Inkhawmpui leh ruai siam

Vanglaini chhuak-ah khan kohhran inkhawmpuia ruai siam chungchang a rawn ziak a, ngaih-tuahna titamah chuan a ṭha khawp mai a, mahse inkhawmpui tam takah hian chuan ruai siam a ngai ṭhin.

Ruai siam hi sawi chhiat ngawt theih a ni lo. Thingtlang lamah chuan Pastor Bial pakhatah khaw pahnih te, pathum te, a aia tamte pawh kan awm a, Bial Inkhawmpui kan neihin, zan riaka palaia kal ngei ngei a ngai a, zaipawlte pawh chuti bawk. Hetiangah hi chuan ruai siam hi a fel thlak ber a, lam hla aṭanga kal tan chuan Biak In chhehvela ruai ṭheh mai kha a awlsam hle.

Khawpui chhungah chuan a dan dang deuh mah se, ka hmuh leh tawn tawh chinah thingtlang lam aiin khawpui lam palaite an thatchhe zawk fo mai. Veng hnai tê tê kha Bial pakhatah an awm a, inkhawmpui ro rel zawhah chaw ei hi kohhranin siam ta lo se chuan khawpui chhunga Pastor Bialah te hi chuan zan lama inkhawm chhunzawm tawh lo hi a tam zawk an nih a rinawm.

Mahni in lama haw a, chaw ei puar hnua
ṭhutna chan loh hlaua inkhawm tura kal leh hi palai tam tak hian an peihin ka ring miah lo. Chuvang chuan ruai siam hi a pawina a awm loin ka hria.

Tin, Presbyterian Kohhran bik hi chu inkhawmpui hmanga inkaihruai kan ni a, chuvang chuan inkhawmpui hi kan ngai pawimawh hle. A ṭha thei ang ber leh a tlin thei ang bera thlen kan tum vek a, ruai nena kan inhmuah a, kan lo inlawm hian inkhawmpui kan ngai pawimawh a, a buatsaihtute lamin kan theih ang tâwkin kan lo inbuatsaih a ni tih kan lantirna a ni. Khawpui chhunga kohhran tam tak hi in hausa tih kan hria, budget in khumna pawh thingtlang lam kum khat tlin tawk aia tam mah te a ni âwm e. Hetiang Kohhran tan chuan inkhawmpui vawi khat ruai lo siam kha chu thil harsa leh rit a ni hleinem.

Kohhran tam tak hi tualchhunga sum lut hmanna tur em em nei tawh lo khawpa inbun nghet leh ṭha an ni fur tawh a. Balance tam tak tak nei an awm fur tawh a ni. Heng Kohhrante tan chuan inkhawmpuia palaite tana ruai siam hi a buaithlakna a awm lo.

Ruai siam hi Mizote tan lek phei chuan inlawmna leh thil ropui tehna pawimawh tak a nih avangin in-khawmpui thlengtu kohhrantena ruai an lo siam ṭhin hi dem em em chiah pawh ka ngai lem lo.

Mizote nunphung-ah chuan ruai nen meuha lung kan phun chuan kan ngai pawimawhin, a ropui thei ang berin kan inbuatsaih a ni tih lantirna a ni. Ruai telna tawh hi chu thil pawimawh leh ropuia kan ngaih a ni ṭhin. Chuvangin ruai nena inkhawm kan lo thleng ṭhin pawh hi Mizo tihdan takin a ṭha leh pui thei ang berin kan thlengin kan inbuatsaih a, he inkhawmpui hi kan ngaihlu tak zet a ni tih kan lantir a ni. Chuvang chuan ruai kan siam ṭhin hi thil pawi tak niin ka hre lo.

- H.L. Lalnunkima