LAL DAVID-AN, "KA TLEIRAWL LAI..." A TI (Zo ṭawng thumal chungchang)

Tleirawl: 'Tleirawl' leh 'rawlthar' (rawlthar tiha a syllable hmasa tawi hata lam tur) hi Vanglaini Chanchinbu, Thu Leh Hla, adt-ah te khel a lo ni tawh ṭhin a, tunah chuan khel ngai tawh lovin hmanlai aṭanga hman dan pangngai, mipa leh hmeichhia sawi kawpna a nihna kha hman dan a la ni reng (well-established) tih hi pawm tlan a ni ta a, sawi zui ngai a awm ta lo. Hmasawnna chi khat a ni a, tun ṭumah hian la chiang lo kan awm takin tawi têin kan han sawi leh hrim hrim a ni.

Bible-a thu mal 'Tleirawl' lo lanna pathum chauh lo tar lang ila :– "Ka tleirawl lai sualna hre reng suh ang che... Sam 25.7; "Ka tleirawl tirh ata bawiha siam ka ni..." Zak.23.5; "Ka tleirawl tirh ata Lalpa chu ka ṭih ṭhin si a..." 1 Lalte 18.12.

Henga 'tleirawl' tia lehlin hi a Sap ṭawng Bible ṭha leh lar zawng zawngah chuan 'youth' tih a ni. (KJV/NKJV, RSV,NRSV,ESV,NIV).

'Youth' tih hi J.F.Laldailova Dictionary-ah chuan 'naupan lai, rawlthar, tleirawl, ṭhalai' tiin a lo dah a, hei hian he thu mal 'youth' awmze dik tak a let chhuak a; 'tleirawl' tih hi 'hmeichhe naupang lo nula ṭan, mipa naupang lo tlangval ṭan, nulat tlangval lo hre ṭan, adt, tiin Upa Remkunga Mizo ṭawng Dictionary ah dah a ni a; hei hi a chiang khawp mai bawm. Tin, 'Youth', adt tiin J.T.'s The Concise Learner's Dictionary of Mizo-ah dah a ni bawk. Dictionary danga an dah dan pawh hetiang zawng hi a nih deuh vek avangin thu ziah a thui lutuk loh nan tilang lo mai ila; kan Bible-a 'tleirawl' an lo hman dan hi a rem (appropriate) hle a, ESV (Bible) lehlin mekah pawh hian chhunzawm zel theih ni se.

'Rawlthar' hi mipa bik sawina ni mah se, mipain mahni insawi nán, " Ka rawlthar lai chuan," adt tih ang hi hman a ni ngai lo; "Ka/Kan tleirawl lai chuan," adt hi an lo hmang ṭhin zawk a ni. Chutih laiin, Kohhran, YMA, MHIP, School pindan, zun in leh hmun dangah te mipa tan chauha luh/awmna kan siam duh a nih erawh chuan 'rawlthar' tia tar a, mipa leh hmeichhe awm kawpna Sikul emaw Biak in pindan angah te emaw chuan 'tleirawl' tia tar a rem leh thung ang chu.