Doctor leh laboratory

Civil Hospital, Aizawla department pakhat OPD-ah ka inentir a, a hma pawhin ka inentir tawh. Daktawr nen ṭha takin kan indawr a, a tawpah erawh chuan lungawi zân lohna ka nei ta. Han chhân ve deuh châk viau mah ila, ka insûm ta zawk a.

Ka lungawi loh chhan chu – thisen test tihna tur laboratory-ah duh bik pahnih (ni tain ka hria) an nei a, chu an duh bik laboratory min kawhhmuhte ni lo laboratory dangte chu an rintlak loh ang deuha an sawi kha! 'Laboratory dangte an rintlak loh,' an ti tawp lo a, 'An test result a dik leh dik loh kan hre lo, an rintlak dan kan hre lo' tih lam hawi a ni. 'An rintlak loh' tih ṭawngkam hmang lo mah se, laboratory dangte chu an ring lo tihnaah a ngaih theih. Chu ai mahin, an pawm bik laboratory-ah kal ngei ngei turin min nawr lui a ni mah zawk a ni.

Daktawrte'n test eng eng emaw tihna atana laboratory duh bik an nei hi a âwm a, daktawr ṭhenkhatte leh laboratory ṭhenkhatte chu an thawkho a nih pawh a rinawm a; a âwm reng mai. Damdawi dawr mi kawhhmuh bik an neite pawh a hriatthiamawm a, an duhsak bik a ni mai. Damdawi dawr hrang hranga zawn kual chiam ngai lo a, hmun khata a awmna min kawhhmuh a nih phei chuan inentirte tan awlsamna a ni ve bawk.

Daktawrte'n an thawhpui laboratory-te duhsakin test tih ngaite ti tura an hnena inentirte an lo hrilh pawh a âwm a lawm, a la tih theih zel. Mahse, an hnena inentirte chu an ngèn tur a ni a, an nawr lui tur a ni lo, damlote'n an duh tak laboratory an pan ve thei tur a ni, tih hi ka rilrua awm chu a ni.

Aizawlah hian laboratory tam tak a awm a, ka inentirna daktawrin pan tura a tih bik laboratory min kawhhmuhte aia din hmasak zawk daih, an hmunhma, hmanruate pawh changtlun hmel zawk tak takte leh pathologist-te'n an vilte pawh a awm nual. Medical lam hre lo keini ang tan chuan ka daktawrin min kawhhmuh laboratory aia ṭha zawk tura ka lo rin ve ringawt a awm nual mai!

Mahse, daktawr chuan laboratory dang zawng zawngte chu an rintlak dan a hriat loh avangin thisen test-na tur laboratory pahnih chauh min kawhhmuh a, chu'ng laboratory pahnih ni lo, laboratory danga test result chu a pawm dawn lo ni âwm tak a ni. Keiin chhan eng eng emaw avangin laboratory dangah tih ka duh ve bawk; a buaithlak viau. Ka inentirna daktawr tih ang hian daktawr dangte leh OPD Department danga daktawrte zingah pawh ti ṭhin an awm tih, miin an sawite ka hriat belh leh zel bawk.

Ka inentirna daktawrin thiam taka min nawr dan hi thil dik leh ṭha a ni em? Daktawrte tih dan tur a ni em? Dan bawhchhiatna a ni em? Sawrkara thuneitute'n beng han chhi deuh se a va ṭha âwm em. Dan bawhchhiatna a ni lem lo a nih pawhin, damlote leh mamawhtute nawr chêpna, nawr luihna, an zalenna rahbehsakna erawh a ni chiang mai. Damlo ṭhenkhat tan chuan harsatna thlentu a ni bawk.

Chuvangin, hetiang thil hi kan sawrkar hian ngaihven thei se, a ṭul angin bawhzui se. Dan loa thil tihna a nih phei chuan tihtawp ni thei se a va ṭha dawn em. Dan lo a nih chiah loh pawhin, damlote awlsam zawkna'n tih tawh loh ni thei se a ṭha. A ṭul a nih chuan sawrkar hian office memorandum/notification hial chhuah se a ṭha khawpin a rinawm – damlote leh mamawhtute tan.

- Zoramchhana