MAHNI TUH RAH SENG

A KAMKÊUNA

Kut hnathawktuten eng thlai pawh an chin emaw, eng buh pawh an tuhin an tuh leh chin ang bawk an sengleh thin. Pathian thua kan hmuh angin miin a theh apiang, chu mi vek chu a seng bawk dawn si a; tih leh, Khawlohna tuhtu chuan vanduaina a ât ang a, A thinurna talhtum chu a hlawhchham ang tihte bakah, mi suaksual chuan bumna hlawh a dawng ṭhin a, felna tuhtu erawh chuan a tak tak hlawh a dawng ṭhin tih a ni bawk. He khawvela kan damchhung hian mi tinte hian kan thiltih ang zelin kan tuh rah chu kan seng ṭhin a ni. Mi nunrawng chu nunrawnna bawkin a tlakbuak a, mi sual chu sual bawkin a chim buai ṭhin. Isua hova kum 1000 rorel hunah pawh mi tin kan thiltih ang zela relsakin kan la awm dawn a ni.

TUTE NGE RELSAKA AWM?

Tunlaiah social media a ṭangkai hle laiin khawtlang, mimal, pawl leh sorkar tan harsatna tam tak thlentu a ni thei bawk. Social Media cyber bullying, tharum thawhna, sexual content awm siamte leh a ṭha lo laite hian kan ṭhalaite nungchang leh vantlangah nghawng ṭha lo lian tak a nei a ni. Facebook, Youtube, Instagram etc-te hi han huithlak {scroll down} ṭhinte hian meizuk, zu in, sex hman, leh mi dang tihbuai video an phochhuah hmuh tur a awm fo a. Social media hi negativity-in a khat a, ṭhalaite suala hip luhna awlsam tak a ni. Naupangte'n social media-a mi ṭha ber berte thil ṭha ti lai an hmuh tamte hian an ngaisang hle ṭhin. Cyberbullying chu mi pakhatin technology hmanga mi dang tihbuai, vau, mualphona emaw, target emawa a tih hi a ni. Smartphone, computer, tablet, leh gaming system ang chi device-ahte a thleng ṭhin. Cyberbullying hian mi a tina a, a ṭhen phei chu dan kalh a ni.

Mizoramah phei chuan thu belhchian dawl lo, dawt ngialngan, mi tihhmingchhiatna, zahmawh rawngkai, sex video, zawlnei der fakna, politician fakselna rintlak lem loh, smuggling sawi mawina deuh reuh, hnam inpumkhatna tichhe thei lam chi leh fiamthu dukdak lo, mipui rilru tihchiaina thu va-uk mai mai thlengin Social Media hi dik lo taka hmanna a tam hle niin a hriat theih. Hetianga huaisen taka kan hman mek hi sim hmak a hun tawh hle.

FIMKHUR A HUN E

MAMCO chungchanga inbumna case Court thubuai rem tawh, ZPM party MP Candidate beihna tenawm tak nia ngaih theih vawrh darh mektute pawh hian an tuhrah an seng dawn niin ZPM Party legal department thuchhuah chuan a tarlang a. Social media-a mi dang beihna leh print media hial pawh dik lo tak leh huaisen taka hmang ṭhinte hi, China ram ang khian khauh taka khuahkhirh ni se a van tihzia dawn tehlul êm! Hemi chungchanga thu vawrhdarhtu hmasa David Sailo pawh hi ziaktu puitling tak nia ka lo ngaih laiin, zirtirtu lak chungchanga a thu chhuah dikhlel lai awm chungchangah kei ngei pawhin fimkhur turin phone-in duhsak takin ka hrilh tawh a, tuna hetianga court thurel fel tawh a rawn thai lang leh nia langte hi ziaktu puitling a nihna aṭangin a intihniam (degraded) niin a lang.

Tin, Youtube lama pho chhuaktu Tuesday Nightmare phei hi chuan hmeichhia tih takah a thupuan chhuahte kha tuikhur ràl a kai lo hle niin a lang; Side A & B thlir miah lovin a puang vel pap pap mai kha mak ka lo ti hle reng a. ZPM Legal Department lamin an han sawifiah ve meuh kha chuan thu va-uk mai a lo ni leh si! Chuvangin, subscriber ngah duh vanga Youtube lama thu belhchian dawl lo vawrh darh chiam chiamte hi sim a hun tawh hle. Mi hi fakna tur kan hre lo a nih pawhin sawisel lovin ngawi mai ila, kan inhnukhnawk lo a ni mai tur. Tuesday Nightmare-i pawh hian Criminal Complaint hi a cho hle niin hriat a ni a, a tuhrah a seng chuan cho hle mah se a buai ve hle tho chu a ngai dawn a, a hlawkpui vak lem lo mai thei. Court thubuaia inhnamhnawiha puan ṭalh ṭalhte ang thovin thubuai a nei ve dawn tihna a nih hmel. I lo thlir zel phawt teh ang.

A TLÂNGKAWMNA

Kum hnih khat kal ta aṭang khan Social Media hman sualna hi Zoramah a hluar hle niin a hriat theih. District Jail leh Central Jail-ah pawh cybercrime avanga tang, bel lianpuia chaw chhum ei mek an awm nual mai. India ramah Telangana state hi hetiang lamah hian a sang ber a; Madhya Pradesh leh Bihar-ah a tlem hle thung. Literacy percentage leh Kristian percentage-ah kan san fal bik vang nge ni ang, kan ram mipui tam zawng nena khaikhin chuan thil pawi tak leh zahthlak tak a tling tlat.Thil hria nih kan duh luat avang leh a hmasak inchuhna nasa tak avang hian a bik takin Zoram YouTuber-te leh, ziaktu ṭhenkhat zingah rintlak loh leh belhchian dawl lo an tam hle niin a lang.

Hman lawka Auto Rickshow Driver Pu Zoasa thah a nih chungchangah pawh khan thu dik leh dik lo pawh hriat theih loh khawpa YouTuber-ho leh, eng pawl pawl emaw ni an han pau chiam chiam maite leh, Pu Vanlalsailova dawta an puhna zozai te, Zokhawthara Burma kuhva phur truck 11 check gate paltlang anga thehdarhte kha kan nawizia tilangtu a ni chiang hle. Tunah pawh ZPM Party MP Candidate beihna a lo lang leh ta. Social Media hi a ṭangkai zawnga hman chuan thil ṭha tawp leh changkanna ropui tak a nih tehlul vei nen, kan Zoramin heti taka a hmang sual (abuse) nasa lutuk hi chu a ninawmin a zahthlak takzet a, chuvangin, Sorkar hian Mizoram Police Cybercrime Branch hi a ṭha thei ang berin thuam chak se; dan bawhchhetute chu tu pawh ni se la, dimna nei miah lovin Case awrhtir hmiah hmiah se, tun ai hian kan kal ngil sawt ang a, a reh hlauh theih phei chuan a tihzia ngawt ang.

Chhiah hnuhnung ber hi cybercrime a pun chhoh dan chiang tak nen a inmil a, hei hi mi thiamte chuan internet leh mobile hman tamna nen a inzawm niin an sawi. Mizorama cybersecurity leh crime chungchanga awareness level thlirlet danin internet aṭanga hlauhawm hrang hrang, Social Networking Sites (SNS), leh inbiakpawhna emaw computer-oriented crime dang, cyberspace-a an hriatna langsar tak takte chu ngaihtuah tel a tum a ni. Tunlai technology hunlai hian cybercrime hi mimal venhimna, ram venhimna, leh mipui himnate pawh huamin kawng tinrengah harsatna lian tak thlentu a ni. Mizoram police department-in cases history record-a a pek angin survey neihna atan hian zawhna chhanna mumal tak siam a ni. He zirchianna result hi rawtna pawimawh tak a nih avangin mipui nawlpui leh a bik takin Mizoram tana circle hrang hrangin an kalpui a ngai a ni. Crime victim-te hian an information details capture turin thil mak zawk an hriat loh laiin, hriat tur tam tak a awm a ni. Tun hnaiah Mizoramah cybercrime case hi a pung chak hle a, tun thlengin case 1,033 chuang ziahluh a ni tawh niin state Director General of Police chuan a sawi.

Engpawhnise, sorkar hian Social media hi vil ngun se, khauh zawkin dan lek kawh se, mahni tuhrah sengtir tlakte chu an tuhrah sengtir zel se, tun ai hian Social Media hi then thianghlim a ni ang a, kan buaina tam tak hi a kiang mai dawn a ni.

- Dr. C. Lalrampana