Zoram Thar I Beisei Ang

Kan thupui tur hi kan hre hlawm tawh viauin ka ring.Mi tam tak rilruah chuan a ṭha zawng vakin a lang lo mai thei, kei pawh ka hmu tuihnai teh chiam lo a ni ber ang chu. Mahse, ngun taka han ngaihtuah vang vang chuan ṭawngkam ropui tak a ni tlat mai, a tlukpui ang hi awm thei chuang paw'n ka hre lo. Awle,sawrkar thar ka nei a, mahse, kumthar kan sawi ang deuh, a mihringte chu a ngai tho, keimahni Mizo pui, veng hrang hrang, khaw hrang hranga mite kha an ni ve mai. Nikum inthlan dawna an thutiam, an insawimawina, faknate kha an ti tak tak thei ang em? Keini lah chuan kan awih a, kan vote hlu tak hmangin kan sawrkartir ta chu a nia. A bul té hi ṭha takin han ṭan se la, zuih ral leh maite pawh a awlzia hria se la. Thawh tur an ngah lutuk, a bul aṭanga ṭan ṭhat leh a ngai, Mizoram sawrkar hi a rethei, account balance awm lo, awm lo mai pawh a ni lo, ba a awm ṭeuh. Mizoram tungding leh tura kan thlan chhuah leh mawhphurhna sang tak kan pek te, i chhunzawm zel dawn teh ang.

Eng Nge Kan Mamawh – Mizoram, Mizote hian eng nge kan mamawh, nakin lawkah Silchar kawng a ping leh ang a, kan buai leh char char dawn nia, karthum hnu velah phei chuan kan ṭam titih leh deuh mai ang. Oil leh gas-te hi chu intodelh ngaihna a awm lo, kan ramah laih chhuah tur a lo awm tak tak lo, rinthuin an lo sawi ve mai mai a ni e. Buh leh bal, thlai erawh kan intodelh thei, kan ramah thlai engkim a ṭha duh em em, kan loneitute dinhmun kan chawisan a ngai. Tichuan, miin lo neih chu hna ṭha tak, zahawm tih a lo hria ang a, kan uar ang a, kan intihhmuh sup sup mai dawn a ni.

Zirna lam hi han sawi leh ta ila, tun hma kha chuan 3rd., 2nd. class, 1st. class kha chu an awm mang ngai lo. Tun hnu erawh hi chuan college result, University result-te hi han en ta ila, 1st.class hi a vantlang, medalist-te pawh an awm nawk ṭhin a nih hi. PhD-te pawh hi an awm fer fur tawh mai. Mahse, heng tiṭha pui pui ho hi eng he hu an ni chuang lo, an ti ve tlat. Kan ram hian zirna quantity aiin quality a mamawh zawk, chuvang chuan, zirna kal phung ṭha lehzual kan mamawh.

Beisei Chi An Ni Em? – Zoram thar, Zoram intodelh siam tur hian beisei chi an ni ang em? A lang lama changkang thur thur, hnianghnar ni awm taka lan hi kan duh tawk leh mai ang tih a hlauhawm. Aw le, anmahni hi han bel chiang ta ila, a chhe berah khawkhat parawn chu an nih ṭheuh hlawm ka ring. Mi thatchhia, mawl chu tu mah an awm ka ring lo. Zoram mipuitena ngaihtuahna fim tak hmanga kan thlan chhuah te an ni, an mimal dinhmun ṭheuhte pawh pangngai tak an ni hlawm vek a ni. Mahse, lalna leh thuneihna kan han chan hnu hi chuan rei lo teah kan buai zo a, sum bawihah te kan lut thuai mai ṭhin.

Solomona meuh pawh kha a lo rei hnu chuan a Pathian, amah chawi liana finna petu kha a theihnghilh ve tlat mai a ni. Mahse, anni hi chu experience lo nei tawh, chutiang ang thilte lo hriaa zirchiang tawh an nih hmel hlawm.Engpawhnise, mihringte hi chu mihring kan ni, kan ngai reng hlei thei lo, danglam danglam ṭhin kan ni. Kum khat pawh a la tling lo va, chuvang chuan, beiseina sang tak nen i'n thlir phawt mai teh ang.

Ṭanrual A Pawimawh – Isua pawh kha ramhuai zawla an puh khan, engtin nge a tih kha. Setana pawh amah leh amah a indo chuan engtin nge a dinchhuah theih ang, a ti. Hei hi ramhuai a hnawhchhuah chungchanga a sawi kha a ni. Chhungkua pawh kan inngeih loh a, indo tlat chuan a tawpah inṭhendarhna a thleng nge nge ṭhin. An inlungrual a, ṭanrual ṭhap ṭhin erawh chuan rethei té pawh ni se, tu ma'n an do thei lo vang, awhawm tak an ni zawk dawn a ni.

Han sawi nawn leh ta ila, kan ram dinhmun chhiatzia, a chhunga chengte, neitute kan la inlungrual loh zui phei chuan tute tih dan takah emaw, kan chawh tawlh tawlh mai dawn a ni. Kan ṭanrual ṭhap erawh chuan kan ram hi kum rei lo teah, awhawm, intodelh, changkang takah kan siam thei dawn a ni. A nih leh engtin nge kan ṭanrual ang, kan ram hruaitute hi keimahni ang bawk, thlemna chi hrang hrangin a beih, tlu thei, chesual thei an ni. Chuvang chuan, an tan kohhran leh mimal tinte'n i dilsak fo ṭhin ang u. Mipui lamte pawh hian thil felhlel ang chiah te chuan i nawr, i nawr lo ṭhin ila. Insawipui ang chite pawh hi ngun taka kan ngaihtuah hmasak ṭhin a pawimawh hle mai.

Zoram thar chu eng nge ni? Kan duhthusam ram maw le. Chu chu eng nge ni han ti leh ta zel ila, a tawi zawngin -ei leh bara intodelh, sawrkar leiba nei lo, hausa neih, hnam hrisel tihte a ni thei awm e. Kan rilru hawi zawng, thlir dan, hriat dante pawh hi a dik chho ve tan tawh viau a, mahse, hmabak kan la ngah. No Parking, tih lo intar mah se, duty kan hmuh loh chuan zuai lawk, kan ti mai ṭhin, a ruka tih duhna, min hmuh loh chuan pawi chuang lo tura ngaihna ang chite hi kan la nei lian hle. Heng ang chite hi chu kohhran lama inzirtir chi a nih hmel a, mahse, ram hruaitute hian mawh an phur viau zawkin ka hria, kan ni tin mamawh kan laknate an nih avangin. Israel faten lal ṭha an neih chuan an hmelmate an chau tawlh tawlh ṭhin, lal ṭha lo an neih erawh chuan hnehin an awm a, an hrehawm hle ṭhin. Hetiang ang dinhmunah hian kan ding ve thei reng. Aw le, kan thlan lal takte eng ang mi nge an nih dawn le? Zoram thar, I beisei phawt mai teh ang.