‘Kan pawl member ni lo tan a theih ve loh’ (Society registration kalphung leh a thil tum thlirna)

“Kan society hi Sorkara in-register thlap kan ni a. Kan pawl member lo tan chuan he lai hmunah hian ar sa zawrh ve phal a ni lo.” (Ar sa zuar association thuchhuah).

“Sorkara in-register kan nih angin kan society member ni ve lo chu kuhva hring zawrh ve phal a ni lo.” (Phai aṭanga kuhva hring la luttu pawl thu chhuah).

A chunga thu chhuah pahnihte khi hun kal taa a taka ka hmuh ngei an ni a. Khi'ng pawlte khi Sorkara society registration nei an nih hmel a; registration nei an nihna hmangin an pawl member ni ve lote chunga hlei lenna atan an hmang ni berin a lang. Chuvangin, society registration hian eng nge a tum tih hi kan hriat tlan a ṭul hle a. Kan member ni ve lote thliar hranna tur atana din theih a ni chiah em tih te, society registration hi eng atana neih leh hman chi nge tih a tlangpui lo sawi ila.

Eng ang society nge kan nih?

Mizoramah chuan society tih hian chi hnih a kawk deuh berin a lang a. Pakhatna chu cooperative society ho an ni a. Cooperative society-te hi chu an member-te sum leh paia hmasawnna thlen tura pawl din a ni ber a. Member-te welfare atana din a nih ber chu. Anni society ang hi Cooperation Department hnuaiah The Mizoram Cooperative Societies Act, 2012 hmangin an in-register ṭhin a ni.

Pahnihna chu cooperative society ni si lo, society chi dangho hi an ni a. Heng society-te hi a tlangpuiin Taxation Department hnuaiah The Mizoram Societies Registration Act, 2005 (MSR Act, 2005) hmangin an in-register ṭhin a ni. Anni hi chu member-te hlawkna lam ni lo, khawtlang leh ramin hma a sawn theihna tur zawnga din tur a ni thung a. Cooperative society nen chutah tak chuan an danglam hle a ni. Member-te hamṭhatna tur atana din a ni ve lo.

MSR Act, 2005 hnuaia registration neihna chhan tur

Cooperative society ni lo lam zawk hi lo khalh fal tawh ila. MSR Act, 2005 hnuaiah registration an dil ṭhin a. Registration pek an nih theihna tur hian thil tih tur a awm ve nual a. Chu'ng zinga danin a phut, pawimawh em em mai chu MSR Act, 2005 section 7-ah hian lo langin, he dan hnuaia registration nei tur chuan an pawl thil tum leh hmalakna reng reng chu he section-a inziak ang hi a ni tur a ni a. A hlawm deuhin a tlangpui hetiang hian lo dah ta ila-

1. Thil promote lam- heng literature, arts, science, sports promote-na lam hawi.

2. Mi ṭanpuina lam- fahrah enkawl; tar, damlo, chak lo leh rethei ṭanpuina lam hawi.

3. Environment leh nungcha venhim leh enkawl lam hawi.

4. Hriatna leh finna theh darh; vantlanga nun hona kawng leh ei leh bar zawn kawnga zirtirna pek; library din leh enkawlna lam hawi.

5. Heng- arts lam te, hmanlai thil hlui te, scientific leh mechanical hmanrua leh design lakkhawm leh vawnhim lam hawi.

Hengte hi tun dinhmuna ‘society registration’ neih theihna tura society dinna chhan turte chu an ni a. Sumdawnna lam hawi emaw, member-te hlawkna tur lam hawi emaw a ni thei lo hrim hrim tih hi hriat tlan a pawimawh khawp mai.

Member ni ve lote nek chepna

Tuten emaw society an din a, registration an nei ta a. Chutianga an registration chu an pawl member bikte vulh tumna atan leh, Sorkarin anmahni chu a pawm ta bik riau anga lang thei turin thu an chhuah fo a. An pawl nihna azirin society registration an neih chu hmachhuanin an pawl member ni ve lote nek chepna turin thuchhuah chi hrang hrang- ‘Kan khaw motor pawh ni se kan khuaah kan member ni lo maxi cab/taxi/auto rickshaw tan a service ve theih loh’; ‘Kan member ni lo tan bazar-ah seat a neih ve theih loh’; ‘Kan member ni ve lo tan thir chhia a zawn ve theih loh’; ‘Kan member ni ve lo tan muṭia a ṭan ve theih loh,’ etc. tih te an chhuah ta ṭhin a.

Eng lam hawi society pawh ni se, an member ni ve lote nekna atan, thliar hranna atan an hmang a nih chuan registration an neihna chhan an nunpui zo lo tihna a ni a. An registration chu cancel sak hial chi zawk an ni. MSR Act, 2005-in he dan hnuaia registration a pekna chhan, a chunga kan hmuh ang khian mi dangte tana luang chhuak tura indin tur an nih laiin mi dangte nek zawnga an kal a nih chuan an ti dik lo hle a ni ang.

Society registration dil dan tur

Society registration hi a dan kengkawhtu Taxation Department-ah dil theih a ni a. Commissioner of State Tax (Taxation Commissioner) hi Registrar of Societies a ni nghal a. Registrar of Societies a nih mai bakah dan hran hnuaiah Registrar of Firms a ni tel nghal bawk a. Hei hi mi tam tak chuan kan ngaih fin deuh ṭhin a; society registration kan dil dawnin ‘Firms and societies registration kan dil dawn’ kan ti mai zel a. Dan hran daih a nih vangin ‘Society registration kan dil dawn’ tih mai hi a tawk a ni.

Firms hi chu sumdawnna lam hawi a ni a. Indian Partnership Act, 1932 hnuaia in-register theihna a ni ve thung a. Mi 2 talin partnership siamin sumdawnna lam hawiin an in-register thei a ni. Society erawh chu kan sawi tawh angin ram leh khawtlang tana rawngbawlna lam hawi niin, sumdawnna leh hlawkna siamna tur lam hawi pawl a ni thei lo a. A dintu pawh mi 7 tal an nih a ngai a ni. MSR Act, 2005 hnuaiah register ṭhin an ni kan tih tawh kha. Heng pahnihte hi thil hrang daih niin, a dan kengkawhtu erawh department thuhmun an ni ve chauh zawk a ni.

Society registration dil turte chuan Commissioner of State Tax Office, MINECO an pan vek a ngai a. Form leh model constitution vel an lak chhuah hnuah chumi zulzui chuan an constitution te duangin document pawimawh dang an tihfel hnuah an thehlut leh ang a. Aizawl District-a awm society-te chu Commissioner Office-a awm State Tax Officer (STO) ten an verify ang a. An verify hnuah registration pek tlaka ngaih an nih chuan registration an nei thei dawn a ni.

Aizawl District pawn lam erawh chu Commissioner Office aṭangin an awmna district-a Taxation Zonal Office-ah verify turin an thawn ang a. Anniin an verify hnuah Commissioner Office-ah vek an thawn let leh dawn a ni. A bul leh a tawp chu Commissioner of State Tax Office a ni tihna a nih chu.

Registration dilna hi online-in la thehluh theih rih loh mah se, https://zotax.nic.in/download.... ah kalin FORMS hnuaiah thil pawimawh zual en leh download theihin a awm a ni. ACT hnuaiah MSR Act, 2005 pawh download theih a ni bawk.

- C. Lalṭhazuala,

Vengthlang, Champhai