DEGREE LEH TITLE

DEGREE

Kan pate leh ute hun lai kha chuan Matriculate (pawl sawm pass) leh IA (Intermediate of Arts) diploma, matriculation zawha kum hnih zir belh, zir zote kha tunlaia Doctor of Philosophy (PhD) zir zote ai pawhin an hlut zawk mah a. Matriculate leh IA zawhah BA, BSc, MBBS, etc zir zote an lo awm leh zel a, khawtlangin an ngaisang takzet a ni. He thu ziaktu ngei pawh hi dâka (post office) lehkhathawn ka dawnah, lehkha-ipah “To, Mr Laiu Fachhai, BSc” tiha ka dawnte a awm ṭhin. BA, BSc, etc zawhah MA, BD, etc zir zote an lo awm leh zel a, anni hi chuanin an thiam loh leh an hriat loh awm thei tawh loh tura ngaih an ni. BD zir zote phei chu Bible zawng zawng hre vek tur leh hrilhfiah vek thei tura ngaih an ni a, khawtlang leh ramin an ngaisang takzet a ni. He thu ziaktu pawh hi dâka lehkhathawn leh sawmna ka dawn ṭhinahte Rev Laiu Fachhai, BSc, BD tiha ka hming tawpah ka degee ziah lan ngei ka dawng chamchi ṭhin.

MA, MSc, BD, MTh, etc zawhah PhD, DTh (Doctor of Theology), DSc (Doctor of Science), etc degree hmute an lo awm leh zel bawk a. PhD, DTh, DSc, etc te hi university degree sang berte an ni a, Master degree zir zawh hnuah kum 4-5 zir leh phawt a, ṭhenkhat phei chu kum sarih thleng te, academic research puitling beih hnuah leh finding thar neih hnua hmuh theih chauh degree-te an ni. “Doctorate” tih leh “Doctoral” tih hi thuhmun a ni em tih zawhna a awm thei. An inhnaih hle a, thuhmun (synonym) anga hmanna te awm ve ṭhin mah se, “Doctorate” chu noun atan leh “Doctoral” chu adjective atana hman a nih tlangpui. Entirnan, doctorate ni thei turin doctoral research beih leh zawh fel a ngai.

MBBS degree neite Doctor (Dr) tih an nih hian, anni hi chuan academic doctoral research puitling an beih lo va, Bachelor degree vel nei an ni a, chuvangin Doctor tiha sawi theih an ni ang em, physician tih zawk tur an ni dawn lo'm ni? tiha sawinate a awm ṭhin. Hman ṭhan tawh a nih avangin hman chhunzawm zel ni berin a lang. MBBS-te “Doctor” tiha koh an nihna chhan hi Latin docere (zirtirtu) aṭanga lo kal zel a ni awm e. Hmanlai chuan hriselna chungchang zirtirtu leh damlo enkawltute chu Doctor an ti mai ṭhin a, chu tihdanphung (tradition) chu hmang chhunzawmin, tun huna damdawi leh damlo enkawl lampang zirte leh thiam MBBS (Bachelor of Medicine, Bachelor of Surgery) degree neite hi, Bachelor degree a nihna chungin, Doctor tiha koh chhunzawm an ni ta a ni.

Academic research puitling doctoral degree bakah, hnathawk ṭha leh khawtlang, ram leh Kohhran tana pawimawh leh ṭangkai hna thawk bikte hnenah honorary doctorate degree (honoris causa) pek an ni a, Kristian sakhuana bikah chuan Doctor of Divinity (DD) pek an ni tlangpui. PhD, DTh, etc zawhah research puitling bei leh zet a, thil thar hmuchhuakte hnenah DLitt (Doctor of Letters), etc te pek an ni leh bawk. A bikin theological college/seminary-ten an pek, academic research degree ni lo, professional studies leh degree an tih Doctor of Ministry (DMin), Doctor of Missiology (DMiss), etc te a awm leh a, anni pawh hi doctorate title an hmang thei bawk. Tunlai khawvelah hi chuan doctorate phal tak leh awlsam taka pe thei institution-te, a bikin sakhuana lamah, an tam tawh a, hruaitute lahin Rev Dr, Upa Dr, Tual Upa Dr, etc title te kan ngaisangin neih ve zel kan thlahlel bawk nen, Dr title neih thar tur kan la pung dawn chauh niin a lang.

Bachelor degree aṭanga a chunglam degree-te hi sawrkarin a pawm leh recognized University leh recognized autonomous college-te chauhin an pe thei a. Bachelor degree leh a chunglam nei tawhte chu mi puitling anga ngaih an ni a, chuvangin an degree phua lehkhathiam, zirna ṭawng leh an thil zirte hria, finna leh remhriatna nei a, puitling nun nei tura beisei an ni. Chuvangin hming bula Dr dah a, hming tawpa degree tlar dul siin, lehkhathiam tur anga thiam si loh, hna thiam tur anga thiam si loh, thil hre tur anga hre si loh leh puitling tur anga puitling hleih theih lohte kan awm chuan, Chhim lam ṭawngkam takin, degree intlarte hmaikhap lohna a na duh hle dawn a ni.

Hming tawpa degree leh nihnate – BA, BE, MA, LLB, LLM, MBBS, BDS, BVS, PhD, DTh, IAS, IAS (Retired), IRS, IPS, MCS, MPS, MP, Ex MP, MLA, Ex MLA, MDC, Ex MDC, etc, etc – dah tel hi thil sual chu a ni hauh lo. Mizoramah erawh, ṭul loh hun leh hmunah thlengin kan hmang zel a ang tawh a, hetiang tihdanphung hi ṭhansan a hun tawh hle. Chutih loh chuan hmanlaia lehkha-ip hming ziahnaah thlenga BA tih ziah tel ang kha kan ang palh dah ang e. Mithiam nihna chu degree leh nihnate ziah lan kher loh pawhin, thuziak, khawvel thlir dan, hna thiamna, thiltih, ṭawng dan leh nunziaah te a lang mai ang.

 

TITLE

Dr title hman chungchang kan sawi tawh a, title dang chungchang sawi leh lawk ila. Mizoram State-a chengte hi kan hmingah title dah tel kan ngaisang hle niin a lang. Tunah chuan Dr tih chauh ni lovin, Engineer (Er.), Professor (Prof.), Advocate (Adv.), etc title-te pawh kan hming ziahnaah kan dah tel zel tawh a. Rev, Upa, Tual Upa leh Evangelist title-te pawh hi, hmun tin leh hun tinah kan hmang zel tawh niin a lang.

Kohhranina a pek Reverend title chungchang sawi zau deuh ila. Reverend hi a tawi zawngin Revd tih leh Rev tih hman ve ve theih a ni. Reverend tih chu Latin Revendus aṭanga lo kal a ni a, zahawm, zahtlak tihna a ni ber. Pathian title divinity nen inzawmna a nei. Reverend tih hi King James Version Bible hmun khatah kan hmu a (Sam 111.9), Pathian nihna (divinity) sawina atana hman a ni: “He sent redemption unto his people: he hath commanded his covenant for ever: holy and reverend is his name.” Chuvangin Rev title hi, title sang leh thianghlim a ni a, hman mai mai chi pawh a ni lo. Rev title pekte chu mi satliah ni tawh lovin, “mi thianghlim” an ni tawh tih a lantir.

He thu ziaktu hi Africa (Sudan)-a missionary hna ka thawh laiin ka zirtirna theological college aṭanga graduate pakhat, ordination pek inkhawmnaah thutawi sawi tura sawm ka ni ve a. Nemnghettu Bishopin-a nemngheh kan student hnenah chuan, “He clerical collar hi Reverend i ni tawh tih hriat nan leh tihnghehna atan ka vuahtir che a, Reverend nunzia anga nung lo va, thil sual i tih chuan, i Reverend collar hi kan phelhsak che ang a, mi naran, mi satliah (mere man) i ni leh ang,” tihin thu a chah a. Kha nemnghehna thu kha a nghet a, a tak a, a rit hle. Reverend atana nemnghet tawh a nih avangin mi satliah ni tawh lovin, Pathian anna, nun thianghlim nuna nung tawh turin a chah a ni.

Reverend title awmzia ka hriat avangin, he ziaktu hi Reverend title ka pu zo lo hlein ka hre ṭhin. Chuvangin mahni inhmelhriattirna ka neihnaah chuan, “Rev Laiu Fachhai ka ni, Rev Dr Laiu Fachhai ka ni” tihin ka inhmelhriattir ṭhin lo. “Laiu Fachhai ka ni,” tihin emaw, “Pastor Laiu ka ni,” tiin emaw ka inhmelhriattir mai ṭhin. Ka article leh lehkhabuahte phei chuan Rev emaw, Rev Dr tih emaw ka dah lo. Editor leh Publisher ṭhenkhatten anmahni thua an lo dah changte erawh a awm ṭhin.

Kohhran Headquarters-a hruaitu ka nih lai pawhin, report leh lehkhathawn ka ziahnaah te Rev leh Rev Dr titlete ka hmang ṭhin lo va, Assembly Central Working Committee-in, “I lehkhabuah leh Article-ahte chuan Rev emaw, Rev Dr emaw i hmang lo a nih pawhin, Kohhran hminga report leh lehkhathawnahte chuan Rev tal chu hmang la kan duh,” an tih avangin, kohhran hminga report leh lehkhathawnahte chuan ka hming bulah Rev ka dah ṭhin ta a ni. Ka sawi tum ber chu, Reverend title hi title thianghlim a nih avangin, he title pekte chuan, kan title nena phua dikna, rinawmna, thianghlimna, hmangaihna leh taimakna nuntea nung tur kan nihzia kan hriat reng a pawimawh hle a ni.

Rev, Upa, Tual Upa, Dr, Er., Prof., Adv., etc title-te hi, hmanna tur hmun leh hunte chu a awm ṭhin ngei ang. Chutih laiin, an thiamna leh title an hmuhna nena inzawm hna thawk tawh lo va, politician, NGO hruaitu, businessman/woman, etc te an nih hnu thlenga Rev, Upa, Tual Upa, Dr., Er., Prof., Adv., etc title-te keng tel zel a, ziah lan kher zel erawh, thil ṭul ber a ni em, tih ngaihdan neite an awm tan mek tawh a ni. Title ngaihsan luatna leh ngaihhlut luatna nun pawh hi ṭhansan a hun tawh bawk. Chutih loh zawngin title uarna leh uanpuina chapona sualah kan tlu palh hlauh dah ang e. Lal Isua chuan kan title leh degreete aiin kan rinna leh nunzia a ngai pawimawh zawk ngei ang.

“Juda mi ka ni a, … Gamaliela ke bulah chuan zira sei lian ka ni…” (Tirkohte 22.3). “Duh phei ila, kei pawh tisa chunga rinna nghat thei ka ni asin. Mi dang rêng rêngin tisa chunga rinna nghahchhan neia an inruat chuan, kei ka inruat lehzual a ni... Nimahsela, ka tâna hlâwkna tûr apiangte chu, chûng chu Krista avângin chânnaah ka ruat ta a ni” (Phillipi 3.4-7).

 

- Laiu Fachhai