District thar pathumte

Khatia Dr. R. Lalthangliana leh Pu R. Tlanghmingthanga te MNF Elected OB aṭanga an paih thlak hnua Department dang sum audit ni si lova, Dr. R. Lalthangliana Department chan Health Department sum chauh audit a nih lai vel khan District pathum pek chungchang hi ka rilruah a lo awm daih mai a. MNF Sorkarten nikum lawka phur tak maia Saitual, Khawzawl leh Hnahthial te District puitling atana an puang rup mai kha, mipui lam aṭanga sawiselna leh dodalna a awm ang chu tia ring fan iak iaka chanchinbu lam ka lo bih pawhin han sawi zuina hmuh tur a awm lem lo a. Chuvangin, District pek chungchang hi han tuihnih ve ta ila a ṭha awm e. 

Kum 2011 chhiarpuiah Mizoramah mihring 10,97,206 kan awm a, kumin 2020 ah hian nuai 12-13 vel kan awm tawh turah ngai ila. Mihring kan tamin khua a tam tawh si a, Sorkarin min enkawl zo tawh lo, ti ta ila, Mizoramah District 8 leh RD Block 26 lai kan nei. A mihring zata chhutin RD Block khatah pawh mihring kan la tam lem lo. District 8 leh RD Block 26 te hian Mizoram mipuite hi min la enkawl zo rih niin a lang. Kan kawmthlang lawka Karimganj District-ah ringawt pawh khuan mihring hi a nuai tel fe an awm.

Mahni khua hi tute pawn hmasawn tur leh changkang turin kan duh a, a khaw lian zual deuh deuh hian district thar neih duhin sorkar nawr ta zel ila a fuh ang em? Kan sorkar sum leh pai hian a tlin ang em, tih erawh kan ngaihtuah a ngai. 

VC electoral roll revision hnu­hnung bera a lan danin Saitual district pum puiah voters 37,617 awmin Khawzawl district-ah voters 25,764 an awm a, Hnahthial district-ah hian voters 20,611 chauh an awm. Voters sing hnih chuang awmna hi Aizawl district chhung MLA bial 8 ah a awm. Tuichawng bialah phei chuan voters sing thum chuang an awm a. Hetih laia MLA Constituency pakhata mihring zat vel lek awmna a district kan han pe ringawt mai hi chu a zahthlak tak zetin ka hria. 

Kum 10 chuang teh meuh thiam thil chi hrang hrang leh nawrhna hmanga District sual chhuaktute ka lawmpui. Chutih rualin cheng nuai 150 leka district inenkawl tura an han ti ngawt mai hi chu district a pumpa ve reng ruang tan chuan a beitham lutuk lo maw? 

Lunglei HPC Budget-ah pawh cheng nuai 926.35 an dah sak laia District pathum tan nuai 450 chauh an dahsak leh si hi kan rorel dan hi a chhuanmang rorel tlatin ka hria. Tin, Hnahthial hi District thar an nih tak avangin Lunglei High Power Committee sum hi Hnahthial lama hman theih a nih hmel tawh bawk si loh a, siam rem ngai chu a awm a ni. 

District hian cheng nuai 150 bakah DC leh SP chauh a kalpui tur a ni lova, department zawng zawng a theih loh pawhin a pawimawh zual tal hi chu a keng tel tur a ni. Hemi kan sawi chhan chu tuna district pek thar pathuma mipuite eizawnna hi a tam zawk chu kuthnathawh ala nih tlat vang a ni a. Tuna district tharah te hian District Agriculture Office leh District Horticulture Office te tal a awm loh chuan kuthnathawktute tan harsatna lian tak a awm thei. District thara kuthnathawktute hian kuthnathawktute ṭanpuina tur ang chi hi khawi Office aṭangin nge an dawn ve dawn? Khawi aṭangin nge thlai chi an dawn ve ang, fertilizer, tui pipe leh thil dangte pawh. 

Saitual district pa hian Aizawla Agriculture Office a mi rawn dil ve ngawt ta se, Aizawl District hnuaia mi an nih tawh si loh avangin chan tur a nei tawh lo. Chutiang chiahin Khawzawl pa hian Champhai pa dawn ai a han dawng thiang tawh lo. An mamawh lo an ni lo, an district tan lakna tur Office an neih loh vang a ni. 

Kut hnathawktute an thlai siamah eng emaw vanduaina a thleng thei, ṭanpui turin khawia mi nge Officer leh mithiam an rawn tak ang, district thar hi hmasawnna tur emaw an tih lai hian a bikin kuthnathawktute tan hnufualna a thlen thei. 

Ngun taka ka ngaihtuah hian heng district pathum te pek an nihna chhan hi hmasawnna duh tak tak vanga sorkar lamin pe an ni thei hian ka hre lo. MLA a tlin tuma tiam leh pe mai mai chauh a ni tih hi a lang chiang viauin ka hria. A chhan chu, district ramri (demarcation) pawh rin fel hmasa hauh lohin a kutdawh buhhum pek tawp a ni ber a. District pek fel vek thawh hnuah district ramri rin fel a nih dawn pawhin khaw tam takin district thara beh ai chuan an awmna sa district a beh an duh a, sorkar lamin rorelna kengkawh duh lovin an awm duhna district tur mipui an han thlan tir ta vel mai mai a, hei hian hmasawnna tura district an pek lohzia leh an vote chiah duh vanga pe an nihzia a tarlang chiang hle a, chu chuan Mizoram sorkar sum leh pai harsatna ala thlen dawn khawp. A tuartu tur chu mipuite tho kan ni. 

Kan district tharte hi cheng nuai 150, DC leh SP ringawtah an lungawi reng dawn chuang lo. District hi a nihna ang taka function tur chuan Department in office sak nan ram a lei a ngai, office sak a ngai, a thawktu tur lak a ngai, heng zawng zawnga Mizoram sum luangral tur hi a va uiawm em! Employment generate-na atan a ṭha alawm lo ti suh, Sorkar hnathawh hi employment generate-na atana hman chi a ni lo; Sorkar hnathawk tamna ram apiang an economy a chhia. Kum 2015 a Greece ram economy tlakchhiatna bul kan hre vek, sawi tam a ngai lo, district thar petute hi he kan ramah hian chen rei an tum tawh lo em ni aw, ka ti hial a ni.

Mizoram map hi han thlir ila, hmar tlangdungah khaw lian tak, khawhar taka awm kan hmu ang, chu chu Darlawn a ni. A chhehvelah khaw hrang hrang tam tak an inzar pharh a, Darlawn khua hian thiltihtheihna te, ropuina te an nei hran lo chungin a chhehvel khaw tam tak awp khawmtu niin a chhehvel khuate hian pa anga an en a ni. Kan hotute hian Mizorama hmasawnna rualkhai taka kal thei tura an duh chuan tuna district thar 3 te ai hian Darlawn hi district pe ta zawk se, kei chuan a awm khawpin ka hria. 

Aizawl leh Champhai inkarah khaw pasarih vel chauh a awm chungin district headquaters a intlar chho tih theih a ni a. Heng te ai hian hmar thimpui ti eng turin Darlawn hi District thuam famkim dik tak nena kan thuam hi a pawimawhin hmasawnna pawh rualkhai taka a kal theih zawk a rinawm.