NLUP bawng lei turin Shillong-ah ka kal ve a

Sorkar flagship programme NLUP chu engtikah tak dawng ve ang i maw tia Tlumtea thlir taka kan lo thlir chu vanneihthlak takin kan hun a lo thleng ve ta hlawl mai a. Kan va han lawm tak em! Department lam aṭanga hriat tur ṭul leh tih tur ṭulte ti zoin March 12, 2016 (Inrinni) tlai dar 3 velah Lungdai bazar aṭangin ṭhiante nen Shillong panin kan chhuak ta a.

Bawng la vulh ve ngai lo engemaw zat an kal ve bawk a, zing dar 4 velah Shillong chu kan thleng a. Zanriah ei khamah Mizoram sorkarin min buaipui tura a dah Vety doctor hoin kan meeting a, a tuk aṭanga bawngina kal dan tur leh thil tam tak min hrilh a.

Sorkar pawisa min pek bak keimahniin kan thawh belh theih chuan a man to chi pawh a lei theih tur thu a sawi a, pawisa kan nei hlawm mang si lo a, cheng nuai khat man a ṭha lei ila, a bang la awm chuan a la, la te deuh pawh lei mai ila kan ti a. Mahse doctor chuan hei chu sorkar ruahman dan a ni si lo alawm a ti a, cheng sing ruk man bawngpui pahnih ai chuan cheng nuaikhat man bawngpui pakhat hi bawng vulha ei-zawng-tute chuan kan thlang zawk daih si.

Thawhṭanni zing dar 6:30 ah chuan bawngin lamah bawng lei tur zawng tur chuan kan kal ta a, bawng ṭha tak tak Rs. 1,00,000 - 1,30,000 man te a lo tam hle mai a. Kan pawisa chuan chung bawng ṭha tak tak man chu a daih a, mahse Rs. 60,000 man pahnih kha lei a ngai tlat mai si kha hriatthiam a har ngawt mai. Liandova te unau in Lersia se chi ṭha la tura an kal ang mai khan Bawngpui
ṭha tak takte chu kan hling ṭhelh ve thuak thuak a, a bula Lersia se chi ṭha ang mai te zawk leh a hnute pawh a tlem dawn tih hriat reng mai chu thlan a ngai tlat si.

Tluang takin kan bawng in te chu kan thleng leh ta a, bawng-pui pakhatah bawng-hnute litre 2 te chauh kan han sawi ta mai si a, bei a dawng duh khawp mai. Beng lei tura kan kal lam kan phur tehlul nen, tunah chuan bei a dawng ta. Chhungkaw phurritah a chang zo ta mai a nih hi. A chaw phurh a ngai ve reng a, wheat vai lah a to bawk si. A hnute hralh tham a awm bawk si lo a, bawngvulh ṭan tum ve pa hmei te tan phei chuan tih ngaihna a awm lo tawp ang.

Loh theih lohna avangin bawng talh-tute hnenah man tlawm tea hralh a lo ngai ta - engatinge arpui tui lai thau tak lei thei reng si a choak rual pahnih min lei tir mai le!

NLUP hi a la tawp lo a, bawng lei tura kal leh turte an la awm a nih ngai chuan an beidawng ve loh nan sorkar hian a tihdan hi thlak se. Pahnih lei ngei ngei a ngai a nih pawhin pakhat zawk hi chu a man to chi, nikhata bawnghnute litre 20 emaw tal sawr theih ni sela, bawng-vulh ṭan turte tan pawh a phurawm ang.

Tunlaiah chuan bawngpui sing ruk man (3rd class) hi chu lei fuh tak tak a har khawp mai.

- Lalremliana, Lungdai