Traffic Police : Mipui rawngbawltu

Fit 4 hnuai lam ka nih lai chuan sikul ban­ah ka u phenah Zar­kawt kawngpui ka kân a, fit 4 ka pelh hnu chuan ka naute leh ka ṭhiannuten ka phen a chuh ve thung. Tunah chuan ṭhianten ‘He laiah hian kân mai rawh’ min tih pawhin Zarkawt kawna thu ber (hamrik nei, duh duh tiding theitu) zawnah kher ka kân ṭhin.

Khawvel thiamna kan chhawr ṭangkai ber zinga mi, lirtheiten kan tual an mawi a, an inzui duah duah reng a. A khalhtuin tlan par par duh mah se ‘ding rawh’ titu a awm chuan an ding mai zel a, hawihhawm lo zual chuan umzui an hlawh a. Kawng tawt zual changa an duhsak zawng tilang thei lek lova an han phar ṭhin phei hi chu an rinawm ka ti ṭhin.

Lirthei Pulis hi zawng an hnathawh hi thup theih pawh a ni lo, nula thlira hawi a nawm dawn vei nen ‘nula thlir case’ a chetsualna thlen thu kan la hre lo chu a nia(h). An fakawm asin aw!

An thuamhnaw tlawm tak, duh aia rei ni hmu ṭhin tih hriat tak, da deuh lap an hak te hi a hlu asin, ‘Hnathawh kawr’ hming put chhan pawh ni se, keini kum rual chuan kan pawm mai ang. Kawi khat ni do tur pawha nihliap zawng ruai ṭhin keini ang tan chuan chutiang khawpa ni dawl zo chu an awhawm asin. Sikul kan kal ve laia inhremna lar ber chu beng pawta nisaa din a ni; a hrehawm an ti em em a, thu an awih phah ṭhin.

Patling tan nilenga ni do kum tluan hi a ziaawm bikin ka ring hauh lo. Ruahsur ni te, khaw duai ni te zawng awm teh mah se, ni 365-ah hian ni sat ni a tam em. An indinchhawk dan ka hre lo a, nileng ṭhak ṭhakin an ding ṭhin a nih hi tih theih turin chawhma leh chawhnua ding hmel hmuh tur pawh an awm lehzel a. Idol-a zai mah an in-Bye Bye chuan, min phurtute'n remti se zawng; anniho hi ka bye bye mai zel ang maw le.

Hlawh nei ṭheuh ṭheuhah second 3 dan vel zel mi thar ho chu ‘hna pawimawh’ thawk ni mah se, ka thawk chak hauh lo mai. Lirthei khalhtu dan zawm ṭha leh hawihhawm an tlan tam deuh ṭumin an hahdam deuh anga tih chauh a ni. Tawrh­chhelna sikula zir­chhuak ni awm an ni.

An hna tihreh­awmtu atan lirthei khalhtuin a hriat ngei ngei tur hre lo an awm ve chamchi a, hmuh loh lai remchang zawnga kawng sir tawt belhchhah tura lo ding ru an awm ṭhin bawk; a va thaw­ipikthlak dawn em! Vín ṭhawt mah se kei chuan thiam ka chan.

Kawng kân thiam lo tante hian kekawr páwl haho hian thla an va timuang em aw! Darkar tin hian nunna an chhan reng a, an thawhrimna avang hian khawpui nuam kan la nei ve ṭawng ṭawng a nih hi le!

Ni tina heti zo zai thawk chhuak zinga hah fal tlem té lo awm ṭhin vang hian, an nileng hna thawhsa theihnghilh vek lo ang u. Rilṭam leh damsam lo chunga thawk an awm ve dawn a nia, kan mamawhzia hre chung hian thla khatah vawi khat tal chu an lakah hian kan remchan ang zelin kan hawihhawmna lantir ang u.

Traffic Police zawng zawngte mal­sawm­na ni zel turin duhsakna ka hlan a che u.

- Rimenhawih Msi