A hremna lam zawk hi...

Mizo zinga thil sawi hlawh ber pawl leh kan sawiho nasat ber pawl chu zu chungchang hi a ni hial awm e! Chanchinbu phekte hi a luah zing tawh tak tak a nia. Social media lamahte hian thil dang kan sawiho rei peih lo, zu erawh chu kan sawi tawp hleithei lo.

Mizote hian zu hi kan lo buaipui ber mai awm mang e aw, ka ti rum rum! A hmei a pa hian kan sawi luih luih reng mai a. A in duh lote hlei hlei hi a sawi peih kan ni hial awm e. He khawvela Isua a rawn kal ve hma aṭang tawha khawvel lo luah ve tawhtu a nih vangte pawh a ni mahna. Keini lah chuan, chuti khawpa thil awm rei tawh chu tihrem kan lo tum titih lehnghal!

Bible tih lohah chuan zu hian dotu leh tihrem tumtu a ngah ber hialin ka ring! Bible ang bawkin tirem theitu chu kan la awm lo a nih hmel e, mihring khawsakna tawh phawtah chuan a awm zel mai niin a lang.

Kan sawrkar meuh pawhin tihrem theih a ni ngang lo tih pawmin, khapburna dan (MLTP Act) hlipin, khuah-khirhna dan (zawrh phalna - MLPC Act) min hmanpui ta ringawt chu a nia. Duh lovin pawm thiam lo eng ang mah ila, kan rama rorelna lu berin a passed miau si a. Hmang lo thei lo kan nih tak si-ah chuan, dan ang taka hma lak nachang kan hriat ve mai a ṭha ang.

Dan ang thlapa zu zawrh phalna nei thlapte chunga duh lohna lantira huaibak bùk bùk lo hian, zu rui buai leh vantlang hmuha zu in chingte chungah hian dan ang thlapin hma la zawk mai ila, kan hlawkpui zawk ngeiin a rinawm.

MLPC Act 2014 Section 42-ah te, Mizoram Police Act 2011 Section 140 hnuaiah chuan, khawlai leh puipunna hmuna zu in te, rui chunga motor khalh te, buaina siam leh mi dang tana hnawksaka awmte a khap tlat a ni. Heti anga awm an àwm chuan, MLPC Act 2014 Section 43-na hmangin hrem theih an ni a, thla khat ai tlem lo, kum hnih thleng lung in tantir emaw Rs 1000 ai tlem lo, Rs 5000 thleng chawitir te, vantlang hna thawk tur te’n hrem theih an ni.

Zu zuar leh phalna petute dem mai lo hian, kan veng chhunga zurui buaite leh vantlang hmuna zu in chingte chu heng dan hmangte hian hrem ngam zel ila kan sawtpui zawk ngei ang. Kan khawlai leh vantlang inthiarna hmunte tih faitir hmiah hmiah ila, thianghlimna kawngah pawh kan hlawkpui zawk khawp ang chu.

Tun hnaiah mitthi lumenna leh punkhawmna hmuna zu rui chunga buaina siam te leh, nunau tana khawlai len ṭhat ngam loh khawpa zu rui an zalen tak thute sawi a tam leh ta viau mai. Heng harsatnate hi zu zawrh phal a nih tak avanga punlun ta hluai ni-ah kan ngai a, dikna chen pawh a nei ngei ang. Mahse, dan ang taka hma la peih kan awm mang loh vang a ni ve pakhat.

Ṭhenawm aia khaw sarih do thlang zawk hnam kan nih vang nge ni, miin thil dik lo an ti tih kan hriat leh kan hmuh ngei pawh kan sawi chhuak duh lo a, dan anga hremna pekte kan duh tlat lo ṭhin. Hei vang hian kan ramah sual a huangtau a, dikna chu kil khatah hnawl tawm a ni fo. Bible-in, ‘Thil ṭha tih tur hria a ti si lo chu a tan sual a ni,’ a tihte hi hre reng ang u; Kristian kan nih kha maw.

Kan vai hian dan lekkawhtu ka ni thei tih hre thar leh ila, kan khawtlang nun a lo zalen a, a nawm lehzual theih nan kan tih ngei pawh a ṭul hle a ni tih hre thar leh ang u. Kan dan bute pawh hi zir chiang peih ila, inzirtir nasa lehzual ila a ṭha khawp mai.

MLPC Act 2014-ah pawh hian, zu rui buaite kan man ve theih dan leh hremna lekkawhtu kan nih ve theih dan a inziak an ti a ni lawm ni? Chungte pawh chu chawi vawng nachang hre ta ila, kan hlawkpui viau ang mawle.

Social media leh khawilai titi khawmna hmuna sawi chiam zel ringawt lo hian, hma latu kan nih ngam a ṭul tak zet a ni.

Tin, zu dawr hawngtute’n an zu zawrhte hi a hrisel em tihte chik peih ila (zu hrisel leh ṭha tak chu a awm tak tak thei lo maithei), a ṭul chuan thuneitute hnena report te hi hreh lo i la. Zu zuarte pawh hian thil sual ti angah inngai lem lo se, dan ang thlapin dik takin tih tum ve se. Zu an zuar ta sa sa, zu ngawl vei leh in lo thei lo nia inhriate tan hian zu
ṭha zawk leh hrisel zawk chhawp chhuah sak hram tum ve bawk se a lawmawm ngawt ang.

Zu zawrh a nih tak avanga zu vanga thi kan tam ta thut ni awma an sawi hi kei chu awih har ka ti deuh. Zuar lo mah ila zu vanga thiho hi chu zu vang bawkin an thi tho thovin ka ring!

- Rindika Mizo

Chawlhhmun

Hmun Thengthaw Rûn