Pension tawhte an khawngaihthlak

Sorkar hnathawk, kum 60 an tlina an pension hian pension thil chin fel kawngah an khawngaihthlak thei em em a, pension ruala an hamṭhatna dawn tur dawng hi Mizoramah an tam lo viau ang. Hei hi an thawhna
ṭheuh department-a file khawihtute thiam loh a ni a; pension hnu hmana ti teh hrepa file umkual ngai ṭhin hi a tihtawp dan a awm chiang a ni.

Department tinah hian anmahni sorkar hnathawkte hamṭhat-na tur buaipuitu an awm vek a, an thawhpui pension mai turte file chinfel kawngah an muang fu. Sorkar hnathawk reng reng an pension hun tur a chiang vek a, increment a la hmu mai dawn tihte a nih loh chuan pension hma thla thum la awmah a mimal file khan Accounts & Treasuries (A&T) office thleng tawh ang se, pension tawh kum upa lamin an pension-na tur file a um a um a ngai dawn em ni?

Pitar, putar-te'n thei leh thei loin an pension-na tur file an um a, a hmawrbawkna Accounts & Treasuries office-ah harsa taka an kal a ngai a, thingtlang khaw hla tak tak
aṭangte A&T panin an kal ṭhin.

A&T-a thawktute hi mihring ve mai, file ngah tak tak an nih bawk avangin an lo chingfel mai thei bik si lo a, A&T officer leh staff-te pawhin ṭhahnemngai takin thawk mahse a file a thlen tlai miau avangin awlsam takin an lo chinfel theih thil a ni bawk si lo.

Chuvangin, sorkar hnathawk pension hun tur hriat chiante hi an thawhna department lamah a rang lamin a chinfel theih a, chumi tura rawih an ni. An thawhpuite pension dawn ṭepah pension file an buaipui ve chauh a, an pension hnuah a hmawrbawkna A&T office-ah an thawn thei hramte hi inthlahdah uchuak vang a ni. Hei hi department tina a lu ber te'n an hriatpui a ṭul tak meuh meuh tawh a ni.

Accounts & Trea-suries officer leh staff-te hi sorkar hna-thawkah chuan an thawk hnem leh thawk ṭha ber zingah a chhiar theih awm e. Dawr an nuam em em a, pensioner-te lakah phut nei loin theihtawp an chhuah tak meuh meuh a. An pute hriat loa file hawn a, anmahni in lama chingfel hram hram an tam mai; an fakawm tak zet zet a ni. Ka dawr ve tawhah phut an neih ka hre lo a, file an chinfel hnuah lawmthusawina rawlruk pawh tum se, an la duh mang bar lote hi an fakawm leh zual a ni.

- Lalthakima