KA HMAAH PI VÂNHLUPUII

Vânhlupuii hi tu nge a nih (?) sawi tam a ngai lo; Zofate’n kan hria. Mahse, sawi nawn a ṭûl leh ṭhîn. All India Radio top graded artiste, Mizote’na kan neih chhun liau liau chu Vâu Thla ni 30, 2024 (Inrinni/Sabbath) zanlai pelh dâr 12:50 khân Krista thawhlehna nî nghâkin min lo muthilhsan ta a nih kha!

Hrânghlui zâithiam mite ngaihsân rawn êm êm a ni a, tluk phâk rual loh ena an en a ni. Kei pawhin ka ngaisâng a, a zâi thiam ka ti a; aw ṭha nei tel a ni bawk a, eng hla pawh sa se, a thiam êm êm vek mai a ni. Chuti khawpa mi piang vânnei chu a ni a, ani ang hi Zofate zîngah an pian leh kher a va rinawm ta lo ve! A aw fâwn hlerh hlerh mai te kha bengah hian a châm reng tawh dâwn a

nih hi.

Sawi tûr tingin vawi khat chu a takah ka hmu ve zân asin. Mahse, kan la inbe lêm hlei lo va. Kum 2011, December ni 7 zânah All India Radio, Lunglei station chuan Saikuti Hall-ah music award an sem dâwn a; khatah khân Zoram zâithiam lâr ber berte’n zâiin kalkhâwmte min âwi a. Chumi programme-ah chuan Pi Vânhlupuii pawh award dawng tûrte zîngah a tel a; kei pawh ka nih ve tho avângin award dawng tûra ṭhutna an siam bîkah chuan kan ṭhu a, ka hmaah chiah hian a ni Pi Vânhlupuii leh H. Lalsailova (‘Phaizâwl lily’ tih hla satu)-te an lo ṭhut ve ni. Kha kha kan inhmuh hmasak ber leh hnuhnûn ber chu a ni ta mai a; a zâi erawh TV/radio leh youtube lamah te ka ngaithla fo ṭhîn. A hla sak zînga ka hla duh ber chu, Pu C. Lalkhawliana hla phuah ‘Ṭhuva awmhar’ tih kha a ni a; tûnlai ṭawngkam takin, a âw zawng zawng nên hian ama sak tûr rênga mâwi niin ka hria.

Heti teh thuta min kalsan ta mai hi hrilh a haiin sawi tûr a vâng ngei mai. An sawi Vânhlupuii a han thi zet zawng, kâwl pawh a êng thei lo. Khua a dur khûi a, thli a thaw vûk vûk a, chung lamah muvanlai a kaw-kaw-lêk hlarh hlarh reng a; engkim mai chuan Vânhlupuii an sûn ni hian ka hria a.

He nî hi an kohhran tân LALPA CHAWLH NI (Sabbath) a ni a; kohhran dangte’n Good Friday programme an la hman zawh loh avângin ruai te an ṭheh a, kan tualchhûng kohhran pawhin ruai buatsaihin nilêngin awm nî kan kham ve a; mahse, kei zawng, ruai ṭheh thâ a va tho lo êm! Chaw ka han bâr a, ṭhial ka han tum sateh a, ka khâ a chih tlat mai a nih chu. Mualpho lo tâwk chauhvin ka eiin ka hria. Engtin nge ka awm zêl ka hre zui ta lo. Ka ngaihtuahna a hnîm êm êm a, mal ta riauva inhriatna te ka nei hial a; hetia, kan mi ropui leh hlu tak takte’n min ṭilhsan zêl zawngin khawvêl hian hlutna a va hloh hnem sâwt dâwn êm! Anmahni avâng chauhva khawvêl hi ngaihhlutawm a ni si a, tih te ka rilruah chuan a lo lang a.

Chutia ka ngaihtuahna vâk vêl ka kawm melh melh lai chuan thu thinṭhâwng tak bawk chuan mi a rawn dêng leh ta! ‘B’ Grade All India Radio artiste, hrânghlui zâithiam R. Kâwlthanmâwii (54) thih thu kan han hre leh zêl a nih chu! A va mak mawlh mawlh êm! Ni khat thil thûah kan zâithiam pahnih ngawt han chân mai chu a nihin a ni zozai lo asin le! Heti êm êm hian thihna hi mihringte lakah a lo inlulin mai le? Mahse, he mite pahnih hi chuan, kan hriat thiam phâk rual loh thihna ngei pawh a thihna hmun pan tûrin an lo inpeih diam tawh a lo ni reng si! An chungah hian thihna pawh a inluling ngam tawh bîk hlek lo vang le.

Inkhâwmpui ṭiak tawh ngai lohnaah chuan hlim takin lêng tawh nâng che u. Mangṭha ngawih ngawih u le.