ṬHALAITE NUN
Zoram khawvelin kan buaipui em em kan ṭhalaite nun hi uluk zawkin i han bihchiang teh ang. Kan ram a ṭhang zel a, kan ṭhalaite pawh an changkangin ram pawna lehkha zir leh foreign a hna thawkte pawh kan nei ta nual mai.
Kan thawmhnaw te pawh a changkangin Paris leh Seoul te aiin kan nep bik lo. Zirlai tam tak taima leh lehkha thiam tak tak kan nei. Internet leh social networking site te kan ṭhalaiten an hmelhriatin ram danga thil thlengte pawh an hre zung zung thei tawh a. Technology thar ber ber pawh an hmelhriat ve ta zel a nih hi.
Rual awh nachang hre khawpa hawi zau an ni deuh vek tawh a ni. Chutih rualin ruih-hlo vanga kan buai-nate erawh a la ziaawm thei chuang lo a, ṭhalai tam tak kum tinin zu leh ruihhlo dang vangin kan chan mek zel a nih hi. Kan ṭhalaiten heti taka ruihhlo an khawih chhan leh vang hi tam tak a awm ngei ang.
Ka lo vei ve em em chu kan ṭhalaiten in tihhlimna hmun an nei lo hi ṭhalai tam tak kalsual chhan a nih theih ka ring.
Aizawl khawpui hi han thlir ila, kan ṭhalaite hian khawiah nge hun hlimawm leh thawl tak hmang se kan tih le. Kan hmun tlawh tur neih ve chhun te chu Science Centre te, Zoo te, Solomona Temple te a ni mai a. A hmunah lah engmah intihhlimna tur a awm si lo. Vawikhat kal tawh chuan kal nawn leh chakna tur a awm miah lo.
Ṭhiante nen in-kawm a han ṭhut thaw-ven pawh duh se khaw chhungah chuan hmun a awm lo. Reiek tlang, Sialsuk tlang leh khaw pawn picnic spot-ah te an kal a ngai a, chutiang tur chuan lirthei leh pawisa a lo ngai lehzel a. Lirthei nei ve lo tan phei chuan tihngaihna a awm miah lo.
Tleirawl tha za rual an ni a, khaw chhungah an vak suau suau a, Millennium Centre kawtah te an ṭhu hnek hnuk mai a nih hi. An nun hi an khawngaihthlak takzet a ni. Hetianga intihhlimna tur reng reng kan pek loh avang hian zu leh ruihhlo dang tiin hlimna an zawng ta mai te a ni lo maw.
Ramdang ṭhalaiten park nuam leh chang-tlung tak tak an neih te, zalen taka ṭhian leh ngaihzawng te ti ti pui na tur cabin restaurant te, science centre ṭha leh changtlung, adven-ture sport chi hrang hrang, water park leh amusement park te, theatre lian tak tak leh tlawm bawksi te ka hmuh hian kan ṭhalaite tan ka awt ve ṭhin.
Nu leh pa mai bakah kan sawrkar thleng pawh hian ṭhalaite lam kan hawi a, an dinhmun uluk zawka kan zir chian a ṭul ta hle in alang. Tun aṭanga kan ṭhalaite ngaihsak loa hetianga kan hlamchhiah zui zel chuan kan ṭhalai duhawm tak takte hi kan chan fo mai ang tih ka hlau hlel lo ve.
- Rohit Sharma, Kolasib