ISSUE BASE M.P. HI ENG NGE A AWMZIA?

Issue base MP neih hi tunhnai lawka kan hriat thar a ni. Tun hma khan he thu hi kan hre ngai lo khawp. A sawi chhuaktu chu kan CM kalta kha a ni awm e.

Sap ṭawnga sawi hian a thu hi a mawi deuh a, Mizo ṭawnga sawi dawn chuan, "A thu azir..." tihna a ni mai awm e. Tuna kan hriat larna chhan hi chu, Parliament rorelnaa MP kan neihte dinhmun sawina a ni. Issue base a nih chuan, India ram rorelna hmunah kan MP chu ṭan lam nei lo a ni, tihna a ni. Chumi awmzia chu, kan MP neitu political party chuan politics-ah Policy mumal a nei lo tihna a ni bawk.

Tunah hian Political party, Congress, MNF, ZPM, BJP leh PC te kan nei a. MP thlan a lo hun a, Candidate neih a lo ṭul ta a. Congress leh BJP leh PC party chuan Zoram mai ni lo, India ram pum huap pawhin ram hruai dan leh hmathlir (policy) mumal tak an nei a, chutihlaiin MNF leh ZPM chuan nei loin, Issue base chu an policy a ni.

Issue base Policy hi ṭhatna ai mahin, buaina thlen theihnaa a tam zawkin a lang. A chhan chu, Laiking leh Bak policy ang a nih vang a ni. A lo lan chhuahna chhan pawh, MNF ten, Central lam leh Zoramah thu inang lo an hmatheh a; khu lamah BJP lamṭang kan ni an ti a, he lamah BJP an ṭan ngam leh si lo. Chungleng leh hnuaileng indo laia Bak ang mai an ni.

Tuna an Lok Sabha MP-in 2019 Inthlanpui laia sawi anga a awm lo khan Issue base chu CAA Bill-ah tifiah tain, vote a zawn laia a campaign hla chu a phatsan a, issue base (duhlam lam vote thei) a nih miau avangin Mizote vote chhan lo zawngin India ram rorelna in sang berah a vote ta hlauh zawk a, chu chu 2023 inthlanpuiah mipuite'n an hria a, a awmna party pawhin a tuar ta hlauh zawk a ni lo'm ni? Delhi mai ni lo, khawvel hriatah BJP te nen an lungrual a, an vote hmuhna ber Mizoramah, BJP an phatsan leh thung si a ni lo'm ni? Chuti ni lo se, Mizoram BJP candidate Vanlalhmuaka hi an thlawp mai tur a ni

ang chu!

ZPM pawh an báng chuang lo. An lum leh lum se la, an vawh leh vawt se la a va ṭha em.

Tun inthlanpui lo awm tur hian keini Zoram chauh hi a nghawng dawn lo. Kan vote khatte khan India ram pumpui a nghawng dawn. Chuti ang bawkin, Maharstra leh West Bengal-a vote hnih khat lek pawh khan keini hi min nghawng vek dawn a, MLA thlan anga kan State bil enkawl tur a ni lo. Chuvangin, India ram pum enin, BJP leh a thawhpui NDA policy nge ṭha, Congress leh a thawhpui I.N.D.I.A. tih hi chinchang hria chuan buk a, duh thlan mai tur a ni.

Zofate hian kan hriat reng, India ram kal zel dan turah hian tuilairap loin, fel takin kan duh leh duh loh i tichiang teh ang u.