MSSC-in kum 40 a tling ta
Mihringte hi kum 40 kan tlin chuan mi puitling, nih tur ang ni famkim tawh kan ni deuh vek an ti. Sports-ah pawh hei hi a dik hle tura ngaih a ni a, mahse mihringte anga than tawp awm lo, hmasawn zel tur a ni ve thung.
Mizote sports lama hma kan sawn nasat zia hi hmutu leh hretute vek kan ni awm e. Talent kan nei tha tih hi phat rual a ni lova, India ram huap emaw, khawvel huapa kan inphochhuah leh hma kan sawn theihna tur erawh chuan mahni mai emaw, pawl ang ngawta kalpui theih a ni tawh si lova, sawrkar anga chet a ngai tawh thin.
Kum 40 kal ta, April 20, 1976 khan Mizoram State Sports Council chu din a lo ni tawh a, Ruby Jubilee lawmna hial buatsaih a lo ni dawn ta. Khatih hunlai khan tun angin Mizoten infiamna chi hrang kan la ngah lova, kan tuipui leh luhchilh langsar te chu Football leh Hockey an ni mai a, Mizo infiamna thenkhat - inchai leh thil dang dang bakah athletics lam pawh ti pawl an awm ve bawk.
Mizoram Sports chanchin tih lehkhabu Pu Zoliana Royte ziahah chuan Dr. GN Chatterjee, Tripura atanga Mizoram sawrkarin a chahchhuah, hetih hunlaia Education & Social Welfare Department Secretary & Director nikawp chuan Tripura sawrkara a lo thawhpui Capt.Zolura chu kum 1973 khan chahchhuakin Special Officer, Youth Welfare, Scouts & Guides nihna a pe a. Capt.Zolura hian Education Department chhungah Sports ruangam din chhovin Tripura lama Sports Council an din dante entawnin Sports Council Body chu sawrkarah din turin a rawt a, kum 1976-ah tihpuiltin a ni ta a ni tiin a tarlang. Heng te hi hruaitu te chu an ni.
1976-a Adhoc body a nih atanga 1983 thlengin Office Bearers leh Executive Committee member-te sawrkarin a ruat thin a, 1983-ah constitution siam that a nih tak avangin Office Bearers thlan an ni ta a. Inkaihhruaina ang chuan President chu Sports Minister apiangin an chelh ang a, Secretary erawh sawrkar ruat a ni thung ang. Vice President, Joint Secretary leh Treasurer te thlan tur an ni a, kum 2002-ah Treasurer hming tidanglamin Financial Secretary tih a ni ta a, sawrkar ruat tura tih a ni ta bawk.
Tuna Mizoram State Sports Council-a Office Bearers ni mekte:-
President - Pu Zodintluanga
Vice President - Pu John Kima
Secretary - Pu C.Laltlanthanga
Jt.Secretary - Pu Lalrinfela
MSSC hian Upper Khatla, Aizawlah Office nei mekin Head of Department chu Secretary a ni a, Sports & Youth Services Department hnuaia awm siin thuneihna hrang leh inrelbawlna hrang nei a ni. Secretary kaihhruaina hnuaiah Sports Promotion Officer, Administrative Officer, Accounts Officer, Assistant Engineer,Sports Doctor leh Project Officer te an awm a, tunah hian Staff pawh 100 vel zet an tling tawh a ni.
1976 atanga 2016 kum 40 chhungin Mizoram sports chuan a hnuai a ziahlan ang hian medal, competition hrang hrangah an la tawh ani.
MSSC hian Sports Association chauh a enkawl lova, ram chhunga Sports hmun-hma (Infrustructure) siam leh enkawl zawng zawng thlengin a hma vek a, Mizoram Sports hmasawnna tura thawktu pui ber a ni tak avangin an office pawh Infiammite inpui tih a ni mek tawh a. Ram pawna infiammite fehchhuak tur a buaipui a, an lo haw pawh hmuakin lawmpuina hun a hmang zel a, hetiang khawpa thawhhlawk leh ramin a tangkaipui ta hi a hun lai khan a dintuten an ngaihtuah phak ang em? tih mai awl tur a ni ta. Heti khawpa Mizoramin sports lama hma kan sawnna chhan pawh hi MSSC vang a tih theih a, ram mipuite pawhin a hlut zia leh tangkai zia te kan hre chho tawlh tawlh niin a lang bawk.
MSSC Ruby Jubilee chibai le.
1. President - Minister i/c Education
(Pu H. Thansanga)
2. Vice President - Pu Lal Thanhawla
3. Secretary - Capt. Zolura,
Special Officer for Scouts & Guides
& Youth Welfare Activities
4. Treasurer - Pu J. Lalduhawma,
State Social Education Officer
5. Members - 1) Pu Hranthanga,
Dy. Director of Education
2) Pu L. Pachhunga, ADC
3) Pu S.H.Pautu,
Lecturer, P.M. College
4) Pu C. Khenglawt, DSP
5) Pu K.L. Rochama, MLA
6) Pu R. Rozika,
Addl. Secretary, Finance
- Brian Hauhnar