Bjp aṭangin zir tur kan nei em?

Kristian kan nih avang leh, BJP hi Hindu Sakhua tibik Party-a ngaih an nih avang emaw ni tehreng, Central-a Pollitical party lian ber ni siah chuan Mizote zinga Party tuitla lo deuh ber a la ni rihin a lang. Pu Hmuaka te'n han vahvaihpui ve viau mah se, Mara leh Chakma Area ah lo chuan an tla na thei rih lo chu a nih hi.

BJP hi keini Mizo Kristiante chuan kan ngaina lutuk lo nain, tuna MP kan inthlan leh turah pawh hian la Sawrkar leh tur bera ngaih mek an ni. Result erawh Vote chhiar zawhah a la chiang ang chu. Engpawhnise, BJP hian India ram min la hruai leh thei tho mai, I.N.D.I.A tal hi han lungrual ṭha thei se la chuan thil a danglam thei tur.

Aw le, ka thupui (Caption) han hman hi thil kawng dangah ni lovin, Mizoram kohhrana kan Hmeichhiate dinhmun leh rawngbawlna aṭanga thlirna (tlang dang) aṭangin a ni a, chhiartute'n in lo hrethiam dawn nia. Han sawi dawn teh ang, Hmeichhe puala Parliament leh State Legislative Assembly-a Reservation seat siam thu hi a ni. India Parliament (BJP kaihhruai) sawrkar chuan, (a hma aṭanga thu awm pawh a lo ni mahna) 30 pc Seats? chu hmeichhiate tan Reservation a lo siam ta a.

Kum 2028-a MLA kan han thlan leh hunah chuan Reservation aṭangin hmeichhe MLA 13 zet kan nei tawh dawn ni awm tak a ni a, tuna kan hmeichhe MLA ni mekte hi an la tling leh vek a nih phei chuan, MLA 16 kan lo nei dawn tihna a ni.

Sawi tlang tawp ang, hetianga Sawrkar lam a inbuatsaih reng lai hian, kan Sakhaw lam roreltute rilru hi inrinsiak ngai chu a ni ta a ni. Kan rama kohhran pui ber hian Minister tur chu sawi loh, kohhran Upa atan hmeichhia an la ordain thei lo va. Chutih laiin kohhran ṭhenkhat chuan Upa ah hmeichhia an ordain thung a, nikum 2023 khan ABC inkhawmpuiah Baptist kohhran khan hmeichhe pathum lai upa atan an ordain a ni. Baptist kohhran hian Minister atan hmeichhe pakhat chu an lo ordain ve tawh a, mahse anni pawh hian a bak an la sawn thei lo chu a nih hi.

Mizoram kohhranah hian hmeichhiate hi an ṭangkai tih kan hre ṭheuh awm e, eng kohhran pawlah pawh an rawngbawlna hi a ṭha tak zet tih kan hre vek a ni, hetih lai hian Bialtu Pastor atan meuh chuan remchang kan la ti lo deuh a nih pawhin, Pastoral Ministry atan ni lo; an hnathawh leh inpekna aṭanga thlir pawhin Minister atana ordain ve awm tak tak kan nei nual awm e. Ram pawn lam aṭanga hmeichhe ordain te an lo awm a, chu'ngte chu kan pawm ve leh fu thoin a lang lawi si. Hma kan sawn zel ang a, tun aṭanga hun rei lutuk lovah chuan Mizoram Presbyterian, Baptist kohhran etc. aiawha ram pawna Palai kalte zingah Rev Pari te, Rev Mawii te kan nei ve tawh thuai turah ngai ang.

Tualchhung kohhranah pawh nula/nu fel tak tak kan neihte hi Rawngbawltuah te thlan ve awm tak, kan la inpuitlin lo chu a ni a. Kan Mizo hmeichhiate hi an felin an chhuanawm hle a, tuna kan khawpui ber dawttu, Lunglei DC pawh hi Zo nu a ni.

Aw le, ṭha kan tih em em loh leh ṭhenkhat phei chuan kan huat viau- BJP Party leh an Sawrkar aṭang hian, Bible keng zawk kohhran mite leh kohhran hruaitute hian zir tur kan nei a ni lo maw?