Zoram tan Zoram Police

'Smuggler tân Zoram Police!' tih thuziak Lalremruata ziah ka chhiar khan ka rilru a na a, ka thin a rim bawk a, Mizoram tana theihtawp chhuahtu Mizoram Police-te hnathawh ṭhat fak tak aruanga a sawisel zawnga a rawn ziak kha ram pawisawina angah ka ngai hial a ni.

Rangkachak tibo-tute hian FIR an thehlut a, chu chu police lam hian an bawhzui a, an bawhzui chhan chu insuamna leh inrawkna thil a thlen vang a ni a, silai nena inrawkna a thleng hi police hian an chhui ngei ngei tur a ni zawk dawn lo em ni? Rangkachak bo hi chu keia hriat ve danah chuan Police lam ni loin Custom lam chan zawk niin ka hria.

A enga pawh chu lo ni tehreng se, Police-te hian rangkachak tam tham a bo tih an hriat rualin an zawng nghal a, an fakawmin an huaisenna leh taimakna hi ka fak lo thei lo.

Police-te hian rang-kachak bo hi zawng lo se, he thil hian sual lian zawk a hrin theih ka ring a, chungte chu:

1. Mizoram hi smuggler paradise-ah a chang ang a, an duh duhin smuggling an kalpui ang a, silai nen an thil tihrukte chu an inchuh ang a, mafia hmun ang maiah a chang thei a ni.

2. Smuggler anga khawsa zingah hian sorkar kalphung hria, pawl kalphung hria leh contact nei ṭha tak tak pawh an awm ngei tih a chiang tawh a, hengte hi hailan ni lo ta se Mizoram hi a chhe zual ang.

3. Tuna mi hi rang-kachak case a nih vangin sual lian lova ngaih chi a ni lo, rangkachak tawlh ru duhtu hian damdawi (ruihhlo) leh silai leh ralthuam dang pawh a tawlh ru duh lo ang tih tunge sawi thei?

Ka ngaihtuah ngun poh leh ka thin a rim. Myanmar ram kan tlawh kur ta dup chung hian anni lamin smuggling tihna kawngpuia Mizoram rawn hman hi an la bansan si lova, chu chu Mizorama mi pangngai chin nia kan hriatte nen hian an inzawm ṭha hle tih a takin kan hmu zel. Myanmar
aṭanga India ram rila smug-gling kalpuitute tan Mizoram hi safe heaven angah a chang zo dawn ta.

Central YMA hnuaia ruihhlo dotute khan Zokhawthar leh Aizawl inkara maxi-cab service tam zawkin ruihhlo an phur tel
ṭhin tih kha an puang tawh a, heng Sumo-te hi tu nge check ṭhin a, tunge khuahkhirh dawn? Kan Police-te bawk hi an fakawm ta sa sa han che deuh teh se, inṭhuah fai tak tak a ngai ta a nih hi.

Myanmar politics a kal fuh avangin kan inhnaih tawlh tawlh dawn a, kan Chief Minister ngei pawh a zin tawh a, khilam aṭanga thil ṭha lo lo chhuk ṭhin khi a tawp hmak dawn nge a zual sauh dawn le? Kan Police fakawmte an chet chhunzawm a ngai a ni. Rangkachak tawlh ru duhte hian sum siamna tur chuan thil dang pawh an tawlh ang, rangkachak hi an vawi khat tawlh-na pawh a ni lo ang.

Chuvangin, kan Police-te hian Zoram hi venghim rawh se.

- Lalthanmawia