Written by
- Lalduhmawia
Dan hnuaiah kan intluktlang lo em ni?
Tun hnai mai, November ni 21 khan Phaizau khawtlangin Tut lui an humhalh huam chhunga Mamit bialtu MLA Pu H Lalzirliana leh a ṭhuihruaite'n bomb (gelatin) hmangin sangha an vua a, sangha kg. 40 chuang lai mai an man nia sawi a ni a; anmahni leh an sangha man thlalak nia sawite nen lam social media tinah a darh chuai chuai mai le.
Ram kalsiam reltute zinga mi, dan ngai pawimawh ber tur leh zawm ṭha ber tur zinga miin dan bawhchhiaa ram leh khawtlang phal loh thil an tih hi a zialo tak zet a. Dan hmanga bawhzuina emaw, sangha bomb-tute man leh hrem thâwmte hriat tur a awm zui lo leh zel phei hi chu a pawi a, a mak a, rilru a tiná a, a thinrimthlak bawk.
Mipuite'n ram hruaitua tlinga ngaia MLA atana an thlan Pu H Lalzirliana hian dan bawhchhiain pawi a khawih palh emaw, khawih lui emaw a ni thei a. Bomb hmangin sangha an man ngei a nih chuan Mizo mipui hmaah thupha chawiin, ngaihdam dil ngam rawh se. An puhna hi a dik lo a, dan bawhchhiat an nei lo a, an dik a nih chuan sawi ngam bawk rawh se.
Hman deuh lawkah Aizawl aṭanga chhim lam khaw pakhata mi 2/3-in saza an kâp lai video social media-ah bawk a darh chiam a. Mipui an thinrim a, sorkar thuneitute pawhin bawhzui nghalin, saza kâptute chu rang takin an man nghal a nih kha. Luia nungchate leh ramsa kâptute man thu te, silai leh hmanraw dang mansak thu te, ramsa rêp man thute hriat leh hmuh tur a awm fo bawk.
Mamit bial MLA-in dan bawhchhiaa bomb hmangin sangha kg. 40 chuang an man nia sawiah hian dan anga hma la theitute'n an bawhzui thuai mipuiin an beisei a. Mahse, tun thlenga sawrkarin hma a la lo leh inhrem thâwm hriat tur a awm lo hi a mak.
Mi narân leh hnuaihnung zawkte'n dan an bawhchhiata hrem an nih zung zung theih lai hian, sorkar officer te, MLA te, minister-te leh sawrkara thil tih theihna eng emaw tak neite hi hrem theih an ni ve lo em ni?
MLA Pu H Lalzirliana phei chu dan ngaih pawimawh vang leh dan ang taka kal duh vanga a MLA-pui Pu Lalduhoma laka dan ang thil ti tura Assembly Speaker ngentute zinga mi a ni a. Sawrkarin hma a la mai lo a nih pawhin, Kristian dik tak, Pathian ringtu, chhia leh ṭha hriatna thiang nei a nih chuan a thil sualah mawh inphurh ngam se a lawmawm ngawt ang.
Mizoramah hian dan hnuaiah mipuite hi kan intluktlang lo em ni le?