FUR KHAW THIANG

Phuahtu: Rokunga

1. Kan ram hi tlang ram nuam

Boruak thlifim thiang lenna;

September tlai ni lenkawl,

Zing ni eng lo chhuak a thiang

mawi hle.

Aw, a mawi mang e,van dumpawl

leh thiang,

Thal, favang lenkawl eng riai;

Khuangruah pui sur leh romei

chhum a kiang,

Thlir ila, tlang tin a thiang mawi hle.

2. Thlifim nuam leng velin,

Thing tin zar mawi a rawn chhem;

Chutin favang hun lawmin,

Thilsiam tinreng sawmin zai an rem.

3. Thing tin hring zar hnuaiah,

Va tin rengten zai an vawr;

Hun thiang leh mawi an lawm a,

Rengchal, dawlremten zaiin an awi.

4. Fur, thal, favang engin,

Hlim leh lawmna min rawn thlen;

Hun tin bi kim her zelin,

Pialleiah malsawmna hlu min pe.

Pu Rokunga (RIP) khan hnam rilru thianghlim tak pu chungin kan kristianna nena rem taka kal kawpin ṭhalaite hla tam tak a lo phuah chhuak a, Zofate kan vannei tak meuh a ni.

Pu Rokunga hlate hi YMA Hla kan ti mai ṭhin. A hla thute hi a simple a, hla thu un leh ulh pui pui a hmang lo va, hriat a awlsam hlawm hle. A hla thluk pawh hi a ri a inla lawn nalh a, rimawi tum mite tan sak a awlsamin a hahdam em em vek mai. India rama sipai band party-te pawhin an tum thiam hle hlawm a, sap ram thleng pawha hriat hlawh tak niin an sawi.

'Fur khaw thiang' tih hla pawh hi mi mal leh a huhova sak theih, hla sak awlsam leh nuam tak, sak kal ṭhup
ṭhup chi a ni a, a hla thu chang tin hian kan ram Mizoram boruak nawmzia te, nungcha tinrengte pawhin nuam ti tak leh thlamuang taka an chenna a nihzia te, kan eizawnna pui ber ni ṭhin lo neih leh hun bi inthlak zel dan te, chungte hmanga siamtuin leilung malsawmna min pek dante a rawn chham chhuak a, a ropui hle mai. Hengte bakah hian Pu Rokunga hlate hian mahni ram ngainatna leh hmangaihna te, inngainat tawnna te leh a huhova chen nuam tihnate min neihtir nasa hle bawk.

Mahni ṭhatlai hun ṭheuhah, YMA hla tui ti tak leh nuam ti taka lo sa ho ṭhap
ṭhap tawh ṭhinte chu pitar putar kan nih hnuah pawh kan inngaina a, kan inhaw lo. Tunah kan awten zir tawh lovin zai thei tawh lo mah ila, ṭhalai rualten YMA hla, ram ngaih hla thiam tak maia an han sa a, an zai ri ṭhap ṭhap han hriatte hian lung hlui a thar a, kan ṭhat lai hunah kan cheng a, awm hmunah kan lo tui ve em em zel mai zawng a nih hi.

YMA hlate hi Mizo min ti pumkhattu, unauva min siamtu, mahni ram min ngainattirtu leh min hmangaihtirtu a va ni tehlul em! Kan ṭawng tu’n lo haw lo sela, mahni ṭhatlai hun pawha YMA hla sa ngai lo leh tuipuina pawh nei pha lote hi chuan mahni ram leh hnam hmangaih tak takna pawh hi an nei pha ngut na emaw chu?

Amaherawhchu, YMA hla kan tih aiah ṭhalaite hla ti-a an rawn siamah hian Pu Rokunga hla 'Fur khaw thiang' tih hi a tel lo hlauh mai a, a pawi hle. Chhut leh hunte a awm a nih chuan a tel tawh ngei beisei ila. Zo fate inpumkhat nan, inlungrual zel nan, kristianna chawi nun zel nan YMA leh a hlate hi lo vul thar zel rawh se.

- Vanlalngaia, Ramhlun North