MP atan tu nge ṭha ber ang?
Lok Sabha-a Mizoram aiawhtu tur thlanna a hnai ta hle mai. Political party leh candidate-te pawh meikawhin an ṭang mek a, mawngvawmbâ ang maiin an hmanhlel mek a ni. MP atan tu nge ṭha ber ang le?
Kan inthlang turah hian thâwm ring deuh nia ka hriatte chu–central minister tura inzawrhna te, Kristiante leh hnam tênau tana BJP an hnawk nia puhna leh BJP thawhpui tur anga party dang puhna te, ram leh hnam humhim tura beihna chungchang te, thlan tlinte Parliament-a ṭhutna lam tur chungchang te, Parliament-a thu sawi chungchangte a ni.
Candidate zinga pakat chu Rajya Sabha MP ni lai a ni a, tawnhriat nei tawh a nihna leh kum thum vel chhunga Parliament-a vawi 15 vel thu sawi tawh a nihna hi an party chuan an sawi vâwng hle–a âwm viau mai. Tun hmaa MP kan neih tawh ṭhinte'n thâwm an nei lo em a, chu'ng ho chu ani hian a rawn dah nil hle–thu sawi chungchang bikah.
Chutih rualin, Parliament-a thu sawi tam hrim hrim hi MP ṭha tehna ber tur a ni lem lo a, Mizoramin a MP a chhawrna leh hlâwkpuina lai ber pawh a ni lem lo. Parliament-a Mizoram thil sawi chhuah ve ngei ngei awm chi chu a awm ngei ang, chutiang hunah chuan MP dangte leh India ram pum hriat tura sawi ngei thei erawh an pawimawh.
Parliament-a thu sawi thei, sawi ngam MP neih a ṭha. Mahse, thu sawi ve hrim hrim aiin, Mizoram tana hlâwk tur zawng thiam leh bawhzui chak te, Mizoramin project a thehluhte a bawhzuina tur taka lo bawhzui chakte hi Mizoramin a hlâwkpui ber zawkin a rinawm.
Central sawrkarah khuan ministry hrang hrangah thil hai chhuah theih tam tak a awm a, chungte chu hre fuh thei leh hai chhuak tura kawng zawng thiam an pawimawh. Pawl leh mi tu tute emaw chuan central aṭanga thil hai chhuah theih dan leh a kua an hre fuh laklawh a, project an siam a, an hai chhuak nawlh nawlh zel mai.
Chutiang deuh chuan MP atan pawh Parliament-a thu sawi chuh chak ai chuan, central ministry hrang hranga Mizoram hmasawnna tur thil hai chhuak thiam leh thei an ṭha zawk mah ang a, Mizoram pawhin a hlâwkpui zawk ngei ang.
MP chu a tak taka project siama che tur an ni miah lo a, mahse, thil hai chhuah tur awmte zawng chhuak thiam, hmu fuh thei leh a hai chhuaktu tur–state govt, agency, leh a dangte kawng kawhhmuh tur leh lo bawhzui zat zat turin an ṭangkai hle thei a ni.
Chutiang thil ti tur chuan tu nge ṭha ber ang le?
- Zoramchhana