Intuituah Inkhawmpui tih kha

Hun rei tak chhung ka vei ve tawh article hmanga an rawn sawi chhuah takah chuan a thlawptu nih tal chu ka ngam ve turah ka inngai. Kelkang kal ve tho ka ni a, siam
ṭhat duhna thinlung pu chunga Martin Luther-te che vel ang em lo mah ila siam ṭhat duhna vanga ziak ka ni tih erawh min hriat pui ula.

Ṭum khat chu Sy-nod Inkhawmupiah hian kan chhung hnai pakhat hi Pro Pastor-ah an lalut ve dawn a, ka inkhawm ve a. Patling ṭhan kin zet ni mah ila Synod Inkhawmpui palai ka nih ve phak ngai loh avangin hei hi Synod Inkhawmpui ka chhim vawi khatna a ni. Inkhawm kan bang a, thingpui kan han in ta chu le, Mizorama pui-puna thil sem tuina ber chu Synod Inkhawmpui a ni tih chu keia kal ve phakna chinah chuan a ni chiang kher mai.

Sorkar conference leh meeting pawi-mawh-ah pawh ka tel ve fo tawh a, Synod Inkhawmpuia thingpui hmeh nge nge midangte tan chung en loh theih a ni lo. Chhang chi li bakah thei an sem tel a, an chhang man tam tur zia kha tun hnaia inneih kan buaipui hian ka hre chhuak chiah mai a, kha kha chawhma inkhawm bang thingpui hmeh mai a ni si.

Ziaktu hmasa thu ang khan kei pawh hi Bial Inkhawmpui vel hi ka palai ve phakna a ni a, tun hnai mai ni lovin hun eng emaw chen chu chhang hi kan insem tui siak niin ka lo ngai ve tlat pek a. Chhang tui leh puarna awm tawk vela lungawi ta mai lova, Mizorama chhang sem tur tawk vela a man to ber ber hlir Aizawl khawpui kohhran pangngai chinin kan sem ta hi chu kan ei tui lua lo maw ka ti ṭhin. Kan ei leh ina insensona zat hi chhut chiang ta chiah ila chu ramthara kan thawhlawm thawhte hi kan sit thar thei hialin ka ring.

"Kan thawhlawm tling khawm a ni a, kan duhnaah chuan kan hmang ang chu," tih rilru pua he thu hi kan chhiar a nih phei chuan Kohhran hian sawiselna ṭha (constructive criticism) hi a ngai thei loah kan ngai thei mai dawn a, miin rawtna an siam hi chu, "A ni thei tak ang a?" tia ngaihtuah zui chi a ni. Kohhran Committee chin leh a
ṭhi beh chin ngaidanah chuan, "Inkhawmpui thil chanchinbua ziak tur a ni lo, kohhran beih tumna mai mai a ni," an ti ngei ang a, amaherawhchu keini ang duang tan Kohhran committee-a ṭhut ve a theih dawn kumkhua si lova, kan thil vei sawi chhuahna kan neih chu chanchinbu hi a ni mai.

Mahni mawng hlimah inngai lo ila, Kohhran member-in Kohhran siam ṭhat ve a duhna kawng a ziakah min ngaihsak ula, Kelkang vanglai pawhin mahni ngaihdan kan sawi nasat ve tho kha, tiin ka inhnem mai a ni.

Kan ruaiṭheh sen-so tam turzia leh khaw-puiah chuan veng inhnai te te, rei lo tea kal thlen zung zung theih kan nih tawh hnua Biak Ina badge bela Bial Inkhawmpui Palai chinin chawhlui kan kil dur dur hi chu thingtlanga khaw hran aṭanga palai zanriah an insiam sakte nen chuan a inang thei lo. Intuituahna rawngkai a ni ve lo maw kan menu han thlir vang vang hian? tiin ka ngaihtuahna a vak vel ṭhin a ni.

- Lalthanmawia