BAWHHLAWH - II

He thuziak hi Veng mal, hmun mal, chhungkaw mal leh mimal behchhan ang deuha ziah ni mah sela, a thu ken leh a tum, Subject chu mi zawng zawng tan, kan ram tan a nih si avangin hetia zau thei ang bera puanchhuah zel hi a ṭul a ni. Tin, ka thuziak hmasa lama ka sawi tawh ang khan, bawlhhlawh chungchang leh faina kawngah hian theihpalingkawh meikawha ṭan kan lak a ngaih tawh avang hian tihdan mawi leh mualpho hlau chung leh, mite ngaihdan tur dawn kual chunga tih hi a hun tawh lo a, lan mawi tum leh balh hlau chunga kutkawr fai tak bun a, ten viau ni awm taka sik der der chunga hnatlan pawh a hun tawh lo. Faina tur kawnga hmanraw ṭangkai nia kan hriat apiang chu kan hmang hmiah hmiahin, BAWLHHLAWH lakah hian INDOPUI kan puan a ngai ta a nih hi. Chuvangin, Veng mal dang, hmun mal dang, chhungkaw mal dang leh mimal dang, bawlhhlawh chungchanga nungchang dik lo ka hmuh leh hriat apiang chu, a ṭha zawnga hma kan sawnna tur a nih dawn phawt chuan a ṭul dan azir zelin ka la rawn tlangaupui zel ang.

Veng dangten Veng fai hmuha min hmuh theih ṭhin loh chhan leh min thlan theih ṭhin loh chhan pakhat, kan Vengah mimal hmun pakhat ṭawphnawk kumhlun, hmuh hrehawm kumhlun, kal vel tihrehawm kumhlun, Veng dang tam takin an paltlang leh an hmuh kumtluan a awm a ni. Chumite chuan an damchhungin an harh chhuakin an sim dawnin a lang lo lehnghal a. Mahse, chu chu nakinah a ruh langin, Setana mualpho nan Sermon pate nena chawhpawlhin kan la sawi ang. Bawlhhlawh leh Faina kawngah hian mahni lam hi kan dik hmasak ber a ngai hmasa si a.

Kan veng chhak lam, Hmarveng Tuikhur bul, Bethlehem nena kan inrina Vailui hnar, Bethlehem area lam, Vantlang kawngsir langsar em emah hian kumtluana bawlhhlawh chi tinreng inchhung vum hnuk par chhuai reng mai hi tute paih nge? A khap theitu Local Council emaw, Veng bil Welfare emaw kan awm lo em ni? Nge ni a, Council member leh Welfare member-te nen kan paihho dial dial ṭhin zawk. Bethlehem lam area-ah hi chuan mimal chenna in a hla khawp a, hmuh phak pawh a ni lo.

He lai bawlhhlawhte hi a chang chuan hál ve bawk ṭhin mah se la, a kang bang leh kang thei lo leh, an hal loh chhunga bawlhhlawh khawsak zel dan hi kan chhût ngai em? He lai hi hmun ruak, awih pang a ni a, bawlhhlawh ṭawih thei lo tinreng chu kan Veng chhung laili Vai luiah a lo tla thla a, Pu Nghaka Leilet luiah kal zelin Chite luiah, Tuirialah a thleng thla ta ṭhin a ni. Chutichuan, he laia mimal pakhatin vawikhat vawikhat, tun chauh tia bawlhhlawh kan paih kumtluan chu kan Veng laili lui leh kan ram dung leh vang, luidung tluan tichhetu lian tak a lo ni ta asin. A hmun loa vawikhat bawlhhlawh ka paih hian kan ram leilung leh luidung tichhe turin tha ka thawh belh ve zel a. Tichuan, keimahni chenna neihchhun leilung leh luidungte chu, a chhunga cheng a neitute ngei chuan tichhe turin ṭhahnemngai taka hnatlangin, a huhoin ni tin darkar tin hian kan thawk suau suau reng ṭhin a nih chu!

Veng tina kawr hnaih leh kawr bula awmte, keimahni chhungkua ber ngei mai hi fimkhur tawh ila, chu'ng hmuna awmte chu thuneitu ṭhahnemngaite pawhin vil uluk se la, kan ram luidung faina kawngah hian nasa takin kawngro a su dawn a ni.

Nungchang dik lo taka bawlhhlawh vawikhat ka paih mai hian kan ram tichhe turin ka tha ka contri ve zel a ni tih hriain, nungchang ṭha takin i nung tawh ang u.

Ram ka hmangaih tia Party Flag put vu vu leh, mawl tawh nak alaia Party ruihchilha at ruai hi ram hmangaihna a ni lo va, mi dangte rin ngam leh rintlak, ngaihsantlak ni tur chuan tuna i bawlhhlawh paih dan aṭang khan a inṭan tih hria ang che.

FEL LEH FAI NGAINAT HI PATHIAN CHAN A NI A. TAWP LEH HNAWK NGAINAT HI SETANA CHAN A NI.

- K.Hmingthankaia, Venghlui.