Hmeichhe mualphona phenah mipa leh a camera
Tun hnaiah chan-chinbuah Mizo nulate Facebook leh WhatsApp lama zah-puiawm taka an inlan thu kan chhiar ṭhin.
He hmeichhe mual-phona phenah hian camera awrh ṭhin mipa rual an awmin ka hria. Hei hi hmeichhe zahawmna humhimna atan din chhuahpui ve ka duh. Hmeichhia chiah dem tur an ni lo. An thla laksak a, laksak tura thlemtu an awm ka ring. Chu chu mipa an nih ka ring tlat a ni.
Ka hmelhriat pakhat chuan heti hian min hrilh, "Tunlaiah chuan car leh bike aiin camera neih ṭhata edit thiam chuan nula sawm chhuah an awl zawk. Nulate hian lan nalh loh an hlau ber. An lawm ber chu hmelṭha taka lantir a, mi hmuha pholan hi a ni," a ti. A sawitu hi ka hre chiang a, a thusawi hi dawt a ni lo. Hmeichhe lam thiam loh a ni.
Mipa, nula thlem ching an awm. Nula chak lohna an hria. An châk zawng an hria. Lar an duh tih an hria. Lan nalh an duh tih an hria. Tichuan an camera kaltlang chuan nula an sawm chhuak a, thla an laksak a, chu chu an edit a, Mizo hmeichhe duhthusamin an han tingo phuk a, an chawn pingte Photoshop hmangin an tihtet sak a, an hmai bawl an chei mam a, Facebook-ah an pholang ta. Likers an ngah a, chu zawng chu an hlawh chu a ni.
Facebook-a hmei-chhe thlalak an dah hian, cameraman hming an dah tel ziah ṭhin. Cameraman ka tih hi photographer an ni zo ta a, a danglamna ka la man thiam lo. Hmeichhe thlalak like-tu an tam chiah hian, a thlalatu a lar tel ṭhin. Hmeichhiain lar an duh kan ti a, thlalatu hlei hlei hian lar an chak asin. Mizo photographer tam tak hian a thlawnin mi thla an lak sak peih. Nulain hlawh nei lo, thlalatu pawhin hlawh nei chuang loin kan kal a, loss ve ve ni mahse lar chuan a tawk!
Thlalak eizawn nana hmang mi eng emaw zat an awm tawh. Serious taka photography lama thawktu an awm a, sorkar pawhin hna a pek theih lohna rama cheng tan chuan a hlu hle. Nimahsela eizawnna chu sawi loh, an camera man takngial pawh hlawh lo tur tam tak an awm. Hobby anga kalpui an awm bawk.
Tumah ka dem lo. Ka dem chu nula thlem chhuah ching leh thlem chhuah theih nulate hi an ni. Thlalak ṭhenkhat hian hnam an timualpho, a nula leh a latu hian an timualpho ve ve. Hnam tihmingṭhate pawh an awm bawk. Photographer-te hi an inhre chiang tawn hle tih pawh ka hre chiang. Sawi chhunzawm ve rawh u.
- Mama Sailo