Pizawn & Puzawn koh dan

Kumin MUP General Assembly khan Makpa in a pizawn leh a puzawn a koh dan tur tih thu an khel a. Committee zim zawk khelah an dah ṭha ta niin ka hria. Chanchinbu ṭhenkhatah Makpa chuan a pizawn & puzawn chu 'ka nu, ka pa' tiin a ko tur a ni tih lam te kha a lo chhuak a. (Puzawn, pizawn tiin kan ziak tawh ang.)

He inkoh dan chungchangah hian ka ngaihdan tlem kan sawi ve teh ang. Kan nupuite pa hi pu atana kan zawn avangin puzawn vuah a nih hi mi â nileng tan lo chuan a hming
aṭang hian a lang vek a. Fa-mo chuan a pasala pa chu pa-ah a zawn avangin a pazawn a ni thung. Chuvangin, ihe loin 'ka pa' a rawn ti mai a ni. He pazawn leh puzawn hi a intluk lo a, a inchen hek lo. Nupui chu mipa lamin fa-mo atan an lei a ni (chu fa-mo a nih chu). Chuvangin, ka pa tia a koh hi a tihmakmawh a ni. Ka pa tia a koh loh chuan fa-mo mawlmang tak emaw chapo tak emaw a ni mai.

Makpa leh a puzawn inkar ai chuan fa-mo leh a pazawn inkar chu a zimin an inlaichinna pawh a hnai zawk daih a ni. Makpa chuan vawk a talh pawhin pu-sachawn an tih a bawp phawh hlawk pek chu a puzawn laka a bat a ni. Makpa-in a puzawn (nupuia pa tih hi chu puzawn hrilhfiahna lek a ni) chu ka pa tia a koh dawn tak si chuan pu-sachawn tih chu pa-sachawn tia thlak tur a lo ni ang a, pu-ban-man tih te pawh pa-ban-man tih tawh tur a lo ni ang.

Makpa, a puzawn nena an inlaichinna leh fa-mo, a pazawn nena an inlaichinna hi kar hla tak a ni. Fa-mo chuan a va lawina in kha 'kan in' ti thei khawpa a pazawn te rawn zawm a nih laiin, makpa ve thung chuan a puzawn te in chu engti kawng maha 'kan in' a tih theih ngaihna a awm lo. Makpa chhungkhung te a nih ngawt si loh chuan - chu pawh makpa chhungkhung nazawng chuan an ti ngam lo ang.

Tute emaw, mahni puzawn te 'ka pa' tia koh chak em em chuan heng dan lo awmsa hi thlak loin makpain a puzawn chu 'ka pa' tiin ko se tihna lek alawm an ti maithei. Han ngaihtuah chiang teh pu-zawn na na na 'ka pa' han tih chu, 2 leh 2 belh chu 5 tih ang vel a nih hi! Chuvangin, he makpa in puzawn a koh dan tur tih hi chin pawr ngai lo, kan pu Chhurbura ngei pawhin a pizawn a it ṭum pawh khan 'Pi chhx lxk le dam' a tih kha! Pu Chhura te hun hma aṭanga pizawn/ puzawn tih a nih tawh chu.

Amaherawhchu, mimal karah makpa in a duh phawt chuan a puzawn chu lo pa-in lo u mahse engnge a pawina? Mimal duhthlanna a ni mai. Puzawn te nena inhnimhnaihna zawk nia a hriat a hnu.

- Chhuanliana, BVT