Written by
LTKA
Msv
PU HAWLA'N RAM HMASAWN NAN A THAWH HLAWK LOIN HMATHLIR A NEI TAWK LO MAW?
Hrisel lohna leh thatchhiat avang a ni ang chu maw, lehkha ziak aiin chhiar lamah hun engemaw chen chu ka ṭuan ta. Chanchinbu bakah WhatsApp lam bihin, ṭiante ka kawm ta mah mah a. Media changkanna pawh ka man ve ta viau e.
Chung avang te chuan WhatsApp group pakhata Revd Chuauṭhuama ziak, kan CM neih tawhte chungchang a ziak thliah thliah ka chhiar fuh a, manhla ka tih rualin, Pu Hawla chung chang a ziakna tlar khat lek ka chhiar chuan, Pu Chuaua hian a ngaihtuah kim lo deuh a ni awm mang e ka ti deuh.
Kan CM lo ni tawh Pu Hawla, tuna Dr. Lal Thanhawla tia koh theih tawh hi kan ziakmi hrang tak lakah hian a thlavang hauh a ngaiin ka hre deuh tlat mai.
In thlahrung deuh chhungin, Pu Chuaua hian heng thil pahnih thum lek tal hi ngaihtuah tel se kati hle a, chungthil tlemte chu :-
1) Zoram buailai a, Remna leh Muanna, India sawrkar leh MNF te inkara thlentir tuma au au kha Pu Hawla leh a hote an ni kha le...
2) 1984 inthlanpuiah khan Pu Hawla hruai Sawrkar a lo din tak avang khan, pawi sawi lo Zofate nunna engzat nge chhan him an nih ang le? ngaihtuah thiam har tak a ni (kan ram buailai leh kha tihlai, 1979-1983 inkara kan Chief Minister Pu Ṭhena leh MNF President Pu Denga inhmuh fuh loh dan hrethiam pha lo tan chuan hriathiam a har deuh maithei e).
3) Pu Hawla'n Lengpui Airport a siam dawnlai a, 'Choak pawh a ṭum lo ang,' tia au aute kha tute nge ni le? Chu airport chu vawiinah tuten nge hmang ṭangkai ta viau le?
4) Tunlai morning news report a, 'Power kan hman tamlai berin Tuirial Hydel aṭangin Mwt 39/41/37...adt tia an puan ṭhin hi tu kutchhuak nge ni le?
5) Vawiin nia, Chennai aṭanga kan mi leh sa, hripui avanga mangang, mah se, Rel a direct a Bairabi lung muanga rawn thlengte kha ngaihtuah ila, Pu Hawla ten Relkawng an siam dawn lai a, 'A tih chi loh...Vai hoin min chimral ang...' tia au te kha tute nge ni le?
Heng bakah hian, Falkawna innghat MIMER, ZMC lo ni ta te chauh pawh hi Pu Chuaua hian ngaihtuah tel se chuan, a thuziak hi a ziah ṭhat leh duh hial ka va ring em.