MPSC an muanchang em?
Mizoram sorkar hnathawk gazetted chin lak tura a thu ber leh buaipuitu ber Mizoram Public Service Commission (MPSC) hi a pawi-mawh em em a, sorkar officer tur lak chungchangah pawh politics inrawlh loa fair taka la tura beisei an ni. Sorkar hnathawk kaisang tur pawh an kutah a awm a, mahse an muangchang deuh
ṭhin niin a lang.
MPSC chairman leh board member-te bakah official-te hi an buai hle ang tih a rin theih a, mahse heti chung hian sorkar hna lak turah emaw, officer kaisang turah pawh thuneitu ber a ni miau si a, hengho awm dan tur hi an kutah thui tak a innghat tlat a ni. Officer kaisang tur a thla a thla hup beh an neih ṭhin hi a ngaihmawh awm khawp mai.
Sorkar officer an pension a, an hnuaia mite kaisang thei tawh, MPSC-in hun engemawchen a hupbet a; rei tak tak order chhuah hlei thei loa a dah ṭhin hi ngaihtuah chian a ngai hle a ni. Mihring vek kan ni a, officer kaisang thei tawh, MPCS-a tangkhang a awm hian kha officer kaisang mai tur kha zan khat mitchhin pawh tawk thei a ni.
Vanduai thilah kaisang hman loin a awm palh thei tih pawh hi MPSC hotute leh staff-te hian hriatpui thei se a duhawm khawp mai. Miin Tlumtea thlira an lo thlir, kaisang mai tura inngai si, thla khat dawn dawn an nghahtir fo mai hi a dik ber lo ang.
MPSC bakah DP&AR-a hnathawk-tute pawh duhthusam chuan an che rang lo niin a lang. MPSC-in kaisang tura order a siam tawh, chawlhkhar khat zette file an lo titang ṭhin hi a fel lo khawp mai. Mahni chauh in ngaih pawimawh chuan tumah tling kan awm lo tih hriat fo a ṭhat rual rualin mi harsatna siam tum tlat sorkar hnathawkah pawh a awm theih awm e. Hetianga file titangkhang ṭhin te leh MPSC hi in en fiah ngam chiang se.
MPCS chauh ni lo, department tinte leh secretariat-a thawktute hian hna-thawktute tana hamṭhatna awm ang ang rei tak tak hupbet ṭhin lo se. Pension emaw, kaisanna tur lam emaw, GP fund withdraw tur chungchangah emaw pawh ni raw sek sek; inneih lawmnaa kal chhuah vang emaw, mitthi awm vanga an hna an kalsan mai mai ṭhin a nih chuan en fiah deuh chi a ni.
Hetihlai hian Finance department leh a kaihhnawiha thawk-tute hi an fak-awm ngawt mai.
Sum khawihtute an ni a, file pawh Finance department emaw, Secretariat-ah emaw a tang rei lo hle a ni. Department danga thawktute pawh hian entawn se a ṭha ngawt a ni.
- Lalkhirhvela