Mzu Hna Lak Result Chhuak Har

Mizoram University (MZU) hna lak result chhuak har lutuk chungchang Mizo ṭhalaite hmakhaw ngai chungin ka han thai lang ve leh ang e.

Mizoram University (MZU) hian zirtirtu bakah zirtirtu ni lo (non-teaching staffs) hna a la ve fo ṭhin a, Mizo ṭhalaite tan a lawmawm ṭhin hle. Nikum 2023 August thla vel khan Non-Teaching Staffs (LDC, Lab Assistant, Library Assistant, etc) hna ekzam engemawzat a buatsaih a, amaherawhchu kumin March 2024, thla 7 dawn ral hnu pawh hian result a la tichhuak thei reng reng lo mai hi a va mak ngai em. He hna ekzam tute hi MPSC hnuaia ekzam ṭhinte ai chuan an tam lo hle a, zawhna pawh MCQ deuh vek a ni. Endik leh enfel pawh a hautak lutuk awm lo ve. Heti chunga tun thlenga result a la tichhuak thei lo hi Mizo ṭhalai hna zawng mekte hmuhsitna leh ngaih pawimawh lohna lian tak a ni.

Mi tam takin ngaihtuahna ṭha lo an put phah ta fo mai. Heng hna te hi a rukin an joined leh deuh vek tawh em ni? MZU thuneitute hian an chhungkhat hnai an thun leh dawn em ni ang? tih te kan inzawt mek a nih hi. Tunhma deuh khan hetiang hna lakah hian tute emaw chhungkhat hnai leh tute veng emaw a chengte kha an tling thei bik riau kha a nia. State sawrkar tan zuk inrawlh theih a ni si lo. Kan rama zirna In sang ber MZU pawh hian kalphung thar, dik leh felfai, langtlang takin hna lak kalpui ve tawh se.

Heng hna ekzam result te pawh hi a ranglamin tichhuak thuai se la. Tin, kan Zirlai Pawlte pawh hian Mizo ṭhalaite hmakhua ngaiin MZU hna lak reng reng hi tun ai hian vil uluk zawk se a duhawm hle a ni.

Mizo ṭhalaiten MZU Non-Teaching Staff hna ekzam result chhuah hun nghakhlel takin an thlir e.

- Anonymous