PAWL THUCHHUAK

Mizorama pawl hrang hrang intâwk khawmte zingah nimin lawka Horticulture Service Association Annual Conference thuchhuak kha a danglam riau a, 'Thlai thar chhuah tipung turin theihtawp chhuaha ṭan lak zel ni se, an tih bâkah an thu zirho pawh thil deh chhuah tihpun (Increase in Productivity) tih a ni.

Kan eizawnna-in a zir bawk a, kum 20 chuang zet chu pawl hrang hrang Assembly leh Conference ilo thuchhuak hi kan theh darh tawh a, a cháng chuan Minister thusawi deuh chauhte hi puan tur hian a lo thleng a, engnge an tih chiah pawh hriat mumal tâk loh lah kan ngah. A report-tu hi sorkar lam an nih phei chuan lal thusawi bâk hi kan hre thei vak ṭhin lo.

Pawl thuchhuak kan hriat berah pawh - Kan service rule hi hei aia ṭha-in min siamsak rawh se... chumi khami chu tihpun kan phût... kan hamṭhatna hi ... chumi thleng kan nghak ang a.... loh chuan chuti khati ... tih lam, mi rawihin a ruaitu a vau titihna hi a tam duh khawp mai a, a ṭhen phei chu an hotu zinga mahni hmasial leh phakar deuhin pawl chakna hmanga sorkar an nawrna a ang thei hial ṭhin. A ràla khatah hian mak ka lo ti viau ṭhin a, kan thawhna lama ṭha zawka mipui rawngbawlna tur leh, thawktu zinga inthlahdah leh department tihmingchhe hialte han kamkhatna lam pawh awm ngai ta reng reng lo... chu chu kan duh ... kan ngen ... kan phût tih tâk reng hlawm mai chu ... ka ti fo ṭhin. Hengte avang hian Horticulture Service Association thuchhuak hian ka beng a verh zual tlat a ni.

Sorkar hnathawh hi lawmawm tak a ni a, dik tak chuan, tuna thawk mek tam tak aia tling leh thawk ṭha zawk tur tam tak hi hna hmu lovin an awm a, Matric ve ngawr ngawrte kamding tam tak an awm laiin, MA nula tlangval, sorkara lût hlei thei lo, duh ve ngawih ngawih site hi an tam khawp a. Veng pakhata MA tlangval chuan, 'Tûkṭhuan ei khama Peon pisa kai tur ka hmuhte hian ka awt ngawih ngawih a ni' a ti hial. Tam tak chu tlin leh phu vanga lût an ni ngei mai, a ṭhen chu tling lo chunga nawr luh an ni ve chiang a, a lak dan dik chu sawi loh, a dik loh em avanga lût an ni chauh zawk. Chuvangin mi tam tak, fel tak tak hi rilru na tak tak an awm reng tih kan hriat reng a ṭul a, kan luh dan chu eng ang pawh ni se, kan thawh tawh chuan lawm tak leh ṭha tak, rintlak leh ṭhahnemngai taka thawh hi mihring leh Pathian lakah pawh kan mawh liau liau a ni.

Chuti ta lova, lawmna cháng reng reng hre lo ang maia a vervêk leh a depde thei ang ber, a inthlahdah thei ang bera thawh tum ni àwm tak, duham em em ringawt reng kan nih chuan, engti zawng mahin a dik thei lo. Hotute rél reng mai chite hi kan awm a, lungawi si lo, báng law law ngam si lo, pisa kai pawh châk lo, kai lo thei tak tak si lote hi kan awm nual mai thei. Hetiang mi hian tute emaw hi an kheuh an kheuh a, an tikhawlo fo lehnghal. Mi khawngaihthlak an tling.

Hei ai chuan inti neitu takin - tun aia ṭha leh hlâwk zawka thawh dan tur te, ram leh mipuite tana hun tam zawk pêk dan tur te, thil danga inham buai lutuk lova kan hna thawhna lama hmasawn zel dan tur te hian kan rilru luah tam zawk se kan hahdam zawk daih ang mawle.

Horticulture Service Asso-ciation hi an ṭha ber ka ti hluah chuang lo, an thuchhuak erawh chu a danglam ka tih thu ka rawn sawi mai a ni e.

- RK Lianzuala