PAWISA NEI NGE NEI LO? THAWKINUN

Mizoram sorkar chuan pawisa a neih loh avangin Covid-19 dona atan Mizoram sorkar hnuaia hnathawkte hlawh a puk tih kan hriatna kha a la rei lo hle awm e, khatianga pawisa an puk tih kan hriat lai khan kan ram hruaitu zingah pawisa tam zia vantlang hriata la tlangau pui an awm tih hriat hian mipui chu kan bang a bo tlang mek a ni.

Mizoram budget chu a tlem tham avangin Mizoram sorkar in a hnuaia sorkar hnathawkte hlawh pawh a pe kim thei ta si lova, kan pawisa neih chu a tlem tih chu a chiang ta phawt a ni. Tichuan Minister ṭhenkhat hi chuan pawisa tam zia sawi hi an la tim chuang miah si lova, hei hi foreign funding tih a ni ta daih mai le. Minister ṭheuh ṭheuh hi pawisa hai chhuahna hria leh hre lo an an dinhmun a inthlau tihna a ni thei zawk ang em le? tiin ngaihtuahna kan seng zui ta a ni he kan ram dinhmun thlir hian.

Miin pawisa hai luh an thiam chuan an department chan chu a mawm bik mai tur a ni a, mifing chuan a fin man chu a dawng mai tur niin kan ngai ṭheuh awm e, tute tan mah thik theih a ni lovang. 

Hetiang thila zawhna awm leh chu "Foreign funding hi kan pûk nge a pekin min pe tawp?" tih hi a ni ta a ni, kan puk a nih si chuan sorkar retheih vanglai taka mirethei inkhaichhuahna tur ni si lo pawisa tam tham tak lo puk hi a puktute department hian an rul leh thei dawn a nih si loh chuan Mizoram tan leiba phurrit em em mai an hnutchhiah thei dawn tihna a ni zawk em? tihte hi a ni mimawl zawhna lo piang ta chu ni le.

Kan ram dinhmun tawn mek thlir hi chuan Mizoram sorkar lam hotu nih hi thil chakawm lo ang rum rumin a awm thei a, a chhan chu pawisa a tlem avangin hna an pe chhuak thei lo a ni. Tunah hian central sorkar project hnuaiah hian thla tam tak hlawh hmu tawh lo sorkar hnathawk hi eng emaw zat an awm mek niin an sawi bawk si a, chutiang mite hlawh tur zawk chu foreign funding hi puk dan a awm zawk lo maw pute u? 

Construction atan chauh hian em ni foreign funding hi a awm bik le? Tute nge contractor ni hlawm dawn a, tute nge a project siamtute leh a taka hnathawktu ni dawn? tihte pawh hi kan hriat chian a ṭha dawn a. Foreign funding hmanga pawisa puk hian hlawh leh Covid-19 avanga harsatna tawkte chhawm­dawlna hi a puk ve theih tho ang em construction lo lam hi? 

Pawisa neih loh vanga party worker tam tak an hawi hil lai hian pawisa neih thu sawi reng thei bik an awm a, party worker ṭheuh ṭheuh pawh an inthik ṭham tawhna dinhmuna kan awm mek lai hian Mizoram sorkar hian pawisa a nei nge nei lo tih hi tun thleng hian an che zia en hi chuan a la chiang lo a ni.