Aizawla taxi stand em em hi!
Aizawl khaw-puiah ka rawn zin ve a, kan taxi pute lalzia leh sorkarin a duhsak em em dan hi a mak ka ti. Hetiang em ema taxi dah lalna state hi ka la hre ngai lo a, a awm pawh ka ring lo.
Khawi vengah pawh taxi stand hi hmun ṭha lai berah pek an ni a, dawrah thil lei tura lirthei han hun zawkna tur pawh awm ta reng reng lo mai hi a mak thlawtin ka hria. Aizawl, State capital-ah hian tiang hi a ni fai vek mai a, engvangin nge taxi tana hmun ṭha lai ber zel stand atan an pek bik tiin ka inzawt nasa a, a chhan ni awm ka hre mai thei lo.
Taxi stand lo awl deuhah han ding lawk dawn ila, taxi khalhtute an lo intithu em em a, "Kha chu taxi stand a ni a, midang an rawn ding leh dawn," an ti nghal tawng zel a; an polite lo em em mai leh nghal. State dangah chuan taxi khalhtute chu mipui rawngbawltu an ni tih an hre tho a, mahse mi zah an kai meuh lo.
A mi naran pawhin an hauh ngam khawpin an en hnuai a, an hnathawh hlutzia hre mahse tuman an zah lo.
Aizawl khaw-puiah chuan taxi-ten dinna an chang lo ang e, ti ni awm takin hmun ṭha lai ber berah stand an lo pe a, hei hi Aizawl Municipal Corporation pian hma a ni a, VC-te leh traffic police-te ruahmanna mai mai a nih lai kha a ni bawk a; a awm ve tho mai. Tunah chuan AMC a lo piang a, hnathawk tak tak turin engkim an bun fel ta bawk a, Aizawl khawpui chhung inrelbawl dan pawh an kutah thui tak a innghat ta bawk a, ka ngaihmawh taxi stand pawh hi ruahmanna thar nen an kalpui ka beisei hle a ni.
India ram khawi khawpuiah pawh bus-te tan dinna (stand) pek an ni a, hmun ualau ṭha lai tak an ni deuh zel. City bus-te chu mihring an chhuk leh an lawnah chauh an stand-ah an ding a, an ding rei lo a, a hnawk lem lo.
Taxi-te erawh chu passenger changin an ding nileng a ni mai a, passenger phura an chhuah hnuah midangin an rawn luah khat leh zel a, chungtiang chuan an ding khat nileng ṭhin. Lirthei dang han din ve lawkna tur hun leh hmun a awm lo a, a mangan thlak viau mai.
Chuvangin, AMC te, local coun-cil leh traffic police-te hian ngun zawkin ngaihtuah se, ei zawnga vak chhuak ṭheuh ṭheuh, ti tak maia taxi-te thuneihna khawpui han nih ringawt mai hi a dik tawh lo a ni.
Kan taxi pute hi mipui rawngbawl pawh inti viau mah se, khawi kipah pawh hmun ṭha zawng zawng an tana dah vek ringawt hi a khaw-pui zia tawh lo a ni.
- Lalhminga, Mumbai