Smuggler tân Zoram Police!
Tunlai Zoram titi pakhat rangkachak bo chungchang hi case mak danglam ve tak zawng a ni awm e. Dan kalha rangkachaka sumdawngin a rangkachak a tibo a, a zawngin Police te an vei hut hut a, an tlaivar pap pap nia maw le. Miin dan anga a neih tibo a zawnpui chu ni se a awm viau. Dan loa sumdawngin a sawi dan chuan dan loa a thil neih chu dan lo thoin miin an chhuhsak ni awm tak a ni.
Miin dan loin ka sumdawng a ni, a ti a; khawhar in vela titi khawmna ang chiah a sawi a ni lo, law and order (dan leh thupek) kengkhawhtu Police te hmaah a ni, a sawi. Chumi awmzia chu dan lovin a sumdawng tih a sawi kha sawi satliah a ni lo a, sap ṭawnga 'authentic/ genuine' an tih ang hi a ni awm e. A thil sawi chu law and order kengkawhtu Police te pawhin thu tling (genuine)-ah an ngai a, an bawhzui vut vut pawh a ni. Mahse, hetianga dan lova sumdawnna lampang dang tura chhun zan zawma duty te chu an che eih lo. Dan loa sumdawng hi an man hreh hle ni maw?
Complaint a awm loh avanga man lo an ni ang han ti dawn ila, dan loa sumdawn chu a pawi lo, complaint a awm loh phawt chuan tihna a kawk deuh vu a, chutiang ngawt chu a ni thei si lo.
Dan loa sumdawnna khuahkhirhtu turte chet loh chu sawi loh, dan loa a sumdawng pa chungchanga FIR dawngtu Police te pawhin chu pa chu an man chuang lo. An man thei lo pawh ni loin a man turin an che eih lo nia! Tin, a Police te tak pawh hi dan loa sumdawngin sumdawn nana a hman rangkachak chhuhtu ni awma an rinte kha an man tawh a ni a, chungho nena inhmachhawntir chu Police hian an ngam lote pawh a ang. He thil hi a ril hmel reih reih ka ti.
Tih loh theih pawh a ni lo. Dan loa sumdawng zawk kha Police tan umzui a har lo em alawm. Mahse, chawlhkhar khat zet chhung pawhin an ti thei bawk si lo.
Eng pawh ni se tuna rangkachak bo ang hi 'rarest of the rare case' an tih ang hi a ni ve hrim hrim awm e. Thu hmawrbawkna hian awmzia a la nei thui khawp pawhin a rinawm.
Rangkachak bo kha hmu let leh ta se a tibo-tu kha dan loin a sumdawng tih finfiahna ṭha tak a ni dawn a, chuvangin hrem a ni ve ngei ang em? Hrem ni ta lo se tute nge mawhphurh ang? A nih loh leh rangkachak kha hmuh let ni ta lo se dan loin ka sumdawng a ni titu kha a thusawi avangin hrem a ni tho ang em? A kut aṭangin rangkachak man a awm lo a, a nei tih pawh ama sawi chauh lo chu finfiahna a awm lo tihna a ni dawn bawk a. Rangkachak hmuh let awm loin a chhuhsaktu ni awma rinte kha a chiang tho e tiin hrem ni ta se, chutih laiin a sumdawnga erawh chu a bungrua ber a awm loh avangin hrem theih a ni lo tihte han ni dawn se dan lo va sumdawn chu sual pawh a ni lo tihna a ni ang em? Sorkar hnathawkte kan tham lungawi a, kan bungrua kan hum theih chhung chu dan lo pawha sumdawn mai tur ni awm tak a ni.
'Self incrimination' ngaihhnathiamna a awm thei ang em? Awm thei se, chutah chuan dan lo a sumdawnga chu a him thei ang em? A nih loh leh dan loa sumdawng mah ni se Sorkar lama a ṭan avangin a ngaihhnathiam theih, a tih theih em? Theih ni se eng chen hi nge Sorkar lama tang chu ni ta ang?
Dan hremite thu leh hla hriat a chakawm ngawt mai.
- Lalremruata