The Best Model so far

Model lam han sawi rik hlek tawh hi chuan mitthla-ah nula leh tlangval hmel ṭha leh pian nalh, zei chi kim chung chuang tak tak an vei thelh nghal sung sung mai a. A hawi thui deuh phei chuan piah deuhva Miss Chapchar Kut inpen parh lai mek pawh kan va hmu tel hial a ni. Tun ṭuma kan sawi tum erawh Language Model a ni thung.

Ṭawng hi a pawimawh bawk a, hnam tin chi tin hnam fing leh hnam mawl, hnam ropui leh hnam tenau pawhin mahni zawl tawkah kan buaipui ṭheuh mai a ni e. Ram/ hnam ropui deuhte’n “One Nation, One Language” han ti deuh tun tun ṭhin mah se a theih ngawt bik loh. Inpawhna ṭha siam tur leh hmasawn nan ṭawng kan inzir tawn a ṭul a ni.

Keini Mizote ang ngat phei chu kan ṭawng hi lehkha zir nan a la famkim tawk lo em em a; secondary education chin chauh tal pawh sawi fiah thei turin Mizo ṭawng chu nasa taka kan tih hmasawn a la ngai. Chuvangin, lehkha zir sang tur chuan English thiam ngei ngei a la ṭul a ni.

Amaherawhchu, hnam mawl tak pawh hian an nun dan leh an nitin khawsakna mamawh sawi chhuak thei tur khawp ṭawngkam leh ṭawngkauchheh an nei vek a; an nun danin a phak bak hret thil awm dan tur pawh an suangtuah thiamin, thil lo thlen theih dan tur pawh an zeldin thei bawk. An himna tur te, ei leh bar zawnna kawng te, chhungkua leh vantlang nunhona kawng zawng zawng an chim phak chin zel chu anmahni ṭawngin an sawi thiam vek a; khuarel thil lo thleng theite an sawi thiam a, sik leh sa inthlak avanga an khawsak phung danglam theih dan pawh sawi fiah thiam vek. Khawpui rik chhan leh lir nghin chhante pawh mahni ṭawng ngatin an lo chhui chhuak vek a ni! An chhehvela thil awmte an hminghmerh (hming an phuah) thiam a; nungcha tinreng, ramsa leh sava chenin an hram dan zawng zawng anmahni ṭawngin an let thei vek a ni. Nungchate nena leilung luah ho dan tur (co-existence) pawh anmahni ṭawngin an lo nei dim diam a ni!

Primary Education kan tih chu zirna bul, zir ṭan bu leh zir tirh bu, chutiang nun bul zirna chu a ni mai a; chuvangin eng hnam pawhin primary education chu anmahni ṭawngin an zir thei vek a, an zir ngei ngei tur a ni bawk.

Chutih rualin zirlaibu ziak dan, ṭawngkam, ṭawngkauchheh leh thil hminghmerh dante uluk leh fimkhurin, thil thui tak thlir chunga tih a ṭul em em. Zirlaibu ziak turin subject expert chauh an tawk zo lo va, language expert an tel ve ngei ngei a ṭul a ni.

Ṭawng bulṭhut ṭha tak neih hian thil hmuh thiamna leh varpawhna min pe thei a; mihringah rinawmna, dikna, takna, nghehna, chhelna leh huaisennate a nem kai thei a ni tih kan sawi tawh a, kan sawi nawn leh duh a, kan la sawi leh fo dawn a ni. Chuvangin, ‘Ṭawng thiam hmasak ber hmanga zir hmasak phawt’ (first language first) tih ṭawngkam tawite hi lo hmusit hauh suh ang che - psychologist hmingthang Jean Piaget-a Developmental Theory mawngphah nei ngat a ni asin!

Pianpui ṭawng hmanga lehkha zir hmasak phawt a, chumi hnu lamah pianpui ṭawng thiamna behchhana ṭawng dang zir leh hi, “Mother Tongue-Based Multi-Lingual Education” (MTB-MLE) an ti a, ṭawng zir dan (model) lar leh rintlak bera ngaih a ni. Pianpui ṭawngin an zir phawt a, chumi hnu-ah ṭawng dang pahnih/ pathum lai pawh an mamawh dan a thuin an zir leh mai a ni.

“Kum 11 emaw tal an tlin hma chuan naupang zirna chu ṭawng dangin a pawlh rih tur a ni lo” tih chu philosophers tam tak ngaihdan nghet tlur mai a ni a. Academician ṭhenkhat erawh chuan kum 8/9 vel aṭangin ṭawng dang zirtir tel ta ila, thumal leh ṭawngkam tlem tlem, pianpui ṭawng an thiamna tur ti chhe phak lo tur siin ... (Filipino model) tihte pawh an sawi ve. Dinhmun leh boruak inchen lo he khawvel ram zauvah hian tih dan pakhat chauh chu a ṭha famkim bik lo vang e.

Mak ang reng takin hmanlaia kan tih dan, A pawl aṭanga pawl hnih thleng Mizo ṭawng; pawl thum-ah sap ṭawng tlem tlem- A cat (zawhte), A rat (sazu), a bat (kheltiang) emaw, a bat (talhtum?/ saidawium?) ngaihnawm tak mai kha tuna kan sawi mek MTB-MLE model chi khat a lo ni reng mai! Hmanlai tih dan kha a lo tunlai (changkang) zawk tlat chu maw le!

Pawi ber erawh chu zirtirtu thiam (tling) kan nei thei lo ṭhin kha a ni. Ṭawng zirtirna te, hriselna enkawl leh kan uar deuh kaaanseling (counselling)-te hi khawih chhiat palh awl bik an ni a, mi tling (competent) te chauh khawih tur bik an ni.

Tunlaia kan intihhmuh, English Medium (Primary school) ang hi chu a zir mite chuan “Submersion Method” emaw, “Submersion Model” emaw an ti mai ṭhin. Remchang a nih chuan hun dangah kan la thlur bing ang. Educational philosophy leh principles mawngphah tur a nei lem lo va, hmanhmawh leh duhthawh rilru hrin chhuah a ni ber. Linguist tam takin ‘submersion model’ an lam rik ruala an thinlung put hmang chu, Mizote’n ‘Tuikuk’ kan tih rual ruala huih chhuk thli kan tlehtir ang deuh hi a ni.

Inthlahrung hle mah ila Educational Journal kan nei tlat si lo va. (Educational Journal tak ngial pawh nei lovin World-class Education-te kan sawi ve bawk si a). Helaiah thil tam tak chipchiar taka sawi theih a ni bawk si lo. Mizote tana a, aw, b, ch malsawmna thukzia hi sawi tam tawk theih a ni lo ve. Chutih rualin fawren hling zum hlauhawmzia sawi tel a ngai bawk si.

Hmun tin kil tin leh chhawrdawh hrang hranga kan hnam puipate hian lungngaih-na chirhdup-in kan hnam a chim pil duai duai dan hi han hmu fiah thut mai se la aw!

- L.B. Tluanga