PU LALDUHOMA DINHMUN LEH HMABAK THLIRZAUNA

1. Pu Lalduhoma hi, Mizoram politician zinga thusawi thiam leh thawm tina thiam tak niin, Kan awih loh zawng pawh sawi se ngaihtuahna tibuai map thei khawpa mi hneh theihna keng tel a ni. A skill hi Extra ordinary orator kan pek phal em loh pawhin, Orator tling a nih chu kan pawm fur awm e. Pu Lalduhoma MLA nihna paihsak tumna awm mekah hian, dem tur an awm a nih chuan rorel lai MNF PARTY a ni ang a, lainatna leh khawngaihna dawng tur an awm a nih erawh chuan, Pu Lalduhoma leh ZPM party an ni thung ang.

2.  MNF MLA-te'n Pu Lalduhoma an heknaah hian thiamthu sawi tur tam tak a neih a rinawm rualin thiam lohna chhe te chu a neih ve tho hmel. Mizo upa chuan, pan lovah tho a fu ngai lo tih thufing an lo nei a, Pu Duha chungthuah hian pan chhe te  chu awm ve ngei chuan a lang.

Independent MLA a nih thu kan hriat rual hian, Dan phal loh, party pakhat activity-a a lo inhnamhnawih kha, a pawi ta. Hei bakah hian Amah thlang ve tu tho MPC member-te kalsan a, Inthlan hnua ZNP thiah a nih thu leh ZPM party a inchhunfin a nih thu puangtu a nih thuah hian, Tho fukna khawp pan chhe te chu Dan mit aṭang chuan awm ve tlatin a lang e.

He thilah hian, Rulin ka mei rap se, chuk ila tia lo inring reng party leh, Bye - election nghakhlel tak tute emaw chu an rawn che ta vat ni berin a lang e.

3. Assembly Session-a CM dang ro chhenna chhan kha hrawk lam harsatna a tawh lai a nih loh pawn, a chhan zinga pakhat chu Pu Duha hi ni phak mai thei. CM meuh thusawi laia point of clarification dengkhawng temper lost hialna tham lo sawi a, phuahchawp ṭawngkam hman ngai khawpa House Leader siam kha, Independent sual ngam chin tan a thinrimthlak viau a rinawm.

4  Mipui lamin, opposition chak kan duh laiin, Sawrkar lam tan opposition chak neih ve kher ṭulna a awm lova, Sawrkar sum dawn zat lo hriat ve zung zung leh a hmanna tur hrilh zeltu Sawrkar lamin oppostion MLA mamawh an inti tawh lo a nih a rinawm viau. 

5. Pu Lalduhoma hi bial 2-a tling thei khawpa Mipuite duh a ni. Inthlan hmasa khan a bial kalsan zawk tur a sawi (palh) vangin bilal hnihah a tlak phah tawh a, tun ṭum inthlanah chuan mahni leih nala tluk nawn tum lovin, a tling ve ve thung. A politics zinkawngah hian cheksawlh leh bum thlenga hlawh hnem ber pawl a ni phak ngei ang. A felna leh theihna neih san chhawr thei lova hei chen a awmna chhan hi ngun taka ngaihtuahpui chuan, politics thlir ṭhelh a nei zauh ṭhin niin a lang. Tun MP Election hnuhnung bera Central Sawrkar siam thei tura Mamata Banerjee (Third front?) a beisei hialte kha a nuihzatthlak hnuhnawh viau a nih kha.

6. Tuna Pu Lalduhoma  chance neih mek nia lang chu MNF party hi Central (NDA) khuan an side line tawh niin a lang a,  NE State ah chuan Mizoramah chiah sawrkar kan siam lo, state dangah chuan, kan thawhpuite nen tal Coaliation Govt  kan siam vek (JP Nadda, BJP President) He thu hian thil awmzia chu a tichiang viau. MNF hi an thawhpui an ni lo tihna a nih hmel. Hetiang a nih chuan, Central lama INC leh BJP Group inpawh tawnna karah hian rilru mumal a put thuai a ngai niin a lang. Tun hma kum 30 kal liam ta vel a, amah lo ching hrep tawhtu (MP Pension pawh a lak theih loh phahna)  leh tuna a thlavang rawn hauhva Chinghne beram vun sin hun hrethiam tak leh a kaihhruai party bel duk duk lo hian, MNF lehkhalhin NDA ngam teh se. Tuna kan CM thusawi ṭhin ang hian, Mizoram sawrkar innghahna hi Central sawrkar  a ni zel rih dawn tih a chiang. Politics hi thuneihna inchuha inbeihna (struggle for power) a ni kumkhua dawn. A hun hnuhnungah hian duhthlanna dik a siam a ṭul hle awm e. Kohhran pawi sawi hlau chunga kan unit chu kohhran etc tih lam hi Politics thila Mizoram mamawh solve na a nih a rinawm loh. Dik tak chuan, Mizote hi kan emotional em em a, hei hian kan politics kalphung pawh dawihzepnaah min hruai lut a tih theih awm e. Political Party hruaitute hi kohhran duh dan zela kal tur ni lovin, indipdal lova ram tana thawkho mai tur a nih duh hmel zawk.

7. Central lamah INC an tla hniam zel a, Mizoram Congress hi Central lama an sawrkar vanga he lama  Sawrkar ṭhin chauh an ni. Tunah hian Congress party hian an Pu hmangin lainatna thuchhuah an siam chho leh ta, Pu Duha thinlung hneha AMC election a ṭanhopui theih an tum leh a ni mai thei bawk. Choak in Arawn chang a tawn vangin, Arawn a nih phah lo tih hi Pu Duha hian hai tawh lo hram teh se.

Chuti chuan, Sakhua vanga political party ṭhenkhat serafim anga inchhuah a, a ṭhen Ar chuk tui lova insawibawrhban lawi site hi thu zik bul mai a nihzia mipuite'n an hre chho tial tial dawn a, ram leh hnam siamna hi politics kal dik leh Central sawrkar nena inhne hnai taka thawhhona aṭangin a awlsam ber a, mipui dinchhuahna leh hmasawnna bul (khaipa) a ni tih Pu Duha & Co. hian hrethiamin huaisen takin thutlukna siam zawk teh se.