Zoram kalphung siam that ngaite
Mizoramah hian kum 1984 aṭang khan Congress party-in kum 20 chhung ram an hruai tawh a. MNF party hian kum 12 chhung an hruai tawh bawk.
Kum 32 chhunga Zoram hruaitu party lian ve ve hotute hian central India sum tluklehdingawn sang tam tak an hman hnuah Mizoram intodelhna tur an la ngaihtuah chhuak thiam lo hi mualphona lian tak a tling.
Hma kan sawn theih loh chhan chu kan hruaituten kan intodelh ve theihna tur ngaihtuah aiin an lal zel dan tur lam an buaipui zawk vang a ni. Hydel project siam te, Industry lian din te, kan ram lei hnuai thil hlu hman ṭangkai te hi a hun viau tawh a ni.
India ram state pakhat kan nih angin India ram kalphung kan zawm ve a ngai a, politics inchirhthehna ṭha lo pui pui kan chaw lut a, a pawi hle. Mipuite lah hi kan ṭhangharh thei si lo. Mizoram pum kan ngaihtuah phak loin kan awmna party ringawt kan ngaihtuah a, mi ṭha leh fel aiin keimahni hlawk theih-na tur thilah chuan khua kan hmu miah lo. Hetianga kan kal zel chuan retheih zel hi kan hmabak chu a ni mai.
Kan ram siam ṭha tur chuan India ram kalphung chhe pui pui entawn loin America ram kalphung dik leh ṭha tam tak entawn ila. MLA leh Minister pawh hi tar kun thlenga thawh tum loin term neiin siam ve ila, term hnih emaw a aia tam deuh bak thawh tir tawh lo ila. Sem sem dam dam ei bil thi thi tih thufing hi kan ram policy ni ve tawh se tuna kan kalphung ai chuan an hlawkpui ngei ang.
Tin, hmelhriat nei ṭhate chauh ni loin mi hlawhtlingte chawimawi ila, an hlawhtlin dan phu tawk zelin sorkar hian sumin ṭanpui se - hlawhtlinna lian zawk nei tura hna an thawh theih nan. Mi intodelh kan ngah phawt chuan hma kan sawn ang a, kan changkang bawk ang.
MIP kan ti, NLUP te kan ti a, mahse tun hi kan thlen chin chu a ni a, hengah te hian ram leh hnam dinchhuahna tur a awm miah lo. Tha leh tui seng loa pawisa dawn hian kan rilru a dik loh phah a, kan thatchhe zo a, retheihna khura min hruaitu a ni ang tih a hlauhawm hle.
Kum 2018 inthlan lo awm turah chuan Congress leh MNF ringawt ni loin hruaitu ṭha kan neih theih nan party te deuh zawkte pawh inlungrual tlang se. Mipuite pawhin party lam ringawt en loin mi ṭha leh rintlakte chauh vote tawh ang u.
- Stephen Thanglura