MPSC vs MZP

Combined Civil Service Examination, 2023 result tihchhuah takah thil fel lo tam tak a awm niin MZP chuan an ngai a, hemi avang hian MPSC Chairman chu bang turin an phut tih kan hre vek awm e. Thil awm dan nia ka hriatte thai lang dawn teh ang.

1) Answer sheet-a Mark pek tawh thai chhiat

Mains Examination Answer Paper-ah Mark pekna thai chhiat eng emaw zat a awm a, correcting fluid te hman niin thai chhiat a nih chhan a inziak lem lo niin a lang. MPSC khan Press Conference-ah an thai chhiat chhan leh Evaluation an tih dan bakah Exam an kalpui dan tlangpui an sawi tawh a, thai chhiat awm chhan pawh Answer Paper check-tuten a hmun ni loah Mark an pek vang niin an sawi. A pawi lai ber nia lang ta chu an thai chhe kher kher kha a ni. A hmun ni loah Mark pek pawh lo ni se, a nih ang ang khan kaltlangpui ta se a dik mai tur.

Kha'ng thai chhiat awm niai nuai kha chu a Answer Paper neitu tan chuan rinhlelh loh theih loh a ni ve bawk a ni. Tin, rinhlelhna tizual tur tingin Mains Exam Answer Paper kha Photocopy dil chhuah an han phal lo leh ta nghal a, kum danga phal ṭhin ni si kha. A hnuah erawh ngenna a tam avangin phone hmangin thlalak erawh an phal leh ta niin sawi a ni.

2) MZP hmalakna ve thung

Mizorama kan zirlai pawlte hi eng issue-ah pawh an ‘alert’ em em ṭhin hi an fakawm hlein ka hria. Tuna MPSC chungchanga an hmalakna pawh hi hmalakna awm tak, an tih awm tak a ni. Chutihrualin an hmalak danah erawh thil an zir chiang lutuk lo deuh em aw? a tih theih.

MZP-in an Press Conference hnuhnung zawka an sawi, MPSC-in Police Service-a tling tawh pakhat Supply Inspector Interview tura an koh thu leh, Forest Service Exam chungchang an sawi telte kha thil an zir chiang lo hle tih a lang. Supply Inspector Exam lai khan Combined MCS result a la chhuak lo va, tunhnaia Supply Inspector Written result a chhuah khan Screening atan MPS tling tawh pakhat hian a document a submit ve leh tho niin sawi a ni. Hetiang a nih avang hian MPSC chuan Police Service-ah tling tawh mah se, Supply Inspector-ah pawh written a inziah tlin miau avangin Interview turin a ko lo thei lo a ni. Interview-a appear leh appear loh chu ama thu thu a ni tawh mai. Heng aṭangte hian MZP hruaitute hian MPSC kalphung leh thil dangte hi an hre chiang lutuk lo tih a lang.

MZP hmalak mekna hi Gauhati High Court, Aizawl Bench a thu inchiah mek a ni a, hengte pawh hi ngaichang thiam se. Honorable High Court thutlukna ang angin MPSC pawh a kal mai turah ngai ila. Tin, MPSC lamin inkawma sawiho tura an sawmna MZP lamin an hnar kha a puitling lo zia hlein ka hria. Sawiho hnuah an la lungawi lo a nih chuan Agitation kalpui pawh a awm viau ang chu. Tuna a lan danah chuan MPSC Chairman hi bantir hrim hrim an tum a ang a, an mawng hiattu an awm emaw ni chu aw tih mai palh a awl.

Polictics-ah a ni emaw thil dangah pawh ni se, a enga mah hmaa ‘bang rawh se’ intih fo hi a Mizo kristian zia lo deuh em aw ka ti ṭhin. MPSC Chairman hi lo bang ta pawh ni se, thil dik lo nia sawi awm hi a fel phah kher lo vang. Hei aia changkang deuh zawk, Court-a kal emaw Magisterial/Judicial Inquiry emaw phut zawngte hian hma la thiam ta ila, a effective zawkin ka ring.

3) MPSC fakselna

MPSC thlavang ka'n hauh deuh reuh rual hian duhkhawp lohna tam tak ṭhalaite hian kan nei ve bawk a, hengte hi MPSC lam pawh hian inenfiah nan leh hma sawn lehzual nan hmang hram hram se a duhawm hle mai.

(a) MPSC hian hma an sawn. Group B (Gazetted & Non-Gazetted) hna ekzamah Answer Key an tichhuak ta hi a lawmawm hle. Tin, hna ekzama tlingte Mark hmuh zat an tarlan ṭhin kha chhunzawm zel se a duhawm hle a ni.

(b) Hma an sawn kan tih rualin tun ai hian langtlang (transparent) lehzual se la a duhawm hle. RTI Act hmanga thil dilte hi an har deuh ṭhin em aw a tih theih. Hman deuh khan RTI Application Fee atan Rs 50/- te an lak ṭhin thu sawi a ni. Department dangah Rs 10/- a ni si a. Tin, mahni Marksheet/Answer Sheet Photocopy dil chhuahte hi a har deuh em aw? Constitutional Body an nihna hi an inchhuang lutuk deuh em ni? An din chhan Mizo ṭhalaite hi ngai pawimawh ber se.

(c) Group B leh a dangte exam Question set chungchangah MSSSB kha an phak lo hle niin a lang. MPSC exam question ṭhenkhat hi chu internet-ah han browse ila, a ngai ang deuh chiah chiah hi hmuh tur a lo awm fo mai. Question setting-ah ṭan la deuh se. Tin, Group B Non-Gazetted bikah Group A ho nena inlalawn chho thei tur hian General Studies ang zawng hian question set ve tawh se.

(d) MPSC hian hna lak tur an ngah leh dawn. Tunhma anga hna lak a muan leh vaih chuan a tuartu tur chu ṭhalaite bawk an ni. Mizo ṭhalaiten MPSC performance an thlir reng dawn a, an hmalak dan azirin ZPM Sawrkar pawh an faksel phah ngei ang, a chhan chu MSSSB ṭhiattu an nih avangin.

Engpawhnise, hetianga boruak a lo awm ve leh zeuh ṭhin hi thil ṭha zawk duhna vangah ngai ila. Kan MZP te pawh ram leh hnam tan, zirlaite tan, tun aia thil chik leh zir chiang zawk chungin hma la zel se. Tin, Mizoram Public Service Commission (MPSC) pawhin inenfiah nan hmang se, hmasawnna rah ṭha zawk rawn paw chhuak ngei se a duhawm hle a ni.

- Lalnunmawia