Aizawl hian tui kan nghei thut thei

Khua a ṭhal ṭan leh ta a, Aizawl mai ni lo, thingtlangah pawh tuikhur tuite a kang mek a; Aizawl chawmtu ber Tlawng lui pawh a kám nasa a, hetianga tui hna a kangchat zel chuan Aizawl khawpui hian tui nghei thut thei dinhmunah kan ding ta.

Hmanni khan Aizawl khawpui chawmtu ber Tlawng lui (Reiek kai) ka zu tlawh a, nimin piah lawkah tui luang hum hum ṭhin kha a lo tlem ta hle tih hmuh theihin a awm. A kangchat ang tih hlauhthawnawm khawp a lo ni reng mai. Hetiang a nih chuan tui kan harsa dawn viau mai.

Tlawng lui hi Zobawk bulah hnar neiin khaw tam tak leh ram eng emaw zat a paltlang a, chu'ng lui kam zawng zawng thing leh maute chu a cherau nasa em em a, ramngaw hmuh tur a awm tawh lo. Heng ramngaw-te hi tunhnai kum 10 kalta vel aṭanga chereu nasa zual niin a lang. A chhan ber chu Burma lam aṭanga khawl lakluh a nih vang a ni. Chu'ng khawl hmang chuan awlsam em emin thing an kit a, thing lian leh thing te deuh pawh zuah loin an suasam vak a ni ber.

Hetiang a nih vang hian tuihna siam tur ramngaw a awm ta si lo a, Aizawl khawpui chhungah lah lui hnaih deuh deuhah huan leh ram, in thlengin kan din a, engtin mah tuihna siam tur thing leh mau kan phun belh si lo a, tuihna a awm thei tawh lo. Chuvangin ramngaw kan tichereu a, kan lui kam leh luikawrah bawlhhlawh tinreng kan paih bawk si a, tuihna tikangchat zawng hlirin kan nung a ni ber.

Mahni hma kan sial luattuk vang hian tui kan tlakchham theihna chance a sang em em a, Aizawlah a chawmtu tur tui ber pump chhuah tur a awm loh hunah chuan mang a ang dawn hle mai. Veng tinah Tuikhur mumal a awm tawh lo a, a awmchhun pawh kan tibawlhhlawh zel mai bawk si. Hetiang reng reng chuan tui kan nghei ang tih a hlauhawm vawng vawng ta hle.

Mimal ṭhenkhat lahin a rem remah lei thuk tak taka verhin tui an lachhuak a, hengte hian ram leilung a tihchhiat mai bakah mahni tan pawh a him lo tih PHE hotute lamin an sawi tawh kha. Hetiang a nih chuan Tlawng lui tui a kang bawk si chuan manganna a zual hle dawn a ni. Engtin nge tuihna tam zawk nei tura hma kan lak ang, tih hi mutmawh hnar mawhah kan neih a hun ta hle mai.

- Lal Rinmawia