CHÎK ZÂWKIN MAMIT DC DINHMUN HI I HAN ZIR CHIANG VE THUNG TEH ANG U!

Mamit DC leh Karimganj DC te meeting minute-ah hian, a pawimawh ber lai chu a tawpa thutlukna (decisions) point pahnih an siam hi a ni. Chu point pahnih, sap ṭawnga ziak chu ka thiam ve tawkin, Mizo ṭawngin kan letling ve ang e. 

(i)     State pahnih (Mizoram leh Assam tihna) ramri tawn ve ve a thuneitute hian, remna leh mipui muanna vawnhim a nih theih nan state pahnihte inrina hmunhma tawnah hian an thawk dun ang. 

(ii)     Karimganj leh Mamit District thunei­tute hian, danin a phalsak pangngai motor chet velna, a bik takin nitin mamawh phur, entirnan, LPG (gas) phur leh a dangte chuan harsatna tawk lova state pahnih ramri an paltlang tawn chhunzawm theih nan, fimkhur leh theihtawp chhuahin hma an la zel ang. 

Khimi point pahnih zawng khi Mamit DC leh Karimganj DC te meeting thutlukna chu a ni mai! A hma lama Karimganj DC thusawi tarlan vel hi chu 'thutlukna' hian a huam lo tih chiang takin a lang. 

Kan hriatthiam theih dan turah chuan, Kohhran, NGOs, etc meeting minute-ah pawh hian, minute ziaktu (Secretary, Recording Secretary, etc.)-te hi an pawimawh khawp mai. Ṭha tih zawng leh, rilru âwn lam zawng deuh lo ziahluh (tarlan) bik hi thil awl ve tak a ni fo ṭhin! Mamit leh Karimganj DC-te meeting-na hmun leh, a lo dawngsawngtute hi Assam (Karimganj District) lam niin a lang a. Meeting minute ziaktu pawh hi Karimganj DC hnuaia mi a ni ngei bawk ang. 

Chu minute ziaktu chuan, a pu (Karimganj DC) tihlawm nan leh, an state ṭanfung sawh ngheh tum deuh ranin a ziak tih a chiang tawk hleah ka ngai! Mamit DC hian, minute-a tarlan, ṭawngkam hnih khat lek hi chu a sawi bik hauhin ka ring lo. Mahse, a thusawi tam tak chu tarlan telsak a ni ve ta lo tih a chiang hle zawk a ni! 

Mamit DC huaisenzia leh Mizoram tana a ṭan natzia hi kan hmuh hmaih zawk niin a lang! Ziah lan a nih ve miau loh avangin, mipui nawlpui hi chuan kan hrethiam lo a nih pawhin a mawh lo ve! An meeting decisions (thutlukna) ah khian, an meeting agenda no. 

1. 'Withdrawal of Police Forces of Mizoram from Choto-Bubirbond and Medlicherra Area of Karimganj district of Assam' hi a tel pawh a tel ve tawh eih loh hi! 

Karimganj DC Agenda No.1 hi, Mamit DC zahawm tak Dr. Lalrozama hian a hnawl fithla chiang hle a; sawi pawh an sawiho chhunzawm ta lo tih a chiang hle zawk niin a lang! Thutlukna (decisions) an siam bera a tel loh chuan, tu emaw thusawi kual vel mai mai chu phêk sâwm dang pawh tarlan ni eng ang mahse, ṭangkaina leh hlutna a nei chuang lo! Tum nei lâwk rân chunga Mizo mipuite rilru hruai kawi tumnaah chauh ka ngai! 

Meeting thutlukna (decision) ni lo, mi pakhatin meeting-naa a mimal ngaihdan a sawi, tarlansak a nih bik lai bawr vel kan chai ta luai luai mai hi a va fel hlel zâwk êm! 

Vai thangkamah âwkin, keimahni leh keimahni kan intibuai ta zawk a nih ber hi!