BIOMETRIC ATTENDANCE MANAGEMENT SYSTEM (BAMS)

Biometric Attendance Management system (BAMS) awmzia chu biometric authentication hmanga hnathawktuten an hnathawhna hmun (Office) an thlen hun leh, an haw hun fel fai taka chhinchhiahna a ni. Biometric Attendance Management systemah hian components hrang hrang Biometric machine, Data server, Internet/Network, Attendance Management software a awm. Biometric Attenance Management hi rang tak leh awlsam taka hman theih (user-friendly) tura siam a ni. Employee ten kutzungṭang hmang emaw, mit hmanga authentication tih mai tur a ni. Mizoramah pawh hmun ṭhenkhatah chuan kan hmang mek a, a bikin NIELIT Aizawl Office ah phei chuan kum 2014 aṭang daih tawh khan hman a ni tawh.

BAMS kalphung tlangpui chu- A hmasa berin Attendance lakna khawlah employee te enroll vek phawt tur a ni. Attendance lakna khawla in-enroll zawng zawng te Biometric data hi server-ah dahkhawm vek a ni. Tin, heng data te hi khawih danglam theih loh tura encrypt vek a ni. Office/Institution luhnaah emaw, hmun remchangah Attendance lakna khawl hi dah a ni a, Office thlen hun leh ban hun apiangah Employee ten an kutzung remchang ber hmangin an sign ṭhin. Tichuan, Attendance lakna khawl hi data server nen Cable-a thlunzawm a ni a, server aṭang hian software hmangin admisnistrator ten an hmu thei a, a ṭul hunah an print chhuak tawh mai ṭhin.

Biometric Attendance Management system (BAMS) kaihhnawih hriat tur pawimawh langsar zualte han tarlang ila:

1. Authentication awmzia chu : kan taksa pianzia hmanga keimahni chhinchhiahna bik hmanga keimahni ngei kan ni tih finfiahna a ni. Authentication hi chi hnih a awm a, chungte chu:

i. Traditional Authentication: Hawrawp, Number, Pattern hmanga siam hmangin keimahni ngei kan ni tih chhinchhiahna leh finfiahna a ni. Hengte hi vawiin thlenga kan hman lar ber ber te an ni. Mahse, mi dangin kan password, Screen pattern, PIN, OTP te an lo hriat ruk erawh chuan duhtawkin kan hmanrua an hmang ru thei thung hi a ṭhat lohna a ni. Attendance Management system atan chuan mi dang a sign-sak theih dawn avangin a rintlak loh. A langsar zual te chu: Aadhaar Card based leh Radio Frequency Identification (RFID) Card te hi Traditional Attendance Authentication langsar zual te chu.

ii. Biometric authentication: Kutzungtang zia (fingerprints), Mit note zia (iris patterns), hmai pianzia (facial features), leh Kutzia (palm prints) hmanga keimahni ngei kan ni tih chhinchhiahna leh finfiahna a ni. Biometric authentication ah hian data inang a awm thiang lo. Kan finger print, Mitnote ziarang, kutphah te hi mi dang milpui awm lovin a pianzia a lo hrang vek hi hetiangah tak hian a ṭangkai hle. BiometricAttendance Authentication langsar zual te :

Fingerprint recognition, Facial recognition, Iris detection, Vein Pattern System, Voice Recognition.

2. Authentication data dahkhawlna (Server)

i. Local Server: Data dahkhawmna Server hi Department/Institution ah a awm nghal mai ṭhin. Attendance lakna khawl nen cable-in an thlunzawm mai a, Internet / Network hranpa a ngai lo. Local server aṭang hian awlsam taka attendance data hi lakchhuah theih a ni.

ii. Remote Server: Data dahkhawmna Server hi hmun dang daihah a awm. Attendance lakna khawl nen Internet/Network hmanga thlunzawm a ni. Attendance sign nan leh data lakchhuah nan Internet/Network neih ngei ngei a ngai.

iii. Cloud Server: Data dahkhawmna Server hi company server ah dahkhawma ni. Attendance lakna khawl nen Internet / Network hmanga thlunzawm a ni. Attendance sign nan leh data lakchhuah nan Internet/Network neih ngei ngei a ngai.

3. Biometric Registration /Enrollment tih dan:

Office ah hman dawn chuan BAMS khawlah employee zawng zawng te register vek tur a ni. Hemi atan hian Biometric Data Capture Devices (fingerprint scanners, iris scanners, facial recognition cameras, or palm scanners) an hmang ṭhin. Registration mahniin duh duha tih theih a ni lo a, System administrastor ten min tihsak ṭhin. A tihdan chi hnih a awm :

Finger Print enrollment process:

Employee ten an hmet a, an kutzia thla chu a la a. Image processing hmangin finger print data template a siam a. Chhiar ruk theih loh (encryption) leh khawih danglam (Tamper) theih loh turin Server ah a save ṭhin.

Face Image enrollment process:

Camera hmaah kan ding a, kan hmai thla a la a. Image processing hmangin kan hmai pianzia (Landmark, Alignment, Embedding) chhinchhiah a. Frame processing hmangin kan hmai pianzia te hi a la chhuak a. Facial database a siam a. Chhiar ruk theih loh (encryption) leh khawih danglam (Tamper) theih loh turin Server ah a save thin.

Registration tih lai hian fimkhur a ṭul hle. Kutze thla lak a ngaih avangin kut fai taka sil a ṭha. Tin, mit note scan laiin tarmit vuah loh a fuh bawk. Kan uluk loh chuan fingerprints, iris patterns, facial features, leh palm prints te hi khawlin a hmu ṭha thei ṭhin lo a, a buaithlak ṭhin hle. Registration tih fel hnuah employee data te hi a ṭul hun apianga hman theih turin vawnṭhat vek a ni.

4. Biometric Attendance Sign dan : Office kal ni apiangin finger print emaw, mit note hmangin office thlen hunah Biometric Attendance lakna khawlah kan sign-in ang a, ban dawnah kan sign out leh ṭhin ang. Attendance sign dan chi hnih a awm a, chung te chu :

Finger Print hmanga attendance lak dan process:

Employee ten an kutzung remchang ber hmangin an hmet a, an kutzia thla chu a la a. Image processing hmangin finger print data template ah a letling a. Server-a finger print data template a lo khawlkhawmsa nen a milpui a zawng a. A zawn hmuh chuan Confirmation message a thawn a. Attendance a la zo ta. A zawn hmuh loh chuan Error message a thawn a. Kut hruk fai a, hmehnawn leh tur.

Face Image attendance lak dan process:

Camera hmaah kan ding a, kan hmai thla a la a. Image processing hmangin kan hmai pianzia chhinchhiah a. kan hmai ziarang a la chhuak a, Server-a a lo khawlkhawmsa nen a milpui a zawng a. A zawn hmuh chuan Confirmation message a thawn a. Attendance a la zo ta. A zawn hmuh loh chuan Error message a thawn a. Uluk taka camera hma a din leh mai tur.

Finger Print hmanga attendance sign dawn hian kut a balh chuan a hmu thei lo. Silfai emaw, puan hnawm chip chepa hruk hmasak a ṭha. Liah duai duai loh tur. A hrisel lo. Face Image attendance a nih chuan uluk deuh a camera hma din mai a tawk. Tarmit vuah hian a hmu har duh a, hlih zel mai a fuh ber.

5. Biometric Data Processing and Storage:

A ṭul hun apiangah (Weekly, Monthly) Attendance report hi print chhuah theih a ni bawk. Employee ten fingerprints, iris patterns, facial features, leh palm prints hmanga attendance an sign apiangin Data Capture Devices chuan he database aṭang hian a milpui a lo zawngchhuak ṭhin. Hemi zawnchhuah nan hian Advanced algorithms a hmang a, a milpui a hmuh veleh verification confirmation message/Audio a rawn tarlang mai ṭhin. Entirnan: Facial recognition kan hman chuan "You are verified, Thank you" tih Audio in emaw, ziakin a rawn lang ang. Aadhaar based attendance system-a finger print kan hmang a nih chuan confirmation hi email ah i dawng tel bawk ang.

6. Attendance Tracking, Reporting and Analytics:

BAMS khawl hian sana a nei nghal vek a, Employee te sign in leh sign out hun hi a ṭul hun apianga check theih turin khawih danglam theih loh turin system database ah record zel a ni. BAMS khawl hmang hian a ṭul hun apiangah employee attendance check theih a, kal tlai leh kal lo, haw hma leh haw tlai reports awlsam takin a print chhuah theih bawk. Action lak a ṭul hunah pawh awlsam takin mimal report a siam theih bawk. BAMS hian Human Resources (HR) manage-ment systems, payroll software leh enterprise applications hrang hrang, a ṭul dan azir zelin thlunzawm a ni a, data te hi share ṭhin a ni. Employee hnathawh dante leh hlawh pek dan thlengin an hmang ṭhin.

7. Security and Compliance:

BAMS khawla employee registration Database hi GDPR (General Data Protection Regulation) and HIPAA (Health Insurance Portability and Accountability Act) privacy regulations zulzuia computer (Server) ah database template felfai tak nena vawnṭhat vek a ni. Heng database hi encrypted vek a nih avangin a ruka mi dang data enthlak leh khawih danglam theih a ni lo. A him em em a ni.

Conclusion:

Tunhma deuh khan Biometric Attenance Management system hi hman chhin a ni tawh a, kan hmang ṭha duh lo khawp mai. Rei lo teah khawl manto tak takte kha kan tichhia a, register bu bawk kan hmang leh a. Sorkar hnathawk Office kal tlai leh haw hma kan ṭhahnem viau mai a, ZPM sorkarin a rawn ngai pawimawh thar leh hi a lawmawm hle. Kan hmang dawn tak tak a nih chuan a hun taka thlen leh haw a ngai tawh ang. Hetiang a nih takah chuan Attendance Register book-a kan in-sign-sak ang kha a theih dawn tawh lo a, an kut emaw, an mitmu emaw, kan kengte a nih ngawt loh chuan mi dang a in-sign-sak theih loh! Inthlahdah deuh tan chuan a buaithlak viau mai thei!

A tawp berah chuan hotute Monitor ngai lovin hun vawng dik ila, rinawm leh taima takin hna thawk ila, a duhawm hle. Kan rilru a dik loh chuan eng anga khawl ṭha leh changkang pawh hmang ila, awmzia a nei chuang lo vang. Digital khawvelah kan cheng tawh a, Biometric authentication hi kan hmang tam telh telh dawn. Tun aṭanga rei lo teah chuan Zirna inah leh private business-ah pawh kan la hmang deuh vek ang. Pawisa tam tak senga kal kim lawmman kan sem ṭhinna Sunday school-ah hial pawh attendance lak nan kan hman hun pawh a la awm mahna!

- Er. Chhungpuia Renthlei, Senior Technical Officer, NIELIT Aizawl