Miss hi kan thlang zing mah mah em?

Sap thufing-ah “Too much of anything is good for nothing” tih a awm a. Thil engpawh hi uchuak taka tih a nih chuan ṭangkaina a awm lo tih te pawhin a sawi theih awm e.

Eng vangin nge khawvel hian World Cup (Football) hi a ngaihhlut em em tih chuan, kum 4 dan chauha neih ṭhin a nih vangin; tih te pawhin a sawi theih awm e. Kum tin buatsaih ni ta se, tun ai hian a hlutna a bo ṭhen ngeiin a rinawm.

Heng kan Miss Mizoram te pawh hi a huaihawttu (organisers) te an fakawm rual rualin, an buatsaih zing mah mah deuh em aw tih theih a ni. Kan hnung lawkah Chapchar Kút Miss an thlang zo chiah bawk nen. Comedian search te pawh kum tin an nei ziah tho alawm, tiin tehkhin tawk an lo awm mai thei. He’ng (Comedian Search) te hi chu family show a ni a, kum tin khel lova an lo kalpui tawh a ni a, mipui pawhin an hlut a, chhungkaw tam takin an mamawh hlimna thlentu a ni.

Heng thil hman ṭangkaina lutuk awm lem lo kan buatsaih fo mai hian kan ṭhalaite-ah a ṭha lo lam zawngin nghawng a nei ang em tih hi ngaihtuah tel a ngai a ni. City bus chuan zak tawk leka lâr te hi awm theih deuh a nia. Tin, mahni in leh lo, chhûngte zahpui mai bakah, incheina thlengin an nih lohna pui anga lan tumin mi dawrah bâ an ngah phah sawt ang em? Chu mai bakah social media-ah insawiselna (troll/bully) a nasa tawh hle a, heng zawng zawng hi hmachhawnin an paltlang zo ang em? Khawvel mi larte-ah pawh social media a insawiselna tuar zo lova mahni intihlum ta tam tak sawi tur an awm a ni.

Miss thlan hi bànsan ang u kan ti a ni hauh lo. Amaherawhchu, kum 5 dan velah te hian thlan ni ta chauh ṭhin se, hei ai hian mipuite pawh hian kan hlut daih zawkin a rinawm. Keini ang State pachhia, châwmhlâwm leh leiba ngah lutukin a hetiang thil kan buatsaih nasa lutuk hi, insum deuh a ṭha lo maw aw? kan ti a ni zawk.

Kan Mizo pate zingah ngei pawh tûn hnaiah, tûn hma deuha pa ràwn leh mite chung en hial ṭhin, pa ngaihsânawm tak ni ṭhin te kha social media an hman nasat (active) lutuk avanga mipuiin eng atan maha an ngaih loh leh, fiamthu thawh nana an hman tàk mai mai (Hero to Zero-a rawn inthlak ta) hi an rawn awm chho ta nuk mai bawk a nih hi.

- Muanpuia Vanchhawng