Election result leh Keini Mizo Hmeichhiate

Zoram people Movement (ZPM) kaihhruai Sorkar thar Sorkarna hnuaia Mizoram Budget session hmasa ber chuan, mipui ngaihven a hlawhin Session zawh hnu thleng pawhin sawi zui a hlawh hle mai a, he budget session-a thilthar kan hmuh zingah hmeichhe MLA 3 lai an ṭhu ve te, hmeichhiain Mizoram rorelna sang ber an kaihruaite hi thil chhinchhiahtlak leh hriat reng a ni ngei ang.

Rorelna ṭha: Mizoram political history chhui letin, Kum 1972 (Union Territory) leh 1987 (State) kan inhlankai aṭangte leh 2023, 9th Assembly inthlan result aṭangte hian, Mizo hmeichhiate tan a bik takin politics khelmualah Mizoram tan thil inthlakthleng (change) ropui tak a thleng a, chu chuan hmeichhiate tan beiseina thar lawmawm tak a thlen a ni. Chile president Ms Michelle Bachelet thusawi, “Rorelna ṭha chu Democracy ah hmeichhiaten vote nei ringawt lova, hmeichhiate thlanchhuah an nihna hi a ni,” a tihte pawh rilruah a lang thar uaih uaih a, General Seat a hmeichhe thlanchhuah harsatzia hi inthlan kan neih tawhahte chiang takin kan lo hmu tawh ṭhin a, Inthlan hnuhnung berah erawh candidates 174 zinga 16 hmeichhia niin, chung zinga mi 3-te chu hneh taka thlan tlin an ni ta a nih kha. (ZPM aṭangin 2 leh MNF 1)

Rilru inthlakthlengna mak: He hun pawimawh takah hian candidate lamah chauh ni lovin, vote thlaktu (Voter) chungah pawh a lawmawm zawnga thil inthlakthleng kan hmu nual a, ani hi kan vote tlin chuan kan suangtuahna leh beiseinate tihpuitlin a ni thei ang tih rilru pua hmeichhiate chungah pawh rinna nghat ngam a, hmeichhiate chunga ngaihdan leh pawm dan thlak (mind-set change) tam tak mizo mipate zingah ngei pawh an lo awm ve ta a ni tih; an vote hlu tak an pek hreh lohna hian a tifiah a, hei hi keini hmeichhiate tan chuan kum rei tak kan lo nghah tawh leh beiseina thar min siamtu pawh a ni reng a ni.

Beiseina thar: He inthlan result hi Mizo hmeichhiate tan engtin nge beiseina thar min siamtu a nih a, hun lo kal zel turah engtin nge hmeichhiate dinhmun ṭha leh duhawm zawkah min hlankai ang? Kan hriat ṭheuh angin Mizoram hi mipa aia hmeichhia vote (voters) tam zawkna ram a ni a, Zoramah hian democracy a taka hmangtute leh politics pawh zalen taka khelhna ram (political emancipation) kan ni a. Tin, Political field ah chuan mipa leh hmeichhiate intluktlanna ram (gender equality) kan ni tiin a sawi theih ang. Chutih rualin tum sang tak neia politics khelhna ram ni reng chung hian, eng emaw tak kim lo hi a la awm niin a hriat a. Kan minister zahawm tak Pi Lalrinpuii’n election-interview an neiha a sawi, Mizote rilru puthmangah chuan mipate dah chungnungna ram (Patriarchal system) kan nih avangin hmeichhiate dah hniam zawkna a lian em em a ni, a tih kha a dikin a pawmawm hle a, ngaihtuah zui tham a tling.

Politics khawvel bikah ram dang aṭangin Mizoram dinhmun han thlir ta ila, politics-a hruaitu lawk tak takte hming kan hmu tam hle a, term 4(li) ngawt mai Bangladesh Prime Minister nihna chelhtu Sheikh Hasina te, West Bengal Chief Minister Mamata Benerjee te, Tamil Nadu Chief Minister kalchhuakta Dr Selvi Jayalalithaa te, Jammu Kashmir, Uttar Pradesh, Madhya Pradesh leh Rajasthan lamah te pawh hmeichhe hming lian tak tak hmuh tur an tam mai. Heng hmeichhiate hian dinhmun sang ber ber politics-ah an thleng thei a nih chuan, keini Mizo hmeichhiate pawh hian kan thleng ve thei a, kan invawrh ve thei a ni tih hria ila, State level mai ni loin ram bung khat khawvelin ram ropui tia a hriat, hruaitu ropui leh hlawhtling tak tak lo ni tawh - Indira Gandhi te, Benazir Bhutto, Margaret Thatcher, Angelo Merkel leh mi dangte hming pawh lamchhuah tur a awm nual mai. Heng hmeichhiate te hian khawvelin hmeichhiate chak lo leh nep zawk anga an lo ngaih ṭhinna tam tak hi a lo thlak danglam tawh reng a ni.

Zoram Politics leh Antonio Gramsci: Zoram politics han sawia ka rilrua awm reng chu Antonio Gramscia’n a lo sawi khawtlang nun inthlak (Social change) lo thlen nan chuan heng Civil Society leh Political group te hian mimal tin te ngaihdan leh, khawtlanga Unit hrang hrangtena zalen taka an ngaihdan an thawh a, chung an ngaihdan te chuan ngaih pawimawh a niha awmzia a neih hunah chauh a thleng ang a lo ti a. Gramsci chuan, mimal tinte zalenna, mipa emaw hmeichhiate tel ve theihna, NGO te leh Civil Society, heng mi thiam rual (Research Wing) tena an thiamna hmanga khawtlang ṭhatna tur atana an ngaihdan an thawh a, zalen taka an ngaituahna hman phalsak a nih hunah chauh DANGLAMNA TAK TAK (Real Change) chu a thleng ang a. Chumi thleng thei tur chuan kan Zoram politics (ZPM) kalphungah hian he Gramsci ngaihdan hian awmzia a nei chho hle ang tih a rin theih awm e.

ZPM leh Hmeichhiate : ZPM te kal phung thar hi Mizo mipui nawlpuite tan hmasawnna thar ni mai lovin, Mizo hmeichhiate tan hian a hluin a bik takin hmeichhiaten an chanvo chang thei tura kawng zau taka hawnsaktu, hmanraw pawimawh tak ani kan ti thei awm e. ZPM hian an Kal phung thar hi heng hmeichhiate tel lo hian a thleng theiin kei chuan ka ring lo. Kan khawtlang kalphung leh inkaihruaina hi politics leader leh kan lehkhathiam rual leh hmang hriate (Elite Group) kaihhruaina hnuaia awm a ni a. Chief Minister zahawm tak Pu Lalduhoma leh a thawhpuite hian kan ram tan a ṭha zawnga danglamna an thlen hi Mizo mipuite leh keini, a bik takin hmeichhiate hian ka beisei tlat a, ṭawngkam thlum leh thuchah ropui sawia danglamna mai ni lo, mi taima leh thil ti tak taktute tana danglamna bakah, mi hnuaihnung berte thleng phak danglamna an thlen ngei hi kan beisei a ni.

ZPM Party hian Mizo Hmeichhia te chawikanna leh an hamṭhatna tur kawngah hian hma la se la, kan khawtlang kal phung hi han en ila, in chhung khurah leh khawtlang nunah hian Mizo hmeichhiate hian tun aia dinhmun ṭha hi kan mamawh niin a lang. Mi tam zawkte ngaihdanah chuan, pawnlam lang thei chinah Mizo hmeichhhiate tan empowerment a ṭul em ni? tih zawhna nei kan awm ang, mahse mipate thuneih zawkna (Patriarchal) hnuaia awm kan nih miau avangin, kan in chhungkhur tam zawkah hmeichhiate hi thutlukna tawp siamtu (decision maker) nih kawngahte, tun thlenga mipa leh hmeichhe inrawlhna a awm tia ngaihdan nghet tak nei; kan khawtlanga kan la awmte hian hmeichhe dinhmun dik tak a tilang chiang a ni.

Pasalte rui thle mai mai, in chhungkhura ṭangkaina nei si lo, nupui-fanaute tana ṭihbaiawm si hi kan Zoramah ngei pawh chhungkaw tam tak an la awm. Heng avanga kan Mizo hmeichhiate a ruka ṭap rum tlawk tlawk an tam a nia. Hengte tan tak hian a nia rorelna dik kan mamawh ni. Beiseina lian tak ka neihna chhan pawh, kan MLA te zingah hmeichhe pathum (3) ngawt an awm vang hi a ni. Kan Mizo hmeichhiate tana khawvel eng kan hmuh theih nana kawng min hawnsaktu an nih ngei theih nan, nghakhlel takin kan lo thlir zel e.(Phek 7-ah zawm a ni)

- Rosy Ralte