Chawimawi phut lo Chuauṭhuama (Revd. Dr. Chuauthuama 1947-2024)

Mawi ka tih em em chu, Aizawl Theological College a hun hnuhnungah, "Tling lo takin ka lo lut a, tling lo tak bawkin ka chhuahsan che u..." tia thlahna thu a tlip kha a ni. Ani ang pa tuihnang lo leh tuirîl lo takin chuti ang thumawi a phuh chhuak kha mawi ka ti em em a, ka thin a khawih a ni.

ATC-a a rawngbawlpuite thlahna thu ang khan, a hun puma a rawngbawlna kawngah tling lo a intih tho ka ring a. Mahse, chuti ang mi chu a ni hauh si lo. A lei thawhrimna tlin taka chawlhsanin a pa hnenah tling takin a haw a ni choh zawk si!

Chawimawi phut lo Pu Chuaua nun han chhut hi chuan Pu R. Vanlawma'n, "Mizoram hi a phurin ka phur ṭang ṭang a, a kal sual tur hi kawihsapirin ka kuai fan fan a, ka kuai hneh lo ṭep ṭhin a ni," a tih ang deuh khan, Kohhran a hmangaih vanga a hum himhimna leh, a vawnhimna rit tak kha a phur ṭang ṭang a, a kal sual tur kha khawvel lak aṭang leh nektu tam tak aṭangin Kohhran chhung ngei aṭangin a kuai fan fan a, a kuai hneh lo tep ṭhin ni hian ka chhut ṭhin a – lenga leh lengi te khan engtin ngai ve che u maw?

A theihna leh thiamna kha a hmanna tur dik takah a hmang a. A mihring mihrìnna aiin Pathian leh Kohhran a dah lalin, a dah lian a, a dah chungnungin a chawi chungnung thiam em em a. Chumi kalkawngah chuan mi dang chawimawi phut loin hna a thawk mial mial ni ber hian ka hre ṭhin a ni. Chuti ang ngaihdan han sawi takah chuan, rilru a reh thei lo zawhna a awm a lo lang thar a. Khaw êng fing hnih ka hmuh kuma a lehkhabu hal chungchang kha a ni.

He tia han zawh mai ka nàp ṭhin, "Heti khawpa nangmah ṭan lo leh, khengbettute lakah hian vun naran ni lo inbelin, Kohhran tan khan engtin nge rinawm taka i awm theih?" tia han zawh bawl mai ka duh a. A zawhna hi ho hle mah se, ama ṭawngkam ngeia hriat kha ka chak nasa hle a. Chawimawi phut miah lo va a rawngbawlna a tlingtlak dan te, rilru nghet rûm rút a put dante pawh a ma tawngkam ngeia hriat chaknain min tur thin a–naupang chhe tak, duk dak lo takin a ni Mizo pa ropui han kawm kha tum rual leh tih rual a ni mawlh si lo.

"Ka kal zel dawn," tih lehkhabu kha KṬP member pawh ka nih phak hma khan ka hlut daih tawh a. Kha lehkhabu kha kan kawmchhakte ta ka hawh, ka pek let phal tawh loh a ni. Mi lehkhabu ka rù a nih ber chu. Chawimawi phut lo Chuauṭhuama lehkhabu rùk kha pawi ka ti lo va, rùkrua min siamtu kha chawimawi phut lova rawngbawl ṭhin a ni. Amah a ropui teh reng nen, amah ngaisangtu chuan ui ek pawh ka tluk lo, a lehkhabu ziah rutu mai ka ni a, nimahsela, inchhirna ka nei lo!

Kha lehkhabu "Ka kal zel dawn" tih leh, "Bâwih Ṭhahnem lo" te khan ka rilrua zawhnate chu chhang ve bawk mah se, ama ṭawngkam ngeia hriat kha ka chak a. My Name (Remruata) hnenah phei chuan han kàwm ang aw, ka ti nghe nghe a ni. A BD zirna tuala lehkhazir, zir zo ka lo haw dawn ṭepah a Pa hnenah min lawisan thut a. Tleirawl chhuah tirh aṭanga ka "Dream" ve kha a hlawhtling ngai dawn ta lo, ka nà vawng vawng mai a. Ṭhianṭhate bula han inhriktlak kha ka rilru ang pu mi an awm khan ka zuk hre si lo. Kha ka "Dream" kha puitlin ngat ila chuan, kei pawn lawngchawlhna hmun pan ka hnial lêm bik tawh lo maithei a ni.

Inbun ruak chhunzawm zel ila!

A kutchhuak lehkhabu 60 chuang zingah khan tih tham a lehkhabu kan kawl lo. Ama ṭawngkam hawh ila, a leina tur 'Pawisa kan nei lo', mi awm thei leh mi hausa chhungkua kan ni lo. Vanglaini a column leh kan neihin a tlin tawk lehkhabu lei kha amah ka kawm theihna awm chhun a ni mai a. Chu chu kan hlut theih tawk a ni a, sosang leh nasa takin kan hlut bur a ni ber mai.

A hringnun kha, a dika dik chuan a hun tam zawkah khan chawimawi aiin huat a hlawh hnem zawk ang em aw? tiin ka ngaihtuah ve ṭhin a. A nun ka thlir hi chuan, "Chawimawi la, ani'n a chawisang ang che..." (Thufingte 4:8) tih kha a nunah a thleng dik zawt zawt lo va. Hun leh kum tam her liam hnuah, chhel tak leh huai taka a din ngheh tlatna khan mihring mihrinnaah chawimawina lallukhum a khumtir ni hian ka hre ṭhin.

Hringnun sûar nasa tak a zawh vang khan a vui ngawt lo va, a phun nawi ngawt lo va. Hringnunah hrehawm nasa tak a tawh pawh khan a dai ngam a, a paltlang ngam a, a tawn tlang mai ṭhin.

A thil ṭha tih leh tihchhiat vangin chawimawi a phut lo va. A dai tur a nih chuan a dâi mai a, a hmachhawn mai a, hun lo la awm tur leh tun huna Kristiante rinna vawnhim leh venhim a ṭhulh lo. Pa tháwm ná a nih ang bawkin Kohhran tana tháwmna tak a chhuah ngam kha 'rapthlak ropui' a tling a. A Pâ lâwmna tlinga a lei kum a zawh tawp dan mut hmuna ka suangtuah chang phei chuan, "Amen" ka ti ve sap ṭhin.

Bâwih rinawm, lawngchawlhna panin i kal ta, i thilthlawnpek avang hian kan lawm e. Kan làwmna hi hun bî leh lei bî a kîn hma chuan kan hril bàng dawn si lo.

- Lalsiamkima Sàmte