidate beisei hmu ve lo, la valai si pawh an nei nual a, rawn dintir zawk se. Pu K Vena an rawng huai nia an hriat an sèr a, a tlin loh chuan MNF tlakchhiat lehzual inṭanna a ni thei a nia.
Pu K Vena hi MLA-ah a lo ding tawh a, a hmu tlem hle a, ZPM zinga ṭhalai mi lawm hlawh pawh ni lo senior kha a hneh lo hle a, mipuiin an duh leh duh loh chu MLA lamah chuan an duh lo phawt. Lok Sabha MP atan a inzuar leh dawn a, an duh loh nawn leh si chuan Pu K Vena hi kum chanve chhungin mipuiin vawi hnih an hnawl dawn tihna a ni. "We shall kill them all" a tih avanga kan ramri a zauh phahna awm lo, MP role play-a mi dangte ṭhiana siama thil tifel tura ṭawng thiam mang si lo, pãwr tak taka Parliament House lama thu sawi hi chu a ho angreng hle. Chakma MLA te pawhin Mizoram Assembly House ah ṭawng pai tak takin thu an sawi ve duah a, an sawi tam poh leh mi dang nuih a za ting mai. An sawina tur ber leh an ṭawng hman ber thiam si lo va, mahni pâwr pâwra lo au vak vak hi MP ṭha tehna a ni dâwn em ni le?
MP hna hi Parliament House lama din zauh zauh hi a ni lo va, au vak vak pawh a ni hek lo va, Parliament House pawnah officer dawr tur a tam a, project bawhzui tur a tam a, chumi tur chuan "House-ah huaisen takin thu a sawi," tih hi a tawk lo va, Chakma MLA te pawhin Mizoram Assembly House-ah thu an sawi fo a, an sawi zo va, a reh fel der a, a pawimawh chu a sawitu kha a ni. Eng ang pawhin an harsatna rawn aupuiin Chakma tan rawn au ṭhin mah se, House lama an thusawi khan eng a su kaw si lo, kan Rajya Sabha MP pawhin huaisen tak takin thu a sawi fo tawh a, a sawi kua em? A sawi hmaa kan harsatna kha pâwr taka a au chhuahpui hnu khan kan harsatna a la ni reng em? Thu sawi ringawt hi tehnaah kan hman dawn phei chuan, ṭawng thiam taka au chhuah kha a pawimawh zawk ang.
YouTube lama ka hmuh ve pakhat chu Pu K Vena hian ṭawng thiam hnualsuat zawng lam hawia thu a sawi kha a ni a, hei hi chu a pawi hle a ni. Hindi leh English an hman tamna Parliament House ah chuan Hindi leh English thiam hi a pawimawh lo thei lo. Mizoram Assembly House-ah pawh Chakma zingah Mizo ṭawng thiam chu a dan a dang tih kan hmuh ang bawk hian, an rorelna ṭawng hman ber kha a pawimawh ta chu a ni a, chu chu kan thiam lo a nih chuan, "Kan inzir zel ang," tih tak aruanga Hindi leh English thiamna hnualsuat lek leka a sawi mai kha, sawi lo zawk se ṭhangthar vote a hmuh phah zawk awm si a.
Kan ṭhenawm MP te an smart em em a, Assam, Arunachal Pradesh, Meghalaya te pawh nál taka ṭawngin an tlangnel a, Delhi lama ram aiawh tur meuh chu anni anga ṭawng thiam nih ve tum zawk tur. MLA ṭha chu Assembly House chhung chauh ni lovin a pawna an chet dan kan en ṭhin a, Parliament House chhung hi chu hun rei lo te mai a nia, House pawnah pawh che thiam tel tur MP neih hi Mizoram hian a mamawh.
ZPM Candidate Pu Richard-a hi ka hmelhriat ngai a ni lo va, tuna an chhawp chhuah hnua ka hriat chawp a ni. Ani hi chu comment zui vak ngaihna ka la hre lo.
- Lalṭanpuia