Mipuite hlauh Ngaizel khâm; Chief Minister leh DM&R Minister in an chinfel theih ka ring!

August ni 17, 2010 - February ni 23, 2024 inkarah hian, Ngaizel khâma lung tla avanga in leh lirthei a tihchhiah leh thihna hial a thlen hi a tam ta hle a, Mizoram University lama thawktuten an chhinchhiah dan chuan hemi hun chhung hian ṭum 23 zet chhiatna a thleng a, a hnuhnung ber chu February ni 23, 2024 a CCTV footage a kan hmuh, lungin City Bus a den leh Bike khalhtu a tlu lai kha a ni. He khâm aṭanga lung tla hi lirthei khalhtu ten an hlauthawng reng a. Sorkar hotu liante an chet tak tak a hun tawh a, beisei a sang hle a, Chief Minister Pu Lalduhoma leh DM&R Minister Pu K. Sapdanga te hian mipuite ralṭia siam rengtu hi a chinfel dan nghet an hriat ka ring! An chungah rinna ka nghat e.

Ngaizel khâm phei hi metre 800 vela thui a ni a, furah emaw, ṭhal lai emaw pawh ni se, lirtheia tlan leh kea kalte tana hlauhawm khawpin lung a tla fo a, lung tlâk dan en hmasa teh ang : Kum 2010 leh 2011-ah ṭum khat, kum 2015, 2016, 2017-ah ṭhm khat, kum 2018-ah ṭum hnih, kum 2019-ah ṭum li, kum 2020-ah ṭum thum, kum 2021-ah ṭum hnih, kum 2022-ah ṭum thum, kum 2023-ah ṭum khat leh kum 2024 Feb ni 23 ah ṭum khat chhiatna a thleng leh tawh a ni (source - Dr Laldinpuia, MZU)

Heti taka chhiatna thlen zing a nih avanga lirtheia a hnuaia tlan tlang pawh kan ṭih rûk deuh ṭhup reng a nih avâng hian, tunhnai March ni 11, 2024 khan, he khâm lo zir chiang tawhtu Mizoram University, Centre for Disaster Management Department hotute, Geology & Mining lama thiamte leh he department a lo thawk tawhte leh PWD a thawktute nen a hmunah kan tlawh a, ngaihven a ṭul hle. Mithiamte nena kan tlawhna hi ZONET TV pvt ltd-ah pawh kan tichhuak a, Youtube-ah pawh kan dah chhuak tawh a, mipuite pawhin an ngaihven hlein ka hria. Lung tla mai thei tur te, khi deuh ṭem ṭuamte thlengin chiang takin hmuh tur a awm a ni. A zir chiangtu MZU lam hian, khâm phei pumpui hi block 7-ah an ṭhen a, block khat tê têa lung awm dan, inrem dan, a hlauhawm zual lai block te nen ṭhenin, khâma tui lo luang thla, lung kara tui putte thlengin hmuh theihin a awm a, Geologist ṭhenkhat phei chuan, hmun ṭhenkhata lung awmdan phei chu, hmalak ran ngai zual tiin an sawi nghe nghe a ni.

Ngaizel khâm hi, tunhma pawhin hmalakna a lo awm tawh ṭhin a, chutih rualin vawiin thlengin hlauhawm takin lung a la tla zel a. PWD hotute sawi dan chuan, tunhma atangin Chief Minister emaw, Cabinet level aṭang emawa hmalakna lian tham tak tak hi an la hre ngai lo tih a ni a. Heti khawpa lirthei veivak tamna ni si, lung tlak hlauhawm taka kan dah reng hi a mak angreng hle a, tunhma khan tihngaihna kan lo la hre ngai lo nge tihte pawh zawhna a piang lo thei lo a. Central lamte nen ṭangho a, sum leh pai pawh vaibelchhe tel seng a, mipui tana him zâwka siam dan kawng zawn hi, sorkar thara kan hotute tan chona lian tak niin ka hria a. Mipui hian an chungah pawh rinna kan nghat nasa hle a, kawng an zawn kan beisei tlat a ni.

Mizoram University Centre for Disaster Management Department a mithiamten a chinfel dan tura rawtna an neih hi tarlang ila, hmalakna zelna atan pawh a ṭangkai beisei ila. A leilung hawi dan te, inzawmna lai kar awl leh lung chan dan te, a awi dan ruangam azirte in lung tla venna tur hi chi hrang hrang a awm thei.

1) Lung ném leh chak lo laite chu steel meshing hmanga tuam a, cement a char ngaite a ni a.

2) Lung tla tur lo dang thei tur, zu then fai theihna/zu tlawh pawh theihna hmunah rock fencing siam a ngai.

3) Lung poh dan him lo, thel thlak leh, hmun ṭhenkhat phei chu a thiam bík te ruai leh fimkhur taka hal thlak ngai te; hei hian lung tla thei tur lak bo a huam ang.

4) Kham awi, lung kara tui lut titlem turin, hmun hma awm thei laia tuiluankawr siam; tui tai pût awm thei chi reng reng tihbo tum tur a ni.

5) A theih anga zauin, kawngpui dungah tuiluankawr siam; lirthei accident ven thawnna leh lung tla sawt tur venna ni pahfawmin a dalna siam tel. Lung tla sawt tur vennna, dalna (parapet) ṭha tak siam telte a ni.

Ngaizel khâmn chungchang hi, kum 2016 khan Study Team pawh din a lo ni tawh a, hmalak zuina a awm lutuk lo nia hriat a ni a. Kum 2020-ah khan, E-in-C conference Hall ah sawihona neih a lo ni tawh bawk a. Heng lo pawh hi sorkar kal tawhte khan hmalakna sawi tur dang pawh an neiin a rinawm. Hetiang lama mithiam bik hi Mizote zingah pawh an awm mek zel a, ni tin mipui heti zat kal rengte tana a him loh dan te, nunna chân an awm tawh dan leh lirthei leh in leh loin a chhiatpui dânte leh mipui sang tam tak rilru turte ngaihtuah hian, tunhmaa hmalakna aia nasa zawk leh lian zâwk nenm heti reng lo hian ngaihtuahna thar nen hmalak dan kawng zawn a ṭul hle.

Kan sorkara kan hotupa ber Chief Minister leh DM&R Minister hian ngaihtuahna han seng nasa lehzual se, ni 100 sorkar hnuaia an hmalakna tam tak enin, an lakah beiseina a sâng hle a, mipui tana him zâwk, damdawiin lian ZMC panna a ni bawk nen, kawng ṭha zâwk leh him zâwk an zawn theih rinna a lian hle. An chungah rinna ka nghat ngam e.