A huhoin “Hosanna” ta mai ila
Tûn Pathianni liam ta, March 24, 2024 tûk kha a va nuam suau suau ve aw… Mizoram hmun hrang hranga khua leh véng tina kohhran hrang hrangten, mahni awmna véng/khaw chhúng fang kualin kan “Hosanna!” hut hut mai a nih kha. Lal Isua Krista chu kan véng chhúngah chàwimàwiin a awm leh ta! Khami tûk na nâ nâ kha chuan kan khawtláng ṭheuhah sual hi a kimki ve chawih chawihin a nia ka rin ni - a va ropui êm!
Chu tih rual chuan ka rilru erawh a hmin kim zãn lo deuh! Kohhran pakhat, kawng zawh tura chhuak hma deuhin kawng an zawh hma deuh a, hnung lawkah kohhran dangin an rawn zui leh a, kohhran dang kawng zawh ve tho nèn kan insûl pèl leh a. Tàwpna hun hman tumna lo inang te pawh kan awm ta dah a! Hnam dang ring lo mite tán kan mak duah duah ngawt lo’ng maw le aw… te ka ti hial a!
Àuhla inang reng, kan chàwimàwi leh fak kan tum thuhmun reng site khân, lamlian hrang hrangah péngin kan inau rinsiak emaw tih mai tùrin ráwl kan chhuah ta hlawm a! Véng chhúnga kohhran hrang hrangte hi, inthuruala a huhoa àu rual mai hi ka châk kum tin ṭhìn a. Hmun ṭhenkhata kohhran hrang infina kawng han zawh ho ta pawh sawi tùr chu awm ve zauh ṭhìn mah se, kan tam lo khawpin ka ring e.
Kum tina Túmkau Ní hmang ziah ṭhìn Zoram kohhrante hian, eng ngati nge vawiin thleng hian a huhoa kawng zawha kan la àu rual theih miah loh mai le? tih hi zawhna lian tak, kohhran tin hruaituten an la chhàn hleih theih loh (ngam loh?) niin ka hria. Kohhran tinin thurin kan nei hrang ṭheuh a, baptisma leh sacrament chungchángah te, hun hnuhnung, Lal Isua Krista lo kal lehna thuah te, Vàn ram kan hmuah dàn leh kan beisei dàn thleng paw’n, kan rin dàn leh pawm dàn a inang vek lo ang. Amaherawhchu, ropui taka Isua Krista’n, Lal anga Jerusalema a luh cham kan hman dàn leh kan lawm dàn erawh a inang ṭhúmin ka hria. A huhoa kan hman hian kohhran hrang hrangte thurin a tih nghìn phah ka ring lêm lo. Mahse, kan la hmang ho thei si lo!
He leia kan chàm chhúng hi chuan kohhran hrang hrang (denominations) hi huang khatah kan inkhung thei kumkhua dáwn lo tih chu thil chiangsa a ni. Chu tih rual chuan a theih chin china inṭàwiàwm emaw, lungrual taka thawhho emaw hi chu a máwi a, a Kristian a ni. Túmkau Pathianniah te hian Salvation Army lamin, an pipe band te nèn, naupang dárbenthek rimawi béng thiamte nèn hma hruai han hruai se, àu kár lakah zai min han hruai se la; kohhran dang aiawh ṭheuhin mipui áu han inhruai chhâwk se. Véng/khaw hrang hranga kohhran hruaitu emaw, Túmkau Ní-a kawng zawh dàn tùr rél ṭhintu/hma latu (Committee/department)-ten hun hman dàn tùr han rélho se la. Bîk bîk awm lo leh rilru kàwi pu miah loin, véng tina kohhran naupang, ṭhalai, nu leh pa leh kohhran hruaitute hian, a huhoin kan Lal Isua hi han cháwimáwi tláng thei ṭhìn ila aw… a va nuamin a va ropui lehzual dáwn êm!
A pawimawh ber leh kohhran tinin kan mamawh ber ni taa chu, “Isua chuanna Sabengtunga ṭan,” hi niin ka hre ta! “Kan kohhran chuan chumi kawng chu kan zawh loh chuan… chutiang item chu kan tih loh chuan… chutiang chuan kan ti ṭhìn a, kan tih ve theih dáwn loh chuan… kan kohhran Upa chanvo in pêk ve loh chuan…” tih tlatna rilru ang chî hi kan dah bo a hun tawh tak zet a. A nih loh chuan, “Hosanna!” tia au rualte hian, “Khéng bet rawh!” tih rilru kan pu zui hlauh ang tih a hlauhawm êm mai! Lal Isua’n a Lal ram a din theihna tùr rilru zau tak pua inhawng takin, Sabengtung anga tláwmin inphah hniam thei ṭheuh ila a duhawm ngawt mai… tih hi, Pathianni tûka ka kawng zawh zo, ka rilru min kam ve tlattu a ni e.
– Zirsangkima