UICHO

Bible hian hmun tam takah Ui chu a sawi tuitang lo khawp mai. 'Uiin a luak hnu a ei' tihte, Thiam loh chang in chhunga awm ve lo tur, 'Pawnah chuan ui te, inngaih hmangte, dawhehte, mi bum hmangte an awm ang," te a ti a. Deuteronomy 23:18 ah phei chuan," Nawhchizawrh man emaw, uicho man emaw, thutiam nan Lalpa in Pathian Inah in keng tur a ni lo; a eng ve ve pawh chu Lalpa in Pathian ngaihin thil tenawm a ni," a ti hial.

'Fimkhur rawh ui a awm' tihte, 'Ui a hlauhawm' tih vel mahni Gate bul vela tar ṭhinte hian, 'Lo leng suh, in leng neih kan duh lo. Mizo Society intlawhpawh ṭhinte aṭang hian kan inthiarfihlim e' an tihna nge ni ang a, an inah chuan Pathian phal loh thil emaw, Sawrkar leh Vantlang phal loh thil an ti ṭhin ang a, tlawhpawh an duh lo zawk? Nge ni, an nun lairil a fair vak lo ang a, chhunglama thlamuanna leh inrintawkna an tlakchham avangin intih Confi. nan an duh zawk? Nge ni, hetiang tar hi tunlaina leh changkanna, mite ngaihsan hlawhna niin an hre zawk? Changkanna mawl tak a ni ang. Mahni mihringpuite tana hlauhawm tak leh thil pawi nasa tak thlen theitu chu tihb oral emaw, hlauhawm lo tura dah bo mai awm?

Heng mite hi Sawrkar thil leh Sakhaw thilahte, Vantlang thil leh inṭhenawmkhawvenna thilahte hian anmahni duh ang ngei hian tlawhpawh ta lo ila, nuam an ti ang em?

Hmun fianrial leh ramhnuaia khawsate chuan lo vulh pawh ni se, a àwm. Khawpui chep lutuk, In insi khepkhup kara mi rilru changkang dik takten changkang tak leh, mi dang tana hnawksak miah lova ui an vulh avanga keini'n, mawl tak leh thatchhe taka ui vulh lo tum ve tlat hi a mak a ni.

Ṭhenkhat phei hi chu ni tin mi varanda leh kawtkai velah an e a. Kawng kal apiang an lo ngur chhur chhur a, an lo bauh tuar tuar a, an lo hap zuau zuau bawk ṭhin. Mahni ui lo chu tu tan pawh an nelawm loh va, an tenawm a, an hlauhawm vek a ni.

Chutianga mi kawng kal nuam ti lo tak leh thlabar taka an awmte, naupang phei chu ṭap tuar tuar chunga an tlanchhe ṭhin chu ui neitute chuan hmuh nuam an tiin, intihtheih nan tak an hmang emaw tih turin an khung bo duh reng reng lo a ni. 'Hlau suh, a hlauhawm loh' an han ti ringawt a, a neitu lo chuan tu ui pawh hi kan hlau vek. Eng eng Sap hming emaw hian, bobo, pipi lo kal rawh, kha tin ti suh, an han ti nem duai ṭhin a. Hengho hi mi dang ui kawlh leh á bawk hian um hrep se la, ui vulh chungchangah hian rilru dang an séng ve ngeiin ka ring.

A ṭhente lah hian, 'Kan ui hi kan chhungkaw member anga kan en a nia' te an han ti a. An chhungkaw member chu mi khawlaia e ṭhin, mi hnim dun duna mi bauh vak vak ṭhin an ni emaw ni?

Ui hian mangang tak leh thlabar taka mihringte a awmtir ṭhin bakah, ui seh avanga chhungkaw buaina hi a nasa em em a. Inenkawlna man a to va, rilru a nuam lo va, tha leh hun sen a ngai nasa em em a ni. Mi tam takin an lo thihpui tawh bawk a ni. Bible pawhin Philipi bung 3 ah, " Ui lakah te chuan fimkhur rawh u," a ti chung hian, ni tina Damdawi In report-ah hian ui seh eng emaw zat la awm reng hi tute thiam loh nge? Natna dang sawi lovin, ui seh vanga buaina hi chu thatchhe tak leh mawl taka ui mawl vulhtute vang a ni.

Mihringte mangang tak leh thlabar taka siam ṭhintu, mi dang tana hnawksak em em leh ninawm, Bible pawhin a hmuhsit em em uicho kawl tlattute hi, eng mi pawh ni se la, an ui buaipui viau avang hian kan ngaihsan phah sawt nge, ngaihdan tawk kan nei?

Engpawh nise, mi ṭha leh rilru dik, mi piangthar ṭhate chuan mi dangte tana hnawksak leh, mi dangte tana hrehawmna thlentu nih an duh lo. Mi dangte tana malsawmna, thlamuanna leh hahdamna thlentu nih an tum tlat ṭhin.

- K.Hmingthankaia